ചൈനയിലൊട്ടാകെ ഒരു താരപരിവേഷമാണ് കായ് എന്ന യുവാവിനുള്ളത്. കാരണം 33-വയസുകാരനായ കായ് യാന്‍ക്വി കഴിഞ്ഞ മൂന്നു വര്‍ഷങ്ങളായി ചൈനയിലെ വിവിധ ഭാഗങ്ങളിലൂടെ സഞ്ചരിച്ച് അനാഥരായ ആളുകളെ കണ്ടെത്തി അവരെ തിരികെ വീടുകളിലെത്തിക്കുവാന്‍ സഹായിക്കുകയാണ്. വീടും നാടും ഉപേക്ഷിച്ച് തെരുവില്‍ അലഞ്ഞ് തിരിഞ്ഞു നടക്കുന്നവരെ തിരികെ ബന്ധുക്കളുടെ അടുക്കലെത്തിക്കാന്‍ തന്റെ സമയം നീക്കി വച്ചിരിക്കയാണ് ഈ ചൈനീസ് യുവാവ്.

വര്‍ഷങ്ങള്‍ക്കു മുമ്പ് കായ്യുടെ അപസ്മാര രോഗിയായ സഹോദരനെ വീട്ടില്‍ നിന്നും കാണാതായിരുന്നു. മൂന്നു നാളുകള്‍ക്കു ശേഷമാണ് ഇദ്ദേഹത്തെ കണ്ടെത്തുവാനായത്. ഈ മൂന്നു നാളുകള്‍ അദ്ദേഹവും മറ്റ് കുടുംബാംഗങ്ങളും അദ്ദേഹത്തെ കാണാതായതില്‍ അനുഭവിച്ച വിഷമം ചെറുതൊന്നുമായിരുന്നില്ല. തനിക്കും കുടുംബാംഗങ്ങള്‍ക്കുമുണ്ടായ അവസ്ഥ മറ്റൊരാള്‍ക്കും ഉണ്ടാകാതിരിക്കുവാനാണ് താന്‍ അനാഥരായ ആളുകളെ കണ്ടെത്തി അവരുടെ കുടുംബാംഗങ്ങളുടെ കൈകളില്‍ അവരെ തിരികെ ഏല്‍പ്പിക്കുവാനുള്ള പരിശ്രമം ആരംഭിച്ചതെന്ന് കായ് പറയുന്നു.

മൂന്നു വര്‍ഷങ്ങള്‍ക്കു മുമ്പ് ഒരു വാഹനം വാങ്ങിയ കായ്, കിടക്കയുള്‍പ്പടെയുള്ള അവശ്യസാധനങ്ങളുമായി തന്റെ വീടു വിടുകയും തെരുവില്‍ അലഞ്ഞു തിരിഞ്ഞു നടക്കുന്നവരെ കണ്ടെത്തി ശുശ്രൂഷിച്ചതിനു ശേഷം അവരെ തിരികെ വീടുകളിലെത്തിക്കുകയും ചെയ്യുന്നത് ആരംഭിക്കുകയായിരുന്നു. ഈ പരിശ്രമത്തിന്റെ ഭാഗമായി ചൈനയില്‍ കൂടി ഏകദേശം 90,000 കിലോമീറ്റര്‍ ദൂരം കായ് സഞ്ചരിച്ച് തെരുവില്‍ അലഞ്ഞു നടന്ന ഏകദേശം 50-തിലധികം ആളുകളെ തിരികെ അവരുടെ വീടുകളിലെത്തിക്കുകയും ചെയ്തു.

തെരുവില്‍ കണ്ടെത്തുന്ന ഓരോ വ്യക്തിയും വീട് വിട്ട് അലയുന്നതിന്റെ കാരണം വ്യത്യസ്തമായിരിക്കുമെന്നാണ് കായ് പറയുന്നത്. ചിലര്‍ തിരികെ വീടുകളില്‍ പോകുവാന്‍ പോലും താത്പര്യം കാട്ടാറില്ലെന്നും അദ്ദേഹം വ്യക്തമാക്കി. അനാഥരായി കണ്ടെത്തുന്നയാളുകളുടെ വിശ്വാസം നേടിയെടുക്കുക എന്നതാണ് ഏറ്റവും ബുദ്ധിമുട്ടുള്ള കാര്യമെന്ന് കായ് പറയുന്നു. കാരണം തെരുവിലുള്ള ആളുകളുടെ അടുക്കലെത്തുന്നവര്‍ അവരെ പല രീതിയിലും ചൂഷണം ചെയ്യാറുണ്ട്. അത്തരമൊരു സാഹചര്യത്തില്‍ നമ്മള്‍ സഹായിക്കാന്‍ സമീപിച്ചാല്‍ പോലും അവര്‍ സഹകരിക്കണമെന്നില്ലന്ന് അദ്ദേഹം പറഞ്ഞു. വീടുകളില്‍ തിരികെ പോകുവാന്‍ താത്പര്യമില്ലാത്തവര്‍ക്ക് മോശമല്ലാത്ത ജീവിതസാഹചര്യമൊരുക്കി നല്‍കുന്നയാളാണ് കായ്. മാത്രമല്ല അവര്‍ക്ക് ഭക്ഷണവും നല്ല വസ്ത്രവും കായ് നല്‍കുന്നു.

അനാഥരായവരെ ഒരാളെ പോലും തെരുവില്‍ കണ്ടെത്താത്ത ഒരു ദിവസം എത്തുമ്പോള്‍ മാത്രമേ താന്‍ ഈ പ്രവൃത്തി അവസാനിപ്പിക്കുകയുള്ളു എന്നാണ് കായ് പറയുന്നത്. അന്ന് താന്‍ വീട്ടിലേക്ക് തിരികെ മടങ്ങുമെന്നും അദ്ദേഹം വ്യക്തമാക്കി. കുടുംബത്തില്‍ നിന്നും എല്ലാവിധത്തിലുമുള്ള സഹായവും കായ്ക്ക് ലഭിക്കുന്നുണ്ട്. തന്റെ വാഹനത്തിലാണ് കായ് നാളുകളായി ഉറങ്ങുന്നത്. തന്റെ പ്രവൃത്തികൊണ്ട് ചൈനയിലെ സാമൂഹ്യമാധ്യമങ്ങളില്‍ താരമായ കായെയെ ലക്ഷക്കണക്കിനാളുകള്‍ ഒരു ആരാധനാപാത്രമായാണ് കരുതുന്നത്.

ഇവര്‍ നല്‍കുന്ന പണവും മറ്റും ഉപയോഗിച്ചാണ് കായ് തന്റെ പ്രവൃത്തി മുമ്പോട്ടു കൊണ്ടുപോകുന്നത്. മാത്രമല്ല പല ബിസിനസ് സ്ഥാപനങ്ങളും കായ്ക്ക് പണം നല്‍കുവാനായി സമീപിച്ചിരുന്നുവെങ്കിലും ഇതെല്ലാം വേണ്ടന്നു വച്ച കായ് പറയുന്നത് ഇങ്ങനെയാണ്, ആവശ്യമുള്ള പണം എനിക്ക് ലഭിക്കുന്നുണ്ട് അതില്‍ കൂടുതല്‍ ഒന്നും ഞാന്‍ ആഗ്രഹിക്കുന്നില്ല!