മക്കളെ വളര്‍ത്താന്‍ വേണ്ടിയൊരമ്മ അലയുകയാണ്. എവിടെ ജീവിക്കണം എങ്ങനെ ജീവിക്കണമെന്നറിയാതെ ജീവിതത്തിന് മുന്നില്‍ പകച്ച് നില്‍ക്കുകയാണിവര്‍. വിശന്ന് കരയുന്ന കുഞ്ഞുങ്ങള്‍ക്ക് റെയില്‍വേസ്റ്റേഷന്‍ പ്‌ളാറ്റ്ഫോമിലെ വെള്ളവും അഞ്ചുരൂപയുടെ ബിസ്‌ക്കറ്റും കൊടുത്ത് അവര്‍ക്കുമുന്നില്‍ പൊട്ടിക്കരയാന്‍ മാത്രം വിധിച്ച ഈ അമ്മയുടെ ഗതി ആര്‍ക്കും വരരുതേ എന്ന് പ്രാര്‍ഥിക്കാം.
2008ല്‍ അമ്മ മരിച്ചതോടെയാണ് ലതയുടെ ദുരിതജീവിതം തുടങ്ങുന്നത്. അമ്മയുടെ ചികില്‍സയ്ക്കും മറ്റുമായി ആകെയുണ്ടായിരുന്ന വീടും സ്ഥലവും ഇവര്‍ക്കു വില്‍ക്കേണ്ടി വന്നു. ചെലവിനും മറ്റും കൊടുക്കാതെ ഭര്‍ത്താവ് ഉപേക്ഷിച്ചതോടെ ലതയും മക്കളും ഒറ്റപ്പെട്ടു. ഇതുമുതലാക്കി അടുത്തുകൂടിയ ബന്ധു വഞ്ചിക്കുക കൂടി ചെയ്തതോടെ ദുരിതകഥ പൂര്‍ണമായി. നാലു മക്കളാണ് ഇവര്‍ക്ക്. ശ്രീരാഗും അനുരാഗും പ്ലസ് വണ്‍ വിദ്യാര്‍ഥികളാണ്. ഏഴാം ക്ലാസുകാരി ശ്രീലക്ഷ്മിയുടെയും അഞ്ചാം ക്ലാസുകാരി രഞ്ജിമയുടെയും കാര്യത്തിലാണു ലതയ്ക്ക് ആധി.
ഈ പെണ്‍കുട്ടികള്‍ക്കായി അടച്ചുറപ്പുള്ള ഒരു വീടെന്ന സ്വപ്നത്തിനു വേണ്ടിയാണു ലതയുടെ അലച്ചില്‍. നേരത്തേ താമസിച്ചിടത്തു നിന്ന് ഇറക്കിവിട്ടപ്പോള്‍ പെണ്‍മക്കളെയും ചേര്‍ത്തുപിടിച്ചു റയില്‍വേ വരാന്തയില്‍ അഭയം പ്രാപിച്ചു. പക്ഷേ ചൂഴ്ന്ന് നോട്ടവും അസഭ്യം പറച്ചിലിനും ഈ പെണ്‍മനസ് പതറിയപ്പോള്‍ ആണ്‍മക്കളെ കൂട്ടിനിരുത്തി ഈ അമ്മ പെണ്‍മക്കള്‍ക്ക് കാവലിരുന്നു. അങ്ങനെ ഇത്ര ദിവസങ്ങള്‍. ഭക്ഷണം വാങ്ങിനല്‍കാന്‍ കഴിയാതെ, ആണ്‍മക്കള്‍ക്കു മുന്നില്‍ സങ്കടക്കണ്ണീരൊഴുക്കി. ഇനിയുമെത്രനാള്‍ എന്നറിയാതെ, തളര്‍ന്ന മനസ്സുമായി സഹായം തേടി അലയുകയാണു കുശാല്‍നഗര്‍ വാടക ക്വാര്‍ട്ടേഴ്‌സിലെ സി.ലതയെന്ന നാല്‍പ്പത്തി മൂന്നുകാരി. രണ്ടുമാസമായി വാടക നല്‍കാത്തതിനാല്‍ ഇവിടെ നിന്നും ഏതുനിമിഷവും ഇറങ്ങേണ്ടി വന്നേക്കാം.
ഭൂരഹിതരില്ലാത്ത കേരളം പദ്ധതിയില്‍ സര്‍ക്കാര്‍ നല്‍കിയ അഞ്ചു സെന്റു സ്ഥലമാണ് ആകെയുള്ളത്. ഇതാവട്ടെ ബല്ലാ അത്തിക്കോത്തെ പാറപ്പുറത്തും. ഇവിടെ വീടുനിര്‍മിക്കുകയെന്നത് ശ്രമകരമാണ്. നഗരസഭ കുറച്ചു പണം അനുവദിച്ചെങ്കിലും ഉപഭോക്തൃ വിഹിതമായി 25,000 രൂപ ആദ്യം നല്‍കണമെന്നാണ് അധികൃതര്‍ പറയുന്നത്. മക്കള്‍ക്കു ഭക്ഷണം വാങ്ങി നല്‍കാന്‍പോലും കഷ്ടപ്പെടുമ്പോള്‍ ഈ തുക എങ്ങനെ കണ്ടെത്തണമെന്ന് ലതയ്ക്കറിയില്ല. സ്വകാര്യ സ്‌കൂള്‍ ബസില്‍ ആയയായി ജോലി ചെയ്തു കിട്ടിയിരുന്ന 2500 രൂപയായിരുന്നു ഏക വരുമാനം. ഇപ്പോള്‍ ആ ജോലിയും നഷ്ടമായി. പട്ടിണികിടന്നാലും പെണ്‍മക്കളെ സുരക്ഷിതമായി പാര്‍പ്പിക്കാന്‍ ഒരിടം എന്നതുമാത്രമാണ് ഇപ്പോള്‍ ഇവരുടെ പ്രാര്‍ഥന.
സിന്‍ഡിക്കറ്റ് ബാങ്കിന്റെ ഉദുമ ബ്രാഞ്ചിലെ ലതയുടെ അക്കൗണ്ട് നമ്പര്‍- 42262200149739. ഐഎഫ്എസ് കോഡ്- 0004226 ലതയുടെ ഫോണ്‍: 9947717603.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha