അവധിക്കാലം അടിച്ച് പൊളിക്കാന് അര്ച്ചനയും മക്കളും റാസല്ഖൈമയിലേക്ക് പറന്നു; പുറകേ എല്ലാം തകര്ത്ത് ആ ദുരന്തവും
അവധിക്കാലം അടിച്ച് പൊളിക്കാന് അര്ച്ചനയും മക്കളും റാസല്ഖൈമയിലേക്ക് പറന്നപ്പോള് ഇത്രയും വലിയൊരു അപകടം പതിയിരിക്കുന്നെന്ന് അവരാരും കരുതിയില്ല. കഴിഞ്ഞ മാര്ച്ച് 26 ന് ഒരു മാസത്തെ സന്ദര്ശക വിസയിലായിരുന്നു കാഞ്ഞങ്ങാടിനടുത്ത കള്ളാറിലെ അര്ച്ചനയും മകളും ഭര്ത്താവിനൊപ്പം കഴിയാന് റാസല്ഖൈമയിലേക്ക് പോയത്. അവധിക്കാലം ആഘോഷിക്കാന് വിവിധ സ്ഥലങ്ങള് സന്ദര്ശിച്ചു വരവേയാണ് അര്ച്ചനയെ ദുരന്തം പിടികൂടിയത്. അര്ച്ചനയ്ക്ക് ഇനിയും ബോധം തിരിച്ചു കിട്ടിയിട്ടില്ല. ഭര്ത്താവ് ശശിധരനേയും മകളേയും തിരിച്ചറിയാനും കഴിയുന്നില്ല.
വാഹനനിബിഡമായ റാസല്ഖൈമയിലെ കെ.എഫ്.സി.ക്ക് മുന്നില് വെച്ച് റോഡ് മുറിച്ച് കടക്കവേ അതിവേഗതയില് കുതിച്ചെത്തിയ വാഹനം അര്ച്ചനയെ ഇടിച്ചു വീഴ്ത്തുകയായിരുന്നു. അപകടത്തില് തലക്ക് ഗുരുതരമായി പരിക്കേറ്റ അര്ച്ചനയെ റാസല്ഖൈമയിലെ റാസ് ആശുപത്രിയില് ചികിത്സക്ക് വിധേയമാക്കിയിരുന്നു. അടിയന്തിര ശസ്ത്രക്രിയ നടത്തിയെങ്കിലും ഇപ്പോഴും അവര് പഴയ നിലയിലേക്ക് തിരിച്ച് വന്നിട്ടില്ല. അപകടനില തരണം ചെയ്തു എന്ന് മാത്രമാണ് മെച്ചം. തുടര് ചികിത്സക്കായി തിങ്കളാഴ്ച അര്ച്ചനയെ കൊച്ചിയിലെ ആശുപത്രിയിലേക്ക് കൊണ്ടു വരികയാണ്.
ശസ്ത്രക്രിയക്കും മറ്റ് ചികിത്സാ ചെലവ്ക്കുമായി ലക്ഷങ്ങള് ചിലവഴിക്കേണ്ടി വന്നു. അപകടം നടന്ന് മൂന്നാഴ്ച പിന്നിട്ടെങ്കിലും ഇനിയും ബോധം തിരിച്ചു കിട്ടിയിട്ടില്ല. രണ്ടാഴ്ചയോളം വെന്റിലേറ്ററില് കഴിഞ്ഞെങ്കിലും ഈയാഴ്ച ആദ്യം മാത്രമാണ് വാര്ഡിലേക്ക് മാറ്റിയത്. ചികിത്സാ ചെലവാണ് ഈ കുടുംബം നേരിടുന്ന ഏറ്റവും വലിയ വെല്ലുവിളി. കഴിഞ്ഞാഴ്ച റാസല് ഖൈമയില് കെ.എം. സി.സി.യുടെ നാല്പതാം വാര്ഷിക ആഘോഷ പരിപാടിക്കെത്തിയ മുസ്ലിം ലീഗ് സംസ്ഥാന പ്രസിഡന്റ് പാണക്കാട് ഹൈദരലി ശിഹാബ് തങ്ങള് ആശുപത്രിയിലെത്തി അര്ച്ചനയെ സന്ദര്ശിച്ചിരുന്നു.
അദ്ദേഹത്തിന്റെ ഇടപെടലാണ് ഇന്ത്യന് അംബാസിഡര് നവദീപ് സിങ് സൂരി അര്ച്ചനയുടെ നാട്ടിലേക്കുള്ള ചികിത്സാ കാര്യത്തില് അനുകൂല സാഹചര്യം ഒരുക്കിയത്. ഇന്ത്യന് കോണ്സുലേറ്റ് ഇടപെട്ടതോടെ അര്ച്ചനയെ പ്രത്യേകം സംവിധാനം ഒരുക്കി നാട്ടിലേക്ക് എത്തിക്കുകയാണ്. സന്ദര്ശക വിസയിലെത്തിയതിനാല് ഇന്സൂഷറന്സ് ആനുകൂല്യങ്ങളൊന്നും റാസല്ഖൈമയിലെ ചികിത്സയില് അര്ച്ചനക്ക് സഹായകമായി എത്തിരുന്നില്ല. അതിനാല് ആശുപത്രി ചെലവ്ക്ക് ശശിധരന് താങ്ങായത് സുമനസ്സുകളുടെ സഹായം മാത്രമാണ്. ചികിത്സക്കായി ഇനിയും ഭാരിച്ച തുക വേണ്ടി വരും.
വരുന്ന ഓഗസ്റ്റ് മാസം വരെ വിസ കാലാവധി ഉള്ളതിനാല് ജോലി ചെയ്യുന്ന സ്ഥാപനം അര്ച്ചനക്ക് കൂട്ടു നില്ക്കാന് ശശിധരന് അനുമതി നല്കിയിട്ടുണ്ട്. വരുന്ന തിങ്കളാഴ്ച അര്ച്ചനയെ എയര് ഇന്ത്യയുടെ വിമാനത്തില് കൊച്ചിയിലേക്ക് കൊണ്ടു വരും. പ്രത്യേകം സജ്ജമാക്കിയ വിമാനത്തില് അര്ച്ചനക്കായി പ്രത്യേക സൗകര്യവും ഒരുക്കിയിട്ടുണ്ട്. വിമാനത്തിന്റെ പിറകിലെ ആറ് സീറ്റുകള് മാറ്റി പ്രത്യേക റൂം സൗകര്യം ഒരുക്കും. ഒരു നേഴ്സിന്റെ സഹായം കൂടി ആശുപത്രിയിലെത്തും വരെയുണ്ടാകും.
https://www.facebook.com/Malayalivartha