ദുരിതാശ്വാസക്യാമ്പില്‍ എത്തിയെങ്കിലും, ആ അമ്മയ്ക്ക് ആശ്വാസം ഇനിയും അകലെ! അടുത്ത സംഘത്തോടൊപ്പം എത്തിക്കാമെന്ന് പറഞ്ഞിരുന്ന രണ്ടു വയസ്സുള്ള കുഞ്ഞ് ഇതുവരെ എത്തിയില്ല!
രക്ഷപെട്ടെത്തിയെങ്കിലും പലരുടെയും മനസ്സ് സ്വസ്ഥമാകുന്നില്ല. പലര്‍ക്കും ഇനി പൂജ്യത്തില്‍ നിന്നും ജീവിതം തുടങ്ങണം. ഇന്നോളം പരിചയമില്ലാത്ത മഹാപ്രളയം സൃഷ്ടിച്ച ഭീതി ആളുകളില്‍ നിന്നും വിട്ടൊഴിയുന്നില്ല. പലരും മരണത്തെ മുഖാമുഖം കണ്ട് രക്ഷപെട്ടെത്തിയവരാണ്.
രണ്ടു വയസ്സുള്ള കുഞ്ഞിനെ കാത്തിരിക്കുകയാണ് കൊച്ചിയിലെ നാവികസേനാ ആസ്ഥാനത്ത് പ്രവര്‍ത്തിക്കുന്ന ദുരിതാശ്വാസ ക്യാമ്പില്‍ രക്ഷപെട്ടെത്തിയ ഒരമ്മ. ''കുഞ്ഞിനെ അടുത്ത സംഘത്തോടൊപ്പം എത്തിക്കുമെന്നാണ് എന്നോട് പറഞ്ഞത്. ഭര്‍ത്താവ് തമിഴ്‌നാട്ടിലാണ്, ഇങ്ങോട്ട് ഇപ്പോള്‍ വരേണ്ടന്ന് പറഞ്ഞിട്ടുണ്ട്. നേവി ഉദ്യോഗസ്ഥരെ വിവരമറിയിച്ചിട്ടുണ്ട്'', കുഞ്ഞിനെയോര്‍ത്തുള്ള ആധി വിട്ടുമാറുന്നില്ല ഈ സ്ത്രീക്ക്.
മുട്ടുവരെയൊക്കെയേ വെള്ളം കയറൂ എന്നാണ് ആദ്യം കരുതിയത്. എന്നാല്‍ പെട്ടെന്ന് അവസ്ഥ മാറുകയായിരുന്നുവെന്ന് ആറന്‍മുള എഞ്ചിനീയറിങ്ങ് കോളേജില്‍ നിന്നും രക്ഷപെട്ടത്തിയ വിദ്യാര്‍ത്ഥികള്‍ പറയുന്നു.
350-ഓളം ആളുകളാണ് ഇപ്പോള്‍ ഈ ക്യാമ്പിലുള്ളത്. രക്ഷപെട്ടെത്തിയ ചിലര്‍ ബന്ധുവീടുകളിലേക്ക് പോയി.എയര്‍ലിഫ്റ്റിലൂടെയായിരുന്നു ഇവരെ രക്ഷപെടുത്തിയത്.
https://www.facebook.com/Malayalivartha
