ഇംഗ്ലണ്ടിലെ സെന്‍ട്ല്‍ ലാങ്കഷയര്‍ സര്‍വ്വകലാശാല വിദ്യാര്‍ത്ഥിനിയായ ഡൊമനിക്ക് ഹാരിസണ്‍ എന്ന ഇരുപത്തിരണ്ടുകാരി ഇക്കഴിഞ്ഞ ഡിസംബര്‍ നാലിന് രാത്രിയാഘോഷങ്ങളൊക്കെ കഴിഞ്ഞ് തിരികെ വീട്ടിലെത്താന്‍ ടാക്‌സിക്കായി കാത്തു നില്‍ക്കുമ്പോഴാണ് തന്റെ ബാങ്ക്കാര്‍ഡുകളൊക്കെ നഷ്ടപ്പെട്ടെന്ന് മനസ്സിലായത്.
അപ്പോഴാണ് കാശൊന്നും കൈയ്യിലില്ലാതെ വിഷമിച്ചു നില്‍ക്കുന്ന ഡൊമിനിക്കിന്റെ അടുത്തേയ്ക്ക് തെരുവില്‍ കഴിയുന്ന റോബി എത്തിയത്. അയാളുടെ കൈയ്യിലാകെയുളളത് 3 പൗണ്ടിന്റെ ചില്ലറമാത്രമാണ്. അത് അയാള്‍ അവള്‍ക്കുനേരെ നീട്ടിക്കൊണ്ടു പറഞ്ഞു, വേഗം ടാക്‌സി പിടിച്ചു വീട്ടിലെത്തു ഈ പണം ടാക്‌സിക്കു കൊടുക്കാന്‍ വച്ചോളൂ എന്ന്. വീട്ടിലെത്തിയാല്‍ ടാക്‌സിക്ക് കൊടുക്കാന്‍ പണം കണ്ടെത്താന്‍ പറ്റുമെന്നുളളതുകൊണ്ട് അവള്‍ ആ പണം വാങ്ങിയില്ലെങ്കിലും റോബിയുടെ കാരുണ്യം അവളുടെ മനസ്സിനെ സ്പര്‍ശിച്ചു.
തലേദിവസം അയാളെ കണ്ട പ്രസ്ടണ്‍ സിറ്റി സെന്റര്‍ പരിസരത്ത് പിറ്റേന്ന് അവള്‍ അയാളെ തിരഞ്ഞു നടന്നെങ്കിലും കണ്ടെത്താനായില്ല. അടുത്ത നാലു ദിവസം രാത്രിയില്‍ അവള്‍ കാറുമെടുത്ത് നഗരം മുഴുവന്‍ കറങ്ങി. ഒടുവില്‍ അയാളെ കണ്ടെത്തി. അയാള്‍ക്ക് സ്വന്തമായി വീടില്ലാത്തതാണെന്നും കഴിഞ്ഞ 7 മാസമായി തെരുവില്‍ കഴിയുകയാണെന്നും കൃത്യമായ ഒരു മേല്‍വിലാസമില്ലാത്തതിനാല്‍ ജോലി തേടാന്‍പോലും മാര്‍ഗ്ഗമില്ലാതിരിക്കുകയാണെന്നും ഒക്കെയളള വിവരങ്ങള്‍ അയാളില്‍ നിന്നും അറിഞ്ഞു. അതോടെ അടുത്ത ദിവസം തന്നെ റോബിയ്ക്ക് ഒരു ഫ്‌ളാറ്റിനുളള പണം സ്വരൂപിക്കുന്നതിനായി സംഭാവനകള്‍ നല്‍കണമെന്ന് അവളുടെ ഫേസ്ബുക്ക് പേജിലൂടെ അവള്‍ അഭ്യര്‍ത്ഥിച്ചു.
ഓരോരുത്തരും 3 പൗണ്ട് വീതം മാത്രം നല്‍കാനായിരുന്നു ആവശ്യപ്പെട്ടത്. 24 മണിക്കുറിനുളളില്‍ നല്‍കുന്ന സംഭാവനകള്‍ മാത്രമേ സ്വീകരിക്കുകയുളളൂ എന്ന് അവള്‍ അറിയിച്ചിരുന്നു. അവള്‍ ലക്ഷ്യമിട്ട 12,500 പൗണ്ട് എന്ന തുക ആദ്യത്തെ 6 മണിക്കൂറിനുളളില്‍തന്നെ അവളുടെ പക്കലെത്തി. തന്റെ ഫേസ്ബുക്കില്‍ പോസ്റ്റ് ഇട്ട് കഴിഞ്ഞതിനു ശേഷമാണ് റോബി സഹായിച്ച ഒരേ ഒരാളല്ല താനെന്ന് ഡൊമിനിക്ക് അറിഞ്ഞത്. നടന്നു പോകുന്നതിനിടയില്‍ പേഴ്‌സ് വീണുപോയതറിയാതെ പോയവരെ പിന്തുടര്‍ന്ന് പേഴ്‌സ് തിരിച്ചേല്‍പ്പിച്ചതും തണുപ്പില്‍ നിന്നും രക്ഷനേടാന്‍ സ്വന്തം സ്‌കാര്‍ഫ് നല്‍കി സഹായിച്ചതുമായ ഒരുപാട് കഥകള്‍ പലര്‍ക്കും റോബിയെക്കുറിച്ച് പറയാനുണ്ടായിരുന്നു. ഇതെല്ലാം എല്ലാവരും അറിഞ്ഞതോടെ ഉടനെ നടക്കാനിരിക്കുന്ന മിസ്.പ്രസ്ടണ്‍ സൗന്ദര്യ മല്‍സരത്തിലെ ഫൈനലിസ്റ്റ്, 24 മണിക്കൂര്‍ റോബിയുമായി ചേര്‍ന്ന് പ്രവര്‍ത്തിച്ച് അയാളെ സ്വന്തം കാലില്‍ നില്‍ക്കാന്‍ പര്യാപ്തമാക്കുന്നതിനുളള ഒരു പദ്ധതിയും ആവിഷ്‌കരിച്ചിട്ടുണ്ട്. റോബിയുടെ നന്‍മ നിറഞ്ഞ ഹൃദയത്തിന് കൊടുക്കാവുന്ന ഏറ്റവും നല്ല അംഗീകാരം തന്നെയാവും അത് എന്നതില്‍ സംശയമില്ല.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha