ഇന്ത്യയിലേക്കുള്ള ടൂറിസ്റ്റ് വീസ നിരക്കുകള്‍ കുത്തനെ ഉയര്‍ത്തി. പുതിയ ഉത്തരവു പ്രകാരം എല്ലാത്തരം വിസയുടെയും നിരക്കു ഇരട്ടിയാക്കിയിട്ടുണ്ട്. നൂറുശതമാനത്തിലധികം വര്‍ധനയാണ് ഉണ്ടായിരിക്കുന്നത്. ഖത്തറില്‍നിന്ന് ഇന്ത്യയിലേക്കു പോകാന്‍ വിസയ്ക്ക് അപേക്ഷിക്കുന്ന വിദേശികളില്‍ നിന്ന് ഖത്തറിലെ ഇന്ത്യന്‍ എംബസി ഈടാക്കുന്ന നിരക്കിലാണു വര്‍ധന. ഇതു സംബന്ധിച്ച വിശദവിവരങ്ങള്‍ എംബസിയുടെ വെബ്‌സൈറ്റില്‍ പ്രസിദ്ധീകരിച്ചു. ഇന്ത്യ സന്ദര്‍ശിക്കാനായി കഴിഞ്ഞ വര്‍ഷം 12,000 ലധികം പേര്‍ക്കാണു ഖത്തറിലെ ഇന്ത്യന്‍ എംബസി വിസ നല്‍കിയത്. ഇതിലേറെയും ടൂറിസ്റ്റ് വിസകളാണ്. ഇതിനു പുറമേ ചികില്‍സയ്ക്കു വേണ്ടിയുള്ള മെഡിക്കല്‍ വിസയ്ക്കും വിദ്യാര്‍ഥികളുടെ പഠനത്തിനായുള്ള വിസയ്ക്കുമാണു കൂടുതല്‍ അപേക്ഷകര്‍ എത്തുന്നത്.

ഖത്തര്‍ എംബസിയില്‍ നിന്ന് ഇന്ത്യയിലേക്കു ടൂറിസ്റ്റ് വീസ എടുക്കുന്ന ഖത്തരികള്‍ പത്തു റിയാല്‍ സര്‍വീസ് ചാര്‍ജ് ഉള്‍പ്പെടെ 170 റിയാലാണ് നേരത്തേ അടയ്‌ക്കേണ്ടിയിരുന്നത്. ഇന്നുമുതല്‍ ടൂറിസ്റ്റ് വിസയ്ക്ക് 370 റിയാലാകും. ഖത്തരി ട്രാന്‍സിറ്റ് യാത്രക്കാര്‍ക്ക് 15 ദിവസം വരെ ഇന്ത്യയില്‍ കറങ്ങുന്നതിനുള്ള വിസ നിരക്ക് 80 റിയാല്‍ മാത്രമാണ്. ടൂറിസ്റ്റ് വിസയ്ക്കായി അപേക്ഷിക്കുന്ന ഖത്തരികള്‍ക്കു സാധാരണ ആറുമാസത്തേക്കുള്ള മള്‍ട്ടിപ്പിള്‍ എന്‍ട്രി വിസയാണു നല്‍കാറുള്ളത്. ആറു മാസത്തേക്കുള്ള വിസ പുതിയ ഉത്തരവില്‍ ഒഴിവാക്കിയിട്ടുണ്ട്. പകരം സിംഗിള്‍ എന്‍ട്രി വിസയും ഒരു വര്‍ഷത്തേക്കുള്ള മള്‍ട്ടിപ്പിള്‍ എന്‍ട്രി വിസയുമാണു നല്‍കുന്നത്. ഒരു വര്‍ഷം മുതല്‍ അഞ്ചു വര്‍ഷം വരെയുള്ള മള്‍ട്ടിപ്പിള്‍ എന്‍ട്രി വിസയ്ക്ക് 730 റിയാലാണു പുതിയ നിരക്ക്. 

ബിസിനസ് വിസയുടെ നിരക്കിലും വര്‍ധനയുണ്ട്. ഒരു വര്‍ഷത്തേക്കു 440, അഞ്ചു വര്‍ഷംവരെ 910 എന്നിങ്ങനെയാണ് പുതിയ നിരക്ക്. ഇന്ത്യയില്‍ ചികില്‍സ നടത്തുന്നതിന് ആറു മാസം വരെയുള്ള മെഡിക്കല്‍ വിസയ്ക്ക് 300 റിയാലാണു പുതിയ നിരക്ക്. ഒരു വര്‍ഷം വരെ 440 റിയാല്‍ നല്‍കണം. ഓരോ രാജ്യക്കാര്‍ക്കു വ്യത്യസ്തമാണു വിസ നിരക്ക്. പാക്കിസ്ഥാന്‍ പൗരന്‍മാര്‍ക്ക് 10 റിയാലാണ് വിസാ നിരക്ക്ക. യുകെ പൗരന്മാര്‍ക്കുള്ള ടൂറിസ്റ്റ് വീസയ്ക്ക് 590 റിയാലും യുഎസ് പൗരന്മാര്‍ക്ക് 370 റിയാലുമാണു ഫീസ്. ശ്രീലങ്കക്കാര്‍ക്ക് 60 റിയാല്‍ മതിയാകും.