യുഎസ് പ്രസിഡന്റ് ഡൊണാള്‍ഡ് ട്രംപ് അടുത്ത മാസം സൗദി സന്ദര്‍ശിക്കും.
യുഎസ് പ്രസിഡന്റ് ഡൊണാള്‍ഡ് ട്രംപ് അടുത്ത മാസം സൗദി സന്ദര്‍ശിക്കും. കഴിഞ്ഞ ദിവസം റിയാദിലെത്തിയ യുഎസ് പ്രതിരോധ സെക്രട്ടറി ജയിംസ് മാറ്റിസ് സൗദി അധികൃതരുമായി ഇക്കാര്യം ചര്‍ച്ച ചെയ്തതായാണ് റിപ്പോര്‍ട്ട്.
അമേരിക്കന്‍ പ്രസിഡന്റായി ചുമതലയേറ്റതിന് ശേഷം ഡൊണാള്‍ഡ് ട്രംപ് നടത്തുന്ന പ്രഥമ വിദേശ സന്ദര്‍ശനം മെയ് മാസത്തിലാണ് നടക്കുന്നത്. യൂറോപ്യന്‍ രാജ്യങ്ങളിലേക്കാണ് ട്രംപ് സന്ദര്‍ശനം ആസൂത്രണം ചെയ്തിട്ടുള്ളത്. മെയ് അവസാനത്തില്‍ നടക്കുന്ന നാറ്റോ ഉച്ചകോടിയിലും ജി 7 ഉച്ചകോടിയിലും അമേരിക്കന്‍ പ്രസിഡന്റ് പങ്കെടുത്തേക്കും. ഈ പര്യടനത്തിന്റെ ഭാഗമായി ട്രംപ് സൗദിയിലും സന്ദര്‍ശനം നടത്തുമെന്നാണ് അറിയുന്നത്. ഇതിന് മുന്നോടിയായാണ് കഴിഞ്ഞ ദിവസം അമേരിക്കന്‍ പ്രതിരോധ സെക്രട്ടറി ജയിംസ് മാറ്റിസ് റിയാദിലെത്തിയതെന്ന് മാധ്യമങ്ങള്‍ റിപ്പോര്‍ട്ട് ചെയ്തു. സൗദി ഭരണാധികാരി സല്‍മാന്‍ രാജാവുമായും രണ്ടാം കിരീടവാകാശിയും പ്രതിരോധ മന്ത്രിയുമായ അമീര്‍ മുഹമ്മദ് ബിന്‍ സല്‍മാനുമായും മാറ്റിസ് കൂടിക്കാഴ്ച നടത്തിയിരുന്നു.
കഴിഞ്ഞ മാസം വാഷിങ്ടണില്‍ സന്ദര്‍ശനം നടത്തിയ അമീര്‍ മുഹമ്മദ് ബിന്‍ സല്‍മാന്‍ ട്രംപുമായി ചര്‍ച്ച നടത്തിയിരുന്നു. ഒബാമ ഭരണത്തിന്റെ അവസാന കാലത്ത് അകല്‍ച്ചയിലായ ഇരു രാജ്യങ്ങളും തമ്മിലുള്ള ബന്ധം ട്രംപിന്റെ റിയാദ് സന്ദര്‍ശനത്തോടെ ശക്തമാകുമെന്നാണ് വിലയിരുത്തപ്പെടുന്നത്. ഇരു രാജ്യങ്ങളും തമ്മിലുള്ള ഉഭയ കക്ഷി ബന്ധം ശക്തിപ്പെടുത്തുന്നതിനോടൊപ്പം മേഖലയിലെ പ്രധാന സുരക്ഷ, രാഷ്ട്രീയ വിഷയങ്ങളും സന്ദര്‍ശനത്തില്‍ ചര്‍ച്ചയാകും. ഐഎസ് ഭീകരത ഇല്ലാതാക്കലും യമന്‍, സിറിയ പ്രശ്‌ന പരിഹാരവും പ്രധാന അജണ്ടയാവും. അതോടൊപ്പം അറബ് ഇസ്‌ലാമിക രാജ്യങ്ങളുമായുള്ള ബന്ധം ശക്തിപ്പെടുത്തലും ട്രംപിന്റെ സന്ദര്‍ശ ലക്ഷ്യമാണ്.
https://www.facebook.com/Malayalivartha
