നോത്രദാമിന് തീ പിടിക്കുമ്പോൾ...
ഞാന് ഒട്ടും ദൈവവിശ്വാസി അല്ലെങ്കിലും പാരിസില് ആരുടെ കൂടെ പോയാലും അവരെ നിര്ബന്ധമായി കൊണ്ടുപോകാറുള്ള സ്ഥലമാണ് നോത്രദാം കത്തീഡ്രല്. ആയിരത്തിലേറെ വര്ഷം പഴക്കമുള്ള, നെപ്പോളിയന്റെ കിരീടധാരണം ഉള്പ്പടെയുള്ള ചരിത്ര സംഭവങ്ങള് നടിന്നുള്ള സ്ഥലമാണ്. വിക്ടര് ഹ്യൂഗോയുടെ വിശ്വപ്രസിദ്ധമായ 'നോത്രദാമിലെ കൂനന്' എന്ന നോവലിലെ പല സംഭവങ്ങളും നടക്കുന്നത് ഇവിടെയാണ്. ഒരുകാലത്ത് നോത്രദാമില് അഭയം പ്രാപിക്കുന്നവരെ അറസ്റ്റ് ചെയ്യാന് പാടില്ലെന്നൊരു നിയമം നിലവിലുണ്ടായിരുന്നു.
ചരിത്രത്തിന്റെ മാത്രമല്ല - പഴയതും മനോഹരവും വിലപിടിപ്പുള്ളതുമായ കലാവസ്തുക്കളുടെ പ്രദര്ശന സ്ഥലം കൂടിയായിരുന്നു ഇത്. കൂടാതെ നോത്രദാമിലെ നിധികളെ പേരില് ഒരു നിലവറ തന്നെ അവിടെയുണ്ടായിരുന്നു. കാശ് കൊടുത്താല് അത് കാണാനുള്ള സൗകര്യവുമുണ്ടായിരുന്നു.
ഇനിയിപ്പോള് അവിടെ എന്തൊക്കെ ബാക്കിയുണ്ടെന്നറിയില്ല. പള്ളി പുനര് നിര്മ്മിക്കാന് എഴുന്നൂറ് കോടി രൂപ കൊടുക്കാമെന്ന് ഇപ്പോള് തന്നെ ഒരാള് വാഗ്ദാനം ചെയ്തു കഴിഞ്ഞു. വേറെയും ആളുകള് അതിനു തയ്യാറാവും. പക്ഷെ നൂറ്റാണ്ടുകളെടുത്ത് നിര്മ്മിച്ച പള്ളി ഒറിജിനല് മരത്തില് പുനര്നിര്മ്മിക്കാനുള്ള കരവിരുതുള്ള ആളുകള് ഉണ്ടാകുമോ? ഒരു പതിറ്റാണ്ടേക്കെങ്കിലും ഇനി നോത്രദാം പുറമേ നിന്നുള്ള കാഴ്ച മാത്രമാകാനാണ് വഴി.
പാഠങ്ങള് നമുക്കും ഉണ്ട്. അഗ്നിബാധ നമ്മുടെ പുരാതന കെട്ടിടങ്ങളിലും ഉണ്ടാകാം. എന്തൊക്കെ അഗ്നിശമന സംവിധാനങ്ങളാണ് അവിടെയുള്ളത്?
സാന് ഫ്രാന്സിസ്കോയിലെ വരാനിരിക്കുന്ന ഭൂമികുലുക്കത്തിന് നഗരത്തെ തയ്യാറാക്കാന് ഉപദേശം നല്കിയ എന്റെ സുഹൃത്ത് പറഞ്ഞ ഒരു കാര്യം ഞാന് ഓര്ക്കുന്നു. പഴയതും ചരിത്ര പ്രസിദ്ധവുമായ കെട്ടിടങ്ങള് ഉണ്ടെങ്കില് അവയെ പൂര്ണ്ണമായും സുരക്ഷിതമാക്കുക സാധ്യമല്ലെങ്കിലും അവക്കകത്തുള്ള വില പിടിപ്പുള്ള വസ്തുക്കള് ആധുനികമായ സജ്ജീകരണങ്ങളുള്ള സ്ഥലത്തേക്ക് മാറ്റാമല്ലോ. ഉദാഹരണത്തിന് വളരെ പഴയ മ്യൂസിയം കെട്ടിടത്തില് ഏറ്റവും വിലപിടിപ്പുള്ള കലാവസ്തുക്കള് സൂക്ഷിക്കുന്നത് വിഡ്ഢിത്തമാണ്. അതിനാല് അപകടമുണ്ടായാലും നഷ്ടപ്പെട്ടാലും സാമ്ബത്തികമോ, ചരിത്രപരമോ ആയ നാശങ്ങള് ഉണ്ടാകാത്ത വസ്തുക്കള് മ്യൂസിയത്തില് സൂക്ഷിക്കുക. പഴയതും പ്രധാനമായതും പുതിയ കെട്ടിടത്തിലും.
കാലിഫോര്ണിയയിലെ പ്രശസ്തമായ ഒരു യൂണിവേഴ്സിറ്റിയിലെ പ്രൊഫസര് ആയിരുന്നു ഈ സുഹൃത്ത്. 'ഇതേ തത്വ ശാസ്ത്രം അനുസരിച്ചാണ് ഞാന് എന്റെ യൂണിവേഴ്സിറ്റിയെയും ഭൂകമ്ബത്തിന് തയ്യാറാക്കിയിരിക്കുന്നത്. വിദ്യാര്ത്ഥികളെയെല്ലാം പുതിയ കെട്ടിടത്തിലേക്ക് മാറ്റി, പ്രസിഡന്റിനെയും അഡ്മിനിസ്ട്രേഷനെയും ഒക്കെ പഴയ കെട്ടിടത്തിലും' അവര് തമാശ പറഞ്ഞതാണോ എന്നറിയില്ല. എന്തായാലും പഴയ കെട്ടിടങ്ങളും അതില് നിധികളും നിലവറകളും ഉള്ളവര്ക്ക് ചിന്തിച്ചാല് ദൃഷ്ടാന്തമുണ്ട്.
https://www.facebook.com/Malayalivartha