കാറില് കയറാനുള്ള ജിജീഷിന്റെ മോഹം സഫലമായി, വിമാനത്തില് കയറുന്നത് മോഹിക്കാന് പോലും ധൈര്യപ്പെട്ടില്ല, പക്ഷേ ജിജീഷ് ഉടന് വിമാനത്തില് കയറും!
വയനാടന് ചുരം കയറി വന്ന ഒരു കാറുകാരനോട്, ഭിന്നശേഷിക്കാരനായ ജിജീഷ് ചോദിച്ചത് ; നടന്നു തിരികെ വരാന് പറ്റുന്ന ദൂരത്തില് ഇറക്കി വിട്ടാമതി, എന്നെ കാറില് ഒന്നു കയറ്റാമോ എന്നായിരുന്നു! ആ കാറുടമ ആ ആഗ്രഹം സാധിച്ചു കൊടുത്തു. ഈ വിവരം യുവാവ് ഫെയ്സ്ബുക്കില് പങ്കുവച്ചതോടെ ആ മോഹവും സോഷ്യല് മീഡിയയില് വൈറലായി പറന്നു.
ലോക കേരളസഭാ അംഗമായ ഹബീബ് റഹ്മാന് ഒരിക്കല് ആലപ്പുഴയിലെത്തിയപ്പോള് കയ്യും കാലും ശേഷിയില്ലാത്ത ഒരു സംഘം കുഞ്ഞുങ്ങള് ചോദിച്ചിരുന്നു, 'സാറേ ഞങ്ങളെ ഒന്നു കാറില് കയറ്റാമോ? ഒരു ചെറിയ സവാരി നടത്തി തരാമോ..?'എന്ന്! ആ ചോദ്യം തയ്യില് ഹബീബിനെ ചിന്തിപ്പിച്ചത് ഇങ്ങനെയാണ്, ഈ മോഹവും പേറി കഴിയുന്ന എത്രയോ കുഞ്ഞുങ്ങളുണ്ടാകും. ഈ ചിന്ത മനസില് കിടക്കുമ്പോഴാണ് സോഷ്യല് ലോകത്തിന്റെ തന്നെ ഇഷ്ടം നേടിയ ജിജീഷ് എന്ന വയനാടുകാരനെ കുറിച്ചുള്ള ഫേസ്ബുക്ക് പോസ്റ്റ് കാണുന്നത്.
ഇതോടെ ഇത്തരം ഭിന്നശേഷിക്കാരായ കുട്ടികളുടെ ചെറിയ വലിയ മോഹം സാധിച്ചു കൊടുക്കാന് അദ്ദേഹം തീരുമാനിച്ചു. ഇതിനായി ഒരു കൂട്ടായ്മ രൂപീകരിച്ചു. നടക്കാന് കഴിയാത്തവരെ പറപ്പിക്കുക അതാണ് ലക്ഷ്യമെന്ന് അമ്പലപ്പുഴ ബ്ലോക്ക് പഞ്ചായത്ത് പ്രസിഡന്റും ഈ കൂട്ടായ്മയിലെ അംഗവുമായ കെ.എം.ജുനൈദ് പറഞ്ഞു.
ഒന്നു കാറില് കയറാന് പോലുമുള്ള മോഹം ഒരുപാട് നാള് കൊണ്ടുനടക്കുന്ന കുട്ടികളെ കണ്ടെത്തി അവരെ വിമാനത്തില് കയറ്റാന് ഒരുങ്ങുകയാണ് ലോക കേരളസഭാ അംഗമായ ഹബീബ് റഹ്മാനും കൂട്ടരും. കേരളത്തിലെ വിവിധ ജില്ലകളില് ന്നിന്നായി ഭിന്നശേഷിക്കാരായ 20 കുട്ടികള്ക്കാണ് ഒമാന് കാണാന് അവസരം ഒരുങ്ങുന്നത്. ഓരോ കുട്ടിയെയും രക്ഷിതാക്കളിലൊരാള് അനുഗമിക്കും. ഇതിന്റെ പ്രവര്ത്തനങ്ങള് നടന്നുവരികയാണെന്നും ജുനൈദ് പറയുന്നു.
ഇക്കാര്യം പങ്കുവച്ച് ഹബീബ് ഫെയ്സ്ബുക്കില് കുറിച്ചതിങ്ങനെ:
കാറില് യാത്ര ചെയ്യാന് കൊതിച്ച ആളെ ഫ്ലൈറ്റില് കയറ്റുന്നു. ജന്മനാ നടക്കാത്തവരെ, ഭിന്നശേഷി കുട്ടികളെ പറപ്പിക്കാന് പോകുന്ന കൂട്ടത്തില് ആണ് വയനാട്ടിലെ കുട്ടിയെ പറ്റി അറിയുന്നത് കൂട്ടത്തില് ആ മോനേയും ഉള്പ്പെടുത്താന് തീരുമാനിച്ചു. കേരളത്തിലെ വിവിധ ജില്ലകളിലെ ഭിന്നശേഷിക്കാരയാ 12 വയസ്സിനും 20 വയസ്സിനും മധ്യേ പ്രായമുള്ള കുട്ടികളെ ഒമാന് കാണിക്കാന് കൊണ്ടു വരുന്നു. അവരുടെ ജീവിതത്തില് പലര്ക്കും ഒരിക്കലും നടക്കില്ല എന്ന കാര്യം നടത്തിക്കൊടുത്ത് ആഗ്രഹ പൂര്ത്തീകരണത്തിന് വേണ്ടിയാണ് ഇത് ചെയ്യുന്നത്.
അവന്റെ ഒപ്പം 20 ഓളം മറ്റു ഭിന്നശേഷിക്കാരായ കുട്ടികളും. ആ ധന്യ നിമിഷങ്ങള്ക്ക് നിങ്ങളുടെ അനുഗ്രഹം ഉണ്ടാകണം. കണ്ണുനീരിന്റെ ഉപ്പുള്ള ചിരിയുമായി എന്റെ ചാരത്തിരിക്കുന്ന കൊച്ചു മിടുക്കരുടെ കണ്ണിലെ പ്രതീക്ഷ കാക്കാന് കൂടെ ഞങ്ങളുണ്ടാകും. തിയതി പുറകേ അറിയിക്കുന്നതാണ്.
കുട്ടികളുടെ മാതാപിതാക്കള് ബന്ധപ്പെടുക: തയ്യില് ഹബീബ്, ലോക കേരളാ സഭാ അംഗം, Khais2001@gmail.com. കെ.എം.ജുനൈദ്, അമ്പലപ്പുഴ ബ്ലോക്ക് പഞ്ചായത്ത് പ്രസിഡന്റ് (9061303300), ആലപ്പുഴ നഗരസഭ വിദ്യാഭ്യാസ സ്റ്റാന്റിംഗ് കമ്മറ്റി ചെയര്മാന് അഡ്വ. മനോജ് കുമാര് (9447400157), സി.എ.സലീം (9846771778), ഹസന് (9895078651)
https://www.facebook.com/Malayalivartha