സ്വകാര്യ ചാറ്റുകളും ചിത്രങ്ങളും സമൂഹമാധ്യമങ്ങളിലൂടെ പ്രചരിപ്പിക്കുന്നു; നേതൃത്വം നല്കുന്നത് രാഹുല് മാങ്കൂട്ടത്തിലിന്റെ വിശ്വസ്തന് ഫെന്നി നൈനാന്': ഗുരുതരമായ പരാതികളുമായി അതിജീവിത
രാഹുല് മാങ്കൂട്ടത്തിലിന്റെ വിശ്വസ്തന് ഫെന്നി നൈനാനും രാഹുല് അനുകൂലികളായ സൈബര് സംഘങ്ങള്ക്കും എതിരെ ഗുരുതരമായ പരാതികളുമായി മൂന്നാമത്തെ കേസിലെ അതിജീവിത. പ്രിയങ്ക ഗാന്ധി, ദീപാ ദാസ് മുന്ഷി, അല്ക്ക ലാംബ, ജെബി മേത്തര് എന്നിവര്ക്ക് ഇമെയില് വഴി പരാതി അയച്ചു. കേസുകള് കോടതിയുടെ പരിഗണനയിലിരിക്കെ, ഫെന്നി നൈനാന് ഉള്പ്പെടെയുള്ളവര് വ്യക്തിഹത്യ ചെയ്യാനും ഭീഷണിപ്പെടുത്താനും ശ്രമിക്കുകയാണെന്നു പരാതിയില് അതിജീവിത ആരോപിച്ചു. സൈബര് സെല്ലിനും ഉന്നത പൊലീസ് ഉദ്യോഗസ്ഥര്ക്കും അതിജീവിത പരാതി കൈമാറിയിട്ടുണ്ട്.
സ്വകാര്യ ചാറ്റുകളും ചിത്രങ്ങളും സമൂഹമാധ്യമങ്ങളിലൂടെ പ്രചരിപ്പിക്കുന്നു. ഇത് ഇരകളെ മാനസികമായി തകര്ക്കാനും കേസിനെ അട്ടിമറിക്കാനുമുള്ള ബോധപൂര്വമായ ശ്രമമാണെന്നാണ് പരാതിക്കാരി പറയുന്നത്. കോണ്ഗ്രസ് നേതൃത്വം രാഹുലിനെതിരെ പ്രതീകാത്മക നടപടി മാത്രമാണ് സ്വീകരിച്ചത്. ഇപ്പോഴും പാര്ട്ടി അനുഭാവികളായ സമൂഹമാധ്യമ ഹാന്ഡിലുകള് വഴി പ്രതിക്ക് അനുകൂലമായ പ്രചാരണങ്ങള് നടക്കുന്നുണ്ട്. വ്യാജ വോട്ടര് ഐഡി കേസില് പ്രതിയായ ഫെന്നി നൈനാന്, അതിജീവിതമാരെ മോശക്കാരായി ചിത്രീകരിക്കാനും അവരെ നിശബ്!ദരാക്കാനും നേതൃത്വം നല്കുന്നുവെന്നും പരാതിയില് പറയുന്നു.
കെഎസ്യു സംസ്ഥാന ജനറല് സെക്രട്ടറിയും തദ്ദേശ തിരഞ്ഞെടുപ്പില് കോണ്ഗ്രസ് സ്ഥാനാര്ഥിയായി മത്സരിക്കുകയും ചെയ്ത ഫെന്നിയുടെ പ്രവര്ത്തനങ്ങള് രാഷ്ട്രീയ സ്വാധീനമുള്ളവര്ക്ക് എന്തുമാകാമെന്ന തെറ്റായ സന്ദേശമാണ് സമൂഹത്തിനു നല്കുന്നത്. ഇതിലൂടെ വരാനിരിക്കുന്ന തലമുറയുടെ പോലും സുരക്ഷിതത്വം ഇല്ലാതാകുകയാണ്. അതിജീവിതമാരുടെ വ്യക്തിത്വം വെളിപ്പെടുത്തിയവര്ക്കെതിരെ നിയമനടപടി വേണം, കോടതിയുടെ പരിഗണനയിലുള്ള കാര്യങ്ങള് ഏകപക്ഷീയമായി ചര്ച്ച ചെയ്യുന്നതില് നിന്ന് പ്രതികളെയും അവരുടെ സംഘത്തെയും തടയണം, നീതിപൂര്വമായ വിചാരണ ഉറപ്പാക്കാന് അധികാരികള് ഇടപെടണം എന്നീ ആവശ്യങ്ങളും പരാതിക്കാരി ഉന്നയിച്ചു.
https://www.facebook.com/Malayalivartha
