കുമരകം ബോട്ട്‌ജെട്ടിയ്ക്കു സമീപം അടുത്തിടെ ആരംഭിച്ച തട്ടുകട അവിടുത്തുകാരുടെ പ്രത്യേക ശ്രദ്ധപിടിച്ചുപറ്റി. കാരണം ആ തട്ടുകട നടത്തുന്നത് 2000-2005 കാലഘട്ടത്തില്‍ കുമരകം ഗ്രാമപഞ്ചായത്തിന്റെ പ്രസിഡന്റായിരുന്ന എ.ജി.ഉഷാകുമാരിയാണ്. ഭരണത്തിലിരിക്കുമ്പോള്‍ മൂന്നും നാലും തലമുറയ്ക്കുള്ള സ്വത്ത് സമ്പാദിച്ച് കൂട്ടുന്ന ഭരണാധികാരികളെ കണ്ടു പരിചയിച്ച സാധാരണക്കാര്‍ക്ക് ഉഷാകുമാരി വ്യത്യസ്തയായി തോന്നിയെങ്കില്‍ അവരെ കുറ്റംപറയാനാവില്ലല്ലോ!

ഭര്‍ത്താവ് രജിമോന്‍ റബര്‍ബോര്‍ഡില്‍നിന്നും വിരമിച്ചപ്പോള്‍ കിട്ടിയ പണം ഉപയോഗിച്ച് വീട് നന്നാക്കി, ബാക്കി തുകകൊണ്ട് ഒരു ശിക്കാര വള്ളം നിര്‍മിച്ച് ടൂറിസം മേഖലയില്‍ പ്രവര്‍ത്തിച്ചുവരികയായിരുന്നു. എന്നാല്‍ കഴിഞ്ഞ മൂന്നുമാസമായി ഈ വള്ളം അറ്റകുറ്റ പണികള്‍ക്കായി കരയ്ക്കുകയറ്റിയ സാഹചര്യത്തിലാണു വരുമാനത്തിനായി തട്ടുകട തുടങ്ങാന്‍ തീരുമാനിച്ചത്.

സര്‍ക്കാര്‍ പുറംപോക്ക് ഭൂമിയിലാണ് കടയുടെ പ്രവര്‍ത്തനം ആരംഭിച്ചത്. എന്നാല്‍ 10 ദിവസം കഴിഞ്ഞപ്പോള്‍ പൊതുമരാമത്തില്‍ നിന്നും ഒഴിഞ്ഞുമാറാനുള്ള നോട്ടീസ് ലഭിച്ചതിനെ തുടര്‍ന്നു സ്വകാര്യവ്യക്തിയുടെ പറമ്പിലാണു ഇപ്പോള്‍ തട്ടുകട പ്രവര്‍ത്തിയ്ക്കുന്നത്. ഭക്ഷണം വീട്ടില്‍ വച്ച് പാകം ചെയ്തിട്ട് കടയില്‍ കൊണ്ടുവന്ന് വില്‍പന നടത്തുകയാണ് ചെയ്യുന്നത്. കുമരകത്തിന്റെ തനതു രുചികളായ കപ്പ, മീന്‍കറി, കക്കഇറച്ചി, കോഴി, താറാവ് എന്നിവയൊക്കെയാണ് വിഭവങ്ങള്‍.

കുമരകത്തു ബസ് സ്‌റ്റേഷന്‍ നിര്‍മ്മാണത്തിനായി ആറ്റാമംഗലം പള്ളിയ്ക്കു സമീപം ഒരേക്കര്‍ സ്ഥലം വാങ്ങിയതും, ചന്തക്കവലയില്‍ മലിനജലം കെട്ടിക്കിടന്നിരുന്നത് ഒഴുക്കി കളയുന്നതിനായി ഓട നിര്‍മ്മിച്ചതും പഞ്ചായത്തിന്റെ ഒരേക്കര്‍ സ്ഥലത്ത് എസ്.സി വിഭാഗത്തില്‍പെട്ടവര്‍ക്ക് അഞ്ച് സെന്റ് ഭൂമിയില്‍ വീടുവച്ച് നല്‍കിയതുമൊക്കെ ഉഷാകുമാരി പ്രസിഡന്റായിരുന്ന കാലത്താണ്. ഇപ്രകാരം നിരവധി വികസനപ്രവര്‍ത്തനങ്ങള്‍ കുമരകത്തിനു സംഭാവന ചെയ്ത ഇവര്‍ പിന്നീട് സി.പി.ഐയില്‍നിന്നും പുറത്താക്കപ്പെട്ടു.

ഉഷാകുമാരിയുടെ മക്കളായ, എം.ബി.എയ്ക്കു പഠിക്കുന്ന രേഷ്മയുടേയും ബി.കോമിനു പഠിക്കുന്ന ജിഷ്ണുവിന്റേയും പഠനവും ദൈനംദിന ജീവിതാവശ്യങ്ങളും മുടങ്ങിപ്പോകാതിരിക്കാനാണ് ഇപ്പോള്‍ തട്ടുകട തുടങ്ങിയത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha