വിവാഹേതര ലൈംഗിക ബന്ധം കുറ്റകരമാകില്ല, 18 വയസ്സിന് മുകളിലുള്ളവരുമായി പരസ്പര സമ്മതത്തോടെ വിവാഹേതര ലൈംഗിക ബന്ധത്തില് ഏര്പ്പെടുന്നത് കുറ്റകരമല്ലെന്ന് പുതിയ നിയമം, ബലാത്സംഗത്തിനും അനുവാദത്തോടെയല്ലാത്ത ലൈംഗിക ബന്ധത്തിന് ജീവപര്യന്തം തടവ് ശിക്ഷ, ചരിത്രത്തിലെ ഏറ്റവും വലിയ നിയമ പരിഷ്ക്കരണവുമായി യുഎഇ
പുതിയ നിയമ പ്രകാരം യുഎഇയില് വിവാഹേതര ലൈംഗിക ബന്ധം കുറ്റകരമാകില്ല. സിവില്, ക്രിമിനല് നിയമങ്ങളില് വലിയ പരിഷ്ക്കരണത്തിനാണ് യുഎഇ പ്രസിഡന്റ് ശെയ്ഖ് ഖലീഫ ബിന് സായിദ് അല് നഹ്യാന് അംഗീകാരം നല്കിയിരിക്കുന്നത്. ഇത് യുഎഇയുടെ ചരിത്രത്തിലെ ഏറ്റവും വലിയ നിയമ പരിഷ്ക്കരണമായാണ് വിലയിരുത്തപ്പെടുന്നത്.
18 വയസ്സിന് മുകളിലുള്ളവരുമായി പരസ്പര സമ്മതത്തോടെ വിവാഹേതര ലൈംഗിക ബന്ധത്തില് ഏര്പ്പെടുന്നത് കുറ്റകരമല്ലെന്നാണ് പുതിയ നിയമം ചൂണ്ടിക്കാട്ടുന്നത്. എന്നാല് ഭര്ത്താവോ, ഭാര്യയോ, രക്ഷിതാവോ പരാതിപ്പെടുന്ന പക്ഷം ഇത് കുറ്റകരമാകുമെന്നും ഇത്തരം സന്ദര്ഭങ്ങളില് ആറു മാസത്തില് കുറയാത്ത തടവ് ശിക്ഷ ലഭിക്കാമെന്നും നിയമത്തില് വ്യവസ്ഥ ചെയ്യുന്നു.
അതേസമയം പ്രതിക്കെതിരായ ശിക്ഷ വേണ്ടെന്നു വയ്ക്കാന് ഭാര്യയ്ക്കും ഭര്ത്താവിനും രക്ഷിതാക്കള്ക്കും അധികാരമുണ്ടായിരിക്കും. വിവാഹേതര ലൈംഗിക ബന്ധത്തില് ജനിക്കുന്ന കുട്ടികള്ക്ക് സംരക്ഷണം നല്കും.ബലാത്സംഗത്തിനും അനുവാദത്തോടെയല്ലാത്ത ലൈംഗിക ബന്ധത്തിനും ജീവപര്യന്തം തടവു ശിക്ഷയാണ് ലഭിക്കുക. 18 വയസ്സിന് താഴെയുള്ളവരോ ഭിന്നശേഷിക്കാരോ ചെറുത്തുനില്ക്കാന് കഴിവില്ലാത്തവരോ ആണ് ബലാത്സംഗത്തിന് ഇരയായതെങ്കില് വധശിക്ഷ വരെ ലഭിക്കാനിടയുണ്ട്.
ആളുകളോട് സഭ്യേതരമായി പെരുമാറിയാല് 10,000 ദിര്ഹം പിഴയും തടവും ശിക്ഷയായി ലഭിക്കും. കുറ്റകൃത്യത്തിനിടയില് ഭീഷണിയോ ശക്തിയോ ഉപയോഗിച്ചാല് 20 വര്ഷം വരെ തടവ് ലഭിക്കാന് സാധ്യതയുണ്ട്. സ്വകാര്യ ഇടങ്ങളിലെ മദ്യപാനം ഇനി മുതല് കുറ്റകരമല്ലെന്നാണ് പുതിയ നിയമത്തിലെ മറ്റൊരു സവിശേഷത.
എന്നാല് പൊതു ഇടങ്ങളിലും മറ്റ് നിയമം മൂലം അനുവദിക്കപ്പെട്ട ഇടങ്ങളിലും വച്ച് മദ്യപാനം നടത്തുന്നത് കുറ്റകരമാണ്. 21 വയസ്സില് താഴെയുള്ളവര്ക്ക് മദ്യം നല്കുന്നതും, അവരെ അത് ഉപയോഗിക്കാന് പ്രേരിപ്പിക്കുന്നതും ശിക്ഷാര്ഹമായ കുറ്റമാണ്. സാമൂഹിക മാദ്ധ്യമങ്ങള് വഴി ഉള്പ്പെടെ വ്യാജ വാര്ത്തകള് പ്രചരിപ്പിക്കുന്നതും പുതിയ നിയമ പ്രകാരം കുറ്റകരമാണ്.
https://www.facebook.com/Malayalivartha
