മാഷ എന്ന നായ യജമാനനായി ഇന്നും കാത്തിരിക്കുന്നു
ഇനി ഒരിക്കലും തിരിച്ചുവരാത്ത തന്റെ സ്വന്തം യജമാനനെ രണ്ടു വര്‍ഷമായി കാത്തിരിക്കുകയാണ് മാഷ. നായ്ക്കളുടെ യജമാന ഭക്തി എന്നും പേരുകേട്ടതാണ്. യജമാന ഭക്തിയില്‍ പല വീരസാഹസികതകളും നായ്ക്കള്‍ കാണിക്കാറുമുണ്ട്. എന്നാല്‍ മാഷയുടെ കഥ ഇതില്‍ നിന്നെല്ലാം വ്യത്യസ്തമാണ്. ബ്രൗണ്‍ നിറത്തിലുളള ഒരു സുന്ദരി പട്ടിക്കുട്ടിയാണ് ഇവള്‍
സൈബീരിയയില്‍ ഏറെ ചര്‍ച്ചചെയ്യപ്പെടുന്ന ഒരു പേരാണ് മാഷയുടേത്. കഴിഞ്ഞ രണ്ടുവര്‍ഷത്തോളമായി സൈബീരിയയിലെ ഒരു ആശുപത്രിയില്‍ തിരിച്ചുവരാത്ത തന്റെ യജമാനനായി കാത്തിരിക്കുകയാണ് ഈ പാവം നായക്കുട്ടി!
നൊവൊസിബിര്‍സ്‌ക് ജില്ലാ ആശുപത്രിയില്‍ മാസങ്ങളായി എല്ലാ ദിവസവും ആദ്യ സന്ദര്‍ശകയായി എത്തുന്നത് മാഷയാണ്. മാഷയുടെ ഉടമ രണ്ട് വര്‍ഷം മുന്‍പ് ഈ ആശുപത്രിയില്‍ വച്ചാണ് മരിച്ചത്. ദൂച്ചി ഗ്രാമത്തില്‍ നിന്നുളള പെന്‍ഷന്‍പറ്റിയ ആളായിരുന്നു ഉടമ. ആശുപത്രിയില്‍ കിടന്ന കാലം മുഴുവന്‍ മാഷ മാത്രമായിരുന്നു അദ്ദേഹത്തിനുളള ഏക സന്ദര്‍ശക. രാത്രി വീടു കാവലിനായി പോകുന്ന മാഷ പകല്‍ മുഴുവന്‍ ഉടമക്കൊപ്പം ആശുപത്രിയിലായിരുന്നു.
ആര്‍ക്കും ഉപദ്രവമില്ലാത്ത, ശാന്തയായ മാഷ തന്റെ ഉടമ തിരികെയെത്തുമെന്നുകരുതിയാവും ദിവസവും ആശുപത്രിയിലെത്തുന്നത്. അവള്‍ക്ക് പോകാന്‍ പ്രത്യേകിച്ച് മറ്റിടങ്ങളില്ല താനും.
ആശുപത്രി ജീവനക്കാര്‍ ഇവള്‍ക്കായി പ്രത്യേകം കിടക്ക നല്‍കിയിട്ടുണ്ട്. ആഹാരവും യഥാസമയം നല്‍കും. അതിനിടെ മാഷയെ ദത്തെടുക്കാന്‍ ഒരു കുടുംബം നടത്തിയ ശ്രമം അമ്പേ പരാജയപ്പെട്ടു. ഒരു വെളളിയാഴ്ച വൈകിട്ട് അവര്‍ മാഷയെ കൂട്ടിക്കൊണ്ടുപോയി. എന്നാല്‍ ശനിയാഴ്ച രാവിലെ പതിവുപോലെ അവള്‍ തന്റെ യജമാനനെ തിരക്കി ആശുപത്രിയിലെത്തി!
മാഷയുടെ ഈ യജമാന സ്‌നേഹം കാരണം അവള്‍ക്ക് ഒരു വിളിപ്പേരു കൂടി ലഭിച്ചിട്ടുണ്ട്\'റഷ്യയുടെ സ്വന്തം ഹാച്ചിക്കൊ\'. ജപ്പാനില്‍ യജമാനനെ തേടി 10 വര്‍ഷം ഒരു റെയില്‍വെ സ്‌റ്റേഷനില്‍ കാത്തുനിന്ന നായയുടെ പേരാണ് ഹാച്ചിക്കൊ
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
