അടുത്തിടെ സോഷ്യല്‍ മീഡിയയുടെ വ്യാപക ശ്രദ്ധനേടിയ ഒരു ചിത്രമാണ് വൃദ്ധസദനത്തില്‍ മുത്തശ്ശിയെ കണ്ടതിന്റെ വേദനയില്‍ വിതുമ്പിക്കരയുന്ന സ്‌കൂള്‍ വിദ്യാര്‍ത്ഥിനിയായ കൊച്ചുമകളുടെ ചിത്രം.

സ്‌കൂളില്‍ നിന്നും സഹപാഠികള്‍ക്കൊപ്പം വൃദ്ധസദനസന്ദര്‍ശനത്തിനെത്തിയ വിദ്യാര്‍ഥിനി അവിടെ വച്ച് തന്റെ മുത്തശിയെ കാണുമ്പോള്‍ ഇരുവരും തമ്മിലുണ്ടായ വികാരനിര്‍ഭരമായ നിമിഷത്തിന്റെ ചിത്രം എന്ന നിലയിലാണ് സോഷ്യല്‍ മീഡിയയില്‍ വ്യാപകമായി പ്രചരിച്ചിരുന്നത്.

ഈ ചിത്രത്തിനെ കുറിച്ച് പ്രചരിച്ച വാര്‍ത്തകളിങ്ങനെയായിരുന്നു. മുത്തശി ബന്ധുക്കള്‍ക്കൊപ്പം മറ്റൊരു വീട്ടിലാണെന്നായിരുന്നുവത്രേ മാതാപിതാക്കള്‍ ഭക്തി എന്ന ആ കൊച്ചുമകളോട് പറഞ്ഞിരുന്നത്. അങ്ങനെ തന്നെയായിരുന്നു ഭക്തിയും വിശ്വസിച്ചിരുന്നത്. എന്നാല്‍ വൃദ്ധസദനത്തില്‍ വച്ച് കൊച്ചുമകളും മുത്തശിയും അപ്രതീക്ഷിതമായി കണ്ടപ്പോള്‍ ഇരുവര്‍ക്കും വിതുമ്പല്‍ അടക്കാനായില്ല. ഈ നിമിഷമാണ് ഫോട്ടോഗ്രാഫര്‍ പകര്‍ത്തിയത് എന്നാണ് പ്രചരിച്ച കഥകള്‍.

എന്നാല്‍ ആ ചിത്രവുമായി ബന്ധപ്പെട്ട സത്യങ്ങള്‍ മറ്റൊന്നായിരുന്നു. ബിബിസിക്ക് അനുവദിച്ച അഭിമുഖത്തില്‍ പതിനൊന്നു വര്‍ഷങ്ങള്‍ പഴക്കമുള്ള ആ ചിത്രത്തിന്റെ കഥ ദമയന്തി ബെന്‍ എന്ന ആ മുത്തശ്ശി പറഞ്ഞു.

2007-ല്‍ ലോക ഫോട്ടോഗ്രഫി ദിനത്തിന്റെ ഭാഗമായി, തങ്ങളുടെ കരിയറിലെ മനോഹരചിത്രങ്ങള്‍ മല്‍സരത്തിന് അയയ്ക്കാന്‍ ആഗ്രഹമുള്ളവര്‍ അത് സമര്‍പ്പിക്കണമെന്ന് ബിബിസി ഗുജറാത്തി പരസ്യം ചെയ്തതിനെ തുടര്‍ന്ന്, സീനിയര്‍ ഫോട്ടോ ജേര്‍ണലിസ്റ്റ് ആയ കല്‍പേഷ് ഭാറേച് താന്‍ മുമ്പ് എടുത്ത ഈ ചിത്രം മല്‍സരത്തിന് അയയ്ക്കുകയായിരുന്നു. അദ്ദേഹം പകര്‍ത്തിയ ഈ ചിത്രത്തിലുണ്ടായിരുന്നത് ദമയന്തി ബെന്നും കൊച്ചുമകള്‍ ഭക്തിയുമായിരുന്നു.

ഈ ചിത്രം ഈയിടെ പുറത്തുവന്നപ്പോള്‍ കുടുംബങ്ങളിലെ മൂല്യച്യുതിയെ കുറിച്ച് ആശങ്കപ്പെട്ടുകൊണ്ടൊക്കെ ധാരാളം പേര്‍ കമന്റ് ചെയ്തിരുന്നു.

എന്നാല്‍ ആ കഥകളില്‍ പറയുന്നതു പോലെ ആരും ദമയന്തിയെ വൃദ്ധസദനത്തില്‍ കൊണ്ടുവിട്ടതല്ല. അവിടേക്കു പോയത് ദമയന്തിയുടെ സ്വന്തം തീരുമാനമായിരുന്നു. മാത്രമല്ല ഇതിനു വിശദീകരണം നല്‍കി ദമയന്തി തന്നെ രംഗത്തെത്തിയിരുന്നു.

മുത്തശി വൃദ്ധസദനത്തിലാണെന്ന് അറിയാമായിരുന്നുവെങ്കിലും ഏത് സ്ഥലത്തുള്ള വൃദ്ധസദനത്തിലാണെന്ന് അറിയിവുണ്ടായിരുന്നില്ലെന്ന് ഭക്തി പറഞ്ഞു. പ്രതീക്ഷിച്ചിരിക്കാതെ പെട്ടെന്ന് മുത്തശിയെ കണ്ടതുകൊണ്ടാണ് കരഞ്ഞു പോയതെന്നും ഭക്തി പറഞ്ഞു. ഇനിയും വൃദ്ധസദനത്തില്‍ തന്നെ ജീവിതം തുടരാനാണ് ദമയന്തി ബെന്നിന്റെ തീരുമാനം.