മത്സ്യകന്യക ആകാന് ആഗ്രഹിച്ചു, ഇപ്പോള് അങ്ങനെ ആയി!
നഴ്സറിയില് പഠിച്ചുകൊണ്ടിരുന്നപ്പോള് ഭാവിയില് ആരാകണം എന്നാണ് ആഗ്രഹമെന്ന ചോദ്യത്തിന് കയ്റ്റ്ലിന് നീല്സണ് നിസംശയം ഉത്തരം പറഞ്ഞു: തനിക്ക് ഒരു മത്സ്യകന്യകയാകണം. അന്ന് കയ്റ്റ്ലിന്റെ ഉത്തരം കേട്ട് കൂട്ടുകാരെല്ലാം ചിരിച്ചു. എന്നാല്, വര്ഷങ്ങള്ക്കിപ്പുറം തന്റെ 32-ാം വയസില് മത്സ്യകന്യകയായി ജീവിക്കുകയാണ് കയ്റ്റ്ലിന്.
പകുതി സമയം മനുഷ്യനായും പകുതി സമയം മത്സ്യമായും ജീവിക്കുന്ന ഒരു കൂട്ടം ആളുകള് ഉള്പ്പെടുന്ന മെര് എന്ന സംഘടനയില് അംഗമാണ് അവര്. അമേരിക്കയില് സിയാറ്റിലില് മത്സ്യകന്യകമാര്ക്ക് വേണ്ടിയുള്ള വാലുകള് സിലിക്കോണ് ഉപയോഗിച്ച് രൂപകല്പന ചെയ്യുകയാണ് ഈ സംഘടനയുടെ പ്രധാന പ്രവര്ത്തനം. ഇങ്ങനെ നിര്മിക്കുന്ന വാലുകള് ധരിച്ച്, കഥകളില് കേട്ടിട്ടുള്ളതുപോലെയുള്ള മത്സ്യകന്യകയുടെ ചമയങ്ങളും അണിഞ്ഞ് സ്വിമ്മിംഗ് പൂളുകളിലും ബീച്ചുകളിലുമൊക്കെ നീന്തി നടക്കുകയാണ് ഇവരുടെ വിനോദം.
വിദേശരാജ്യങ്ങളില് പല പ്രമുഖ പരിപാടികളിലും വെള്ളത്തില് നീന്തിക്കളിക്കുന്ന മത്സ്യകന്യകകള് ഒരു പ്രധാന ആകര്ഷണമാണ്. മുപ്പതാമത്തെ വയസില് തന്റെ ജോലിപോലും ഉപേക്ഷിച്ച് ഒരു മുഴുവന് സമയ മത്സ്യകന്യകയായി ജീവിക്കുകയാണ് കയ്റ്റ്ലിന് ഇപ്പോള്. മറൈന് ബയോളജിസ്റ്റുകളായ മാതാപിതാക്കള് പറഞ്ഞുകൊടുത്ത കഥകളില് നിന്നാണ് കയ്റ്റ്ലിന് മത്സ്യകന്യകയുടെ കഥകള് ആദ്യമായി കേട്ടത്. പിന്നീട് ഡിസ്നി പുറത്തിറക്കിയ ലിറ്റില് മെര്മെയ്ഡ് എന്ന സിനിമകൂടി കണ്ടതോടെ അവള് തന്റെ ലക്ഷ്യം മനസില് ഒന്നുകൂടെ ഉറപ്പിച്ചു.
കോളജില് പഠിക്കുമ്പോള് സമാന ആഗ്രഹമുള്ള കൂട്ടുകാരെ പരിചയപ്പെട്ടത് അവളുടെ ജീവിതത്തില് വഴിത്തിരിവായി. ഈ കൂട്ടുകാര് ചേര്ന്നാണ് മെര് എന്ന ഗ്രൂപ്പ് തുടങ്ങിയത്. പിന്നീട് കയ്റ്റ്ലിന്റെ സ്ഥലമായ സിയാറ്റിലില് തന്നെ ഇത്തരം നിരവധി രഹസ്യ മെര്്മെയ്ഡ് ക്ലബ്ബുകള് ഉണ്ടെന്ന് മനസിലായി. ഇപ്പോള് ഇവരെല്ലാവരും വര്ഷത്തില് ഒരിക്കല് ഏതെങ്കിലും ജലാശയത്തില് ഒന്നിച്ചുചേരാറുണ്ട്.
മത്സ്യകന്യകമാരുടെ വാലുകള് നിര്മിക്കുകയാണ് മെര് എന്ന ഗ്രൂപ്പിലെ അംഗങ്ങളുടെ പ്രധാന ഹോബി. ഇത്തരത്തില് ഒരു വാലിന് 3,500 ഡോളര് വരെ വില ലഭിക്കുന്നു. സിലിക്കോണ് ഉപയോഗിച്ച് നിര്മിക്കുന്ന ഈ വാലുകള് ധരിച്ചാല് എളുപ്പത്തില് വെള്ളത്തില് നീന്താനാകും. മത്സ്യകന്യകയുടെ വാല് ധരിച്ചാല് താന് മറ്റൊരു ലോകത്ത് ചെല്ലുന്ന അനുഭവമാണുണ്ടാകുന്നതെന്ന് കയ്റ്റ്ലിന് പറയുന്നു. മത്സ്യകന്യകയുടെ വേഷം ധരിച്ച് പ്രദര്ശനങ്ങളിലും മറ്റും പങ്കെടുത്താണ് ഇക്കൂട്ടര് ജീവിക്കാനുള്ള വരുമാനം കണ്ടെത്തുന്നത്. ആദ്യം എതിര്ത്തെങ്കിലും ഭര്ത്താവും മാതാപിതാക്കളും അടങ്ങുന്ന കുടുംബം ഇപ്പോള് കയ്റ്റ്ലിന് എല്ലാ പിന്തുണയും നല്കുന്നുണ്ട്.
https://www.facebook.com/Malayalivartha
