ഗള്‍ഫില്‍ ഐശ്വര്യപൂര്‍ണ്ണമായ വിഷു ആഘോഷിച്ച് മലയാളികള്‍
ഐശ്വര്യത്തിന്റെയും സമൃദ്ധിയുടെയും ആഘോഷമായ വിഷു ഗള്‍ഫിലും ആഘോഷിച്ചു. കൊന്നപ്പൂവും കണിവെള്ളരിയും നവധാന്യങ്ങളുമെല്ലാം പരമാവധി സംഘടിപ്പിച്ച് മലയാള തനിമയോടെ തന്നെയായിരുന്നു മിക്ക ഫഌറ്റുകളിലും വിഷുവാഘോഷം. താമസ സ്ഥലത്തും ചില മാളുകളിലും കണിയൊരുക്കിയിരുന്നു. അബുദാബി മദീന സായിദ് ഷോപ്പിങ് മാളില്‍ ലുലു ഒരുക്കിയ ഭീമന്‍ വിഷുക്കണി മലയാളികളല്ലാത്തവരെയും ഏറെ ആകര്‍ഷിച്ചു. വെള്ളരി, ചക്ക, കപ്പ, ചേന എന്നിവയടക്കം 300കിലോ പഴം, പച്ചക്കറികളാണ് ഇതിനായി ഉപയോഗിച്ചതെന്ന് മാള്‍ അധികൃതര്‍ പറഞ്ഞു. വിദേശികളടക്കമുള്ളവര്‍ ഇതിന് മുന്‍പില്‍ നിന്ന് പടമെടുക്കാന്‍ മത്സരിച്ചു.
ബര്‍ദുബായിലെ ക്ഷേത്രത്തില്‍ ആളുകളുടെ വന്‍ തിരക്കനുഭവപ്പെട്ടു. കുട്ടികള്‍ രാവിലെ തന്നെ കുളിച്ചൊരുങ്ങി പുത്തന്‍ വസ്ത്രമണിഞ്ഞ് മുതിര്‍ന്നവരില്‍ നിന്നു കൈനീട്ടം വാങ്ങി. വെള്ളിയാഴ്ചയിലെ ബിരിയാണിക്ക് പകരം പല കുടുംബങ്ങള്‍ ചേര്‍ന്ന് ഭക്ഷണമുണ്ടാക്കി സദ്യയൊരുക്കി. പാര്‍ക്കുകളിലും റസ്റ്ററന്റു ഹാളുകളിലും കൂടിച്ചേര്‍ന്നവരും ഒട്ടേറെയാണ്. പ്രവാസി സംഘടനകളും ആഘോഷം സംഘടിപ്പിച്ചിരുന്നു. യുഎഇയില്‍ സ്‌റ്റേജ് ഷോകളും അരങ്ങേറി. മമ്മുട്ടിയുടെ ഹിറ്റ് ചിത്രം ദ് ഗ്രേറ്റ് ഫാദര്‍, റാസല്‍ഖൈമയില്‍ ചിത്രീകരിച്ച സൂപ്പര്‍ഹിറ്റ് ചിത്രം ടേക്ക് ഓഫ്, വിജയ് സേതുപതിയുടെ കവന്‍, ആര്യയുടെ കടമ്പന്‍ എന്നിവയാണ് വിഷു ചിത്രങ്ങള്‍. തിയറ്ററുകള്‍ ഏറെ നാളുകള്‍ക്ക് ശേഷം ഇന്നലെ സജീവമായി.
https://www.facebook.com/Malayalivartha
