1917-ലാണ് ആദ്യമായി ഒറ്റരൂപ നോട്ട് ഇറക്കുന്നത്. അന്ന് നാണയങ്ങള്‍ വ്യാപകമായിരുന്ന കാലമായിരുന്നു. ശതാബ്ദി പൂര്‍ത്തിയാക്കുന്ന ഒറ്റരൂപ നോട്ടുകളുടെ പ്രദര്‍ശനത്തിന് വെള്ളിയാഴ്ച ദേര മക്തൂം സ്ട്രീറ്റിലെ നുമിസ്ബിങ് ഗാലറിയില്‍ തുടക്കമാകും. ദുബായ് ആസ്ഥാനമായുള്ള നുമിസ്ബിങ് കമ്പനിയും ഇന്റര്‍നാഷണല്‍ ബാങ്ക് നോട്ട് സൊസൈറ്റി (ഐ.ബി.എന്‍.എസ്.) യുടെ ദുബായ് ഘടകവും ചേര്‍ന്നാണ് പ്രദര്‍ശനം സംഘടിപ്പിക്കുന്നത്.

ഒന്നാം ലോകമഹായുദ്ധ കാലത്ത് ലോഹത്തിന് ആവശ്യം വര്‍ധിച്ചപ്പോഴാണ് ആദ്യമായി നോട്ടുകള്‍ അടിച്ചിറക്കാന്‍ തുടങ്ങിയത്. 1994-ല്‍ അച്ചടിയുടെ ചെലവ് കൂടിയപ്പോള്‍ ഒറ്റരൂപ നോട്ടുകള്‍ നിര്‍ത്തലാക്കി. എന്നാല്‍, 21 വര്‍ഷത്തിന് ശേഷം 2015ല്‍ വീണ്ടും ഒറ്റരൂപ നോട്ടുകള്‍ ഇറക്കിത്തുടങ്ങി. ജോര്‍ജ് അഞ്ചാമന്റെ ഛായാചിത്രവുമായാണ് ആദ്യ ഒറ്റരൂപ നോട്ട് പുറത്തിറക്കിയത്. ഇതുള്‍പ്പെടെ കഴിഞ്ഞവര്‍ഷം വന്ന നോട്ടുവരെ ഉള്‍ക്കൊള്ളിച്ച വിവിധ കാലഘട്ടങ്ങളിലെ നൂറോളം ഒറ്റരൂപ പ്രദര്‍ശനത്തില്‍ ഉണ്ടാകും.

സ്വാതന്ത്ര്യത്തിനു മുന്‍പുള്ള ബ്രിട്ടീഷ് കൊളോണിയല്‍ വാഴ്ചയുടെ ചരിത്രവഴികളിലൂടെ സഞ്ചരിക്കുന്ന പ്രദര്‍ശനം വിദ്യാര്‍ഥികള്‍ക്കും ചരിത്രാന്വേഷകര്‍ക്കും അപൂര്‍വമായ അനുഭവമാകും. ഓരോ നോട്ടിനെക്കുറിച്ചുമുള്ള വിശദമായ വിവരണവും ഇതോടൊപ്പമുണ്ടാകും. പ്രദര്‍ശനം മെയ് 14 വരെ തുടരുമെന്ന് നുമിസ്ബിങ് സ്ഥാപകനും, ഐ.ബി.എന്‍.എസ്. ദുബായ് ഘടകം പ്രസിഡന്റുമായ രാം കുമാര്‍ പത്രസമ്മേളനത്തില്‍ അറിയിച്ചു.