ഗള്‍ഫ് മേഖലയിലും വിവിധ രാജ്യങ്ങളിലുമായി ലുലു ഗ്രൂപ്പ് രണ്ടുവര്‍ഷത്തിനകം 10,000 പേര്‍ക്ക് കൂടി തൊഴില്‍ നല്കുമെന്ന് ലുലു ഗ്രൂപ്പ് ചെയര്‍മാന്‍ എം.എ. യുസഫലി അബുദാബിയില്‍ പറഞ്ഞു.
ലുലു ഗ്രൂപ്പ് അബുദാബി മുഷിരിഫ് മാളില്‍ ആരംഭിച്ച 'ദി മാര്‍ക്കറ്റി ' ന്റെ ഉദ്ഘാടനത്തിനുശേഷം മാധ്യമ പ്രവര്‍ത്തകരുമായി സംസാരിക്കുകയായിരുന്നു അദ്ദേഹം. ഈ വര്‍ഷം വിവിധ രാജ്യങ്ങളിലായി 13 ഷോപ്പിങ് മാളുകള്‍ കൂടി ആരംഭിക്കുമെന്നും അദ്ദേഹം വിശദീകരിച്ചു. ഗള്‍ഫിലെ ഏറ്റവും വലിയ പച്ചക്കറി, മത്സ്യ, മാംസ്യ ചന്തയായ 'ദി മാര്‍ക്കറ്റ് ' ബുധനാഴ്ച രാവിലെ യു.എ.ഇ. സാംസ്‌കാരിക യുവജന ക്ഷേമ, സാമൂഹിക വികസന വകുപ്പ് മന്ത്രി ശൈഖ് നഹ്യാന്‍ ബിന്‍ മുബാറഖ് അല്‍ നഹ്യാനാണ് ഉദ്ഘാടനം ചെയ്തത്. 1,50,000 കിലോ ഭക്ഷ്യ വിഭവങ്ങള്‍ വിപണനം ചെയ്യാന്‍ സൗകര്യമുള്ള ഈ ചന്തയില്‍ പ്രാദേശിക കര്‍ഷകരുടെ ഉത്പന്നങ്ങള്‍ക്കാണ് പ്രാധാന്യം നല്കിയിട്ടുള്ളത്. ഒപ്പം ലോകത്തെ വിവിധ രാജ്യങ്ങളില്‍ നിന്നുള്ള പഴം, പച്ചക്കറി, മത്സ്യ മാംസ്യാദികളും ലഭ്യമാകും.
'ദി മാര്‍ക്കറ്റിന്റെ ' ഉദ്ഘാടനച്ചടങ്ങില്‍ ലുലു ഗ്രൂപ്പ് സി.ഇ.. സൈഫി രൂപാവാല ഉള്‍പ്പെടെയുള്ള പ്രമുഖര്‍ സംബന്ധിച്ചു .