പ്രളയം, ഒറ്റപ്പെടല്, വിശപ്പ്, കുടിവെള്ളമില്ലായ്മ തുടങ്ങിയ നിരാശകള്ക്കിടയിലും കരുണാമയന്റെ കരുതലിന്റെ ശുഭസൂചനയുമായി ഭൂമിയിലെത്തിയത് രണ്ട് പുതുജീവന്!
മഹാപ്രളയം ദുരന്തം വിതച്ചപ്പോള് പകച്ചുപോയ ജനതയ്ക്ക് പ്രതീക്ഷയുടെ പൊന്നാളമായി രണ്ടു പിറവികള്! ആലുവയില് നാവികസേനാ ഹെലികോപ്റ്ററില് രക്ഷിച്ച് ആശുപത്രിയിലെത്തിച്ച യുവതിയും അങ്കമാലിയില് വെള്ളത്താല് ചുറ്റപ്പെട്ട വീടിനുള്ളില് അകപ്പെട്ട യുവതിയും ഇന്നലെ അമ്മമാരായി രണ്ടും ആണ്കുഞ്ഞുങ്ങള്.
ആലുവയില് കെട്ടിടത്തിനു മുകളിലാണു പൂര്ണഗര്ഭിണിയായ സാജിദ ജബീല് (25) കുടുങ്ങിയത്. നാവികസേനാ ഹെലികോപ്റ്ററിലേക്കു ബെല്റ്റില് കെട്ടി സാജിദയെ ഉയര്ത്തിയെടുത്തു. രാവിലെ ഒന്പതരയോടെ നാവികസേനയുടെ സഞ്ജീവനി ആശുപത്രിയിലെത്തിച്ച സാജിദ ഉച്ചയ്ക്ക് 2.12നു പ്രസവിച്ചു.
മലയാളിയായ വിജയ് വര്മയാണ് കോപ്റ്റര് പറത്തിയത്. സാജിദയ്ക്കു സഹായവുമായി ഒപ്പമുണ്ടായിരുന്നത് സര്ജന് ലഫ്.കമാന്ഡര് തമന്ന വൈ.ഷേണായ്, ഡോ.ലഫ്.അമോദ് എസ്.ധാഗെ, മിലിട്ടറി നഴ്സ് ലഫ്.കേണല് സിമി നായര് എന്നിവരാണ്. അമ്മയും കുഞ്ഞും സുഖമായിരിക്കുന്നു.
അങ്കമാലി പാലയ്ക്കല് വീട്ടില് മാര്ട്ടിന്റെ ഭാര്യ പറവൂര് ആലങ്ങാട് നീറിക്കോട് കൊടുവഴങ്ങ കൈതാരന് വീട്ടില് നീതു മാര്ട്ടിന് (26) ഇന്നലെ രാവിലെ 10.40-ന് ആണ് ആണ്കുഞ്ഞിനു ജന്മംനല്കിയത്.
കളമശേരി മെഡിക്കല് കോളജിലെ ഡോ.റെജിയുടെ നേതൃത്വത്തിലുള്ള സംഘം വെള്ളത്താല് ചുറ്റപ്പെട്ട നീതുവിന്റെ വീട്ടിലേക്ക് എത്തിയത് കൂനമ്മാവ് നീറിക്കോട് പീടികപ്പടി സെന്റ് സെബാസ്റ്റ്യന്സ് പള്ളി പാരിഷ് ഹാളിലെ ദുരിതാശ്വാസ ക്യാംപില്നിന്നാണ്. മെഡിക്കല് വിദ്യാര്ഥിനി ബെന്സി, കരുമാലൂര് പ്രാഥമികാരോഗ്യകേന്ദ്രം ജൂനിയര് ഹെല്ത്ത് നഴ്സ് ലിസമ്മ എന്നിവര്ക്കൊപ്പം ആശാ പ്രവര്ത്തകരുമുണ്ടായിരുന്നു. നാട്ടുകാരും സന്നദ്ധപ്രവര്ത്തകരുമാണ് വൈദ്യസംഘത്തെ വഞ്ചിയില് വീട്ടിലെത്തിച്ചത്.
https://www.facebook.com/Malayalivartha