കടത്തിണ്ണയില് കഴിഞ്ഞിരുന്ന ദമ്പതികള്ക്ക് ദുരിതാശ്വാസ ക്യാംപില് അഭയം
കടത്തിണ്ണയില് മഴയും കാറ്റുമേറ്റു കൊടുംതണുപ്പില് അന്തിയുറങ്ങിയിരുന്ന ദമ്പതികള്ക്കു ദുരിതാശ്വാസ ക്യാംപില് അഭയം.
കോലഞ്ചേരി സ്വദേശി രാജേന്ദ്രന് (72), ഭാര്യ ഭാഗ്യം (68) എന്നിവരെയാണ് നാലുദിവസം മുന്പ് തൊടുപുഴ പൊലീസ് ഇടപെട്ടു തൊടുപുഴ സരസ്വതി സ്കൂളില് ആരംഭിച്ചിരിക്കുന്ന ദുരിതാശ്വാസ ക്യാംപില് എത്തിച്ചത്.
ഇവര് മൂന്നുമാസത്തോളമായി മാതാ ഷോപ്പിങ് ആര്ക്കേഡിനു സമീപമുള്ള കെട്ടിടത്തിന്റെ തിണ്ണയിലാണു രാത്രി അന്തിയുറങ്ങിയിരുന്നത്.
രോഗിയായ രാജേന്ദ്രന് ചെറിയ ജോലികള് ചെയ്തു ലഭിക്കുന്ന തുച്ഛമായ വരുമാനംകൊണ്ടാണ് ഇവര് ഉപജീവനം നടത്തിയിരുന്നത്.
അതിനിടെ ഭാര്യ ഭാഗ്യത്തിനു വാഹനാപകടത്തില് കാല്മുട്ടിനു പരുക്കേറ്റു നടക്കാനാകാത്ത സ്ഥിതിയായി. ഈയിടെ രാജേന്ദ്രന് പനിപിടിച്ചു കിടപ്പിലുമായി.
ഇവര് കടത്തിണ്ണയില് മഴയും കാറ്റും ഏറ്റു തണുത്തുവിറങ്ങലിച്ചു ദുരിതാവസ്ഥയില് കിടക്കുന്നതു കണ്ട പൊലീസുകാരാണ് ഇവരെ അവിടെനിന്നു മാറ്റി ദുരിതാശ്വാസ ക്യാംപില് എത്തിച്ചത്.
തീരെ അവശനിലയിലായ ഭാഗ്യത്തിന് ദുരിതാശ്വാസ ക്യാംപില് എത്തുന്ന ഡോക്ടര്മാര് നല്കുന്ന മരുന്നും സമയത്തു ഭക്ഷണവും നല്കാന് തുടങ്ങിയതില് പിന്നെയാണ് ഇവര്ക്ക് അല്പമെങ്കിലും സംസാരിക്കാന്പോലുമായതെന്ന് ക്യാംപിന്റെ കണ്വീനറും വാര്ഡ് കൗണ്സിലറുമായ ടി.കെ.സുധാകരന് നായര് പറഞ്ഞു.
രണ്ട് ആണ്മക്കളും ഒരു മകളും തങ്ങള്ക്ക് ഉണ്ടെങ്കിലും ഇവരാരും തിരിഞ്ഞുനോക്കാത്തതിനാലാണ് തൂമ്പാപ്പണിയുമായി ഇറങ്ങിയതെന്ന് രാജേന്ദ്രന് പറഞ്ഞു. 35 പേരുള്ള ക്യാംപില് ഇവര്ക്ക് പ്രത്യേക പരിചരണമാണ് നല്കുന്നത്. സ്കൂളിലെ ക്യാംപ് പിരിച്ചുവിടുമ്പോള് ഇവരെ എവിടേക്കു മാറ്റുമെന്ന ആശങ്കയിലാണ് അധികൃതര്. ഇവരെ വയോജനകേന്ദ്രത്തിലാക്കാനാണ് അധികൃതരുടെ തീരുമാനം.
https://www.facebook.com/Malayalivartha