പ്രണയം, മനസ്സിന്റെ സൗന്ദര്യത്തോടാണെന്ന് ജിനിലും ഏയ്ഞ്ചലും ഒരേ സ്വരത്തില് പറയുന്നു!
കഴിഞ്ഞ ദിവസങ്ങളില് സോഷ്യല് മീഡിയയുടെ മുഴുവന് ശ്രദ്ധ നേടിയതാണ്, ആറടിപൊക്കമുള്ള കല്യാണച്ചെറുക്കന് മൂന്നടിപ്പൊക്കമുള്ള വധുവിനോടൊപ്പം നില്ക്കുന്ന ഒരു ചിത്രം. അതു കണ്ടവര്ക്കെല്ലാം തീര്ച്ചയായിരുന്നു, ആ ചിത്രത്തിന് പറയാനുള്ളത് മനോഹരമായ ഒരു കഥ ആയിരിയ്ക്കുമെന്ന്! ആ ധാരണ തെറ്റിയില്ല.
ബാഹ്യസൗന്ദര്യത്തെക്കാള് മനസ്സിന്റെ ഇഴയടുപ്പമാണ് പ്രണയത്തെ ഉൗട്ടിയുറപ്പിക്കുന്നതെന്ന് തെളിയിക്കുന്നതായിരുന്നു ഈ ചിത്രം. വൈകല്യങ്ങളെ മറന്ന് പുതുജിവിതത്തിലേക്ക് കാലെടുത്തു വച്ചിരിക്കുകയാണ് തൃശൂരുകാരന് ജിനിലും കൊല്ലം സ്വദേശിയായ എയ്ഞ്ചല് മേരിയും.
അച്ഛന് ചെറുപ്പത്തിലെ മരിച്ച എയ്ഞ്ചലിന് ആകെയുള്ളത് അമ്മയും ചേട്ടനുമാണ്. കുടുംബം പുലര്ത്താന് രണ്ട് പേരും ജോലിക്ക് പോകും. മൂന്നടിപ്പൊക്കം മാത്രമുള്ള എയ്ഞ്ചല് വീട്ടില് തനിച്ചായിരുന്നു. ആ ഏകാന്തതയില്, തന്റെ കുറവുകള്ക്കിടയിലും അവള് ഒരു ജീവിതം കൊതിച്ചു. തനിയ്ക്ക് ഇണയും തുണയുമായി ഒരാള് വേണമെന്ന് അവള് ആഗ്രഹിച്ചു.
അങ്ങനെ മാട്രിമോണി സൈറ്റില് അവള് പ്രൊഫൈല് പങ്കുവച്ചു. ഇത് കണ്ട് ചില ആലോചനകള് വന്നുവെങ്കിലും എല്ലാം ദൂരെ നിന്നും ഉള്ളവയായിരുന്നു. കൂടാതെ സ്വത്തും പണവുമൊക്കെ സ്ത്രീധനമായി ആവശ്യപ്പെടുന്നവയുമായിരുന്നു.
ഇല്ലായ്മകള്ക്ക് നടുവില് ജീവിക്കുന്ന എയ്ഞ്ചലിന് അത് വഹിക്കാനാവുമായിരുന്നില്ല. അങ്ങനെയിരിക്കെയാണ് തൃശൂരില് നിന്നും ജിനില് എന്ന ചെറുപ്പക്കാരന്റെ ആലോചന വന്നത്. പ്രൊഫൈലില് നല്കിയ വിവരങ്ങളെല്ലാം കണ്ട് ജിനില് എയ്ഞ്ചലിനെ വിളിക്കുകയായിരുന്നു.
താല്പര്യമുണ്ടെന്നും പണമോ സ്വത്തോ ഒന്നും വേണ്ടെന്നും തിരിച്ചും താല്പര്യമുണ്ടെങ്കില് നമുക്ക് സ്നേഹിക്കാം എന്നായിരുന്നു ജിനിലിന്റെ വാക്കുകള്. ഇത്രയും കേട്ട ആ പെണ്കുട്ടി അയാളെ കാണുക പോലും ചെയ്യാതെ തിരിച്ചും സ്നേഹിക്കാം എന്ന് ഉത്തരം പറഞ്ഞു. അങ്ങനെ അവര്ക്കിടയില് ദൃഢമായ ഹൃദയബന്ധം വളരുകയായിരുന്നു.
എയ്ഞ്ചലിനെ പോലെ സമൂഹത്തില് ഒരുപാട് കുട്ടികളുണ്ട്. അംഗവൈകല്യം ബാധിച്ചവരും മറ്റ് കുറവുകളുള്ളവരും. അവരെയെല്ലാം സമൂഹം കൗതുകത്തിന്റെ കണ്ണുകളോടെയാണ് നോക്കുന്നത്. ദൈവം അവരെ അങ്ങനെ സൃഷ്ടിച്ചുപോയി. ഇവരെ കാണുമ്പോള് കൗതുകമോ സഹതാപമോ അല്ല വേണ്ടത് എന്ന് തനിക്ക് തോന്നിയെന്ന് ജിനില് പറയുന്നു. അവര്ക്കും നമ്മളെ പോലെ ജീവിക്കാന് കഴിയണം എന്ന തോന്നലില് നിന്നും ഉണ്ടായതാണ് തന്റെ ജീവിതത്തിലേക്ക് ഇങ്ങനെയൊരു പെണ്കുട്ടി വരണമെന്ന തീരുമാനം.
ടയര് വര്ക്കറായ ജിനില് ബോംബെ, ഡല്ഹി തുടങ്ങി രാജ്യത്തിന്റെ പല ഭാഗത്തും സഞ്ചരിച്ചിട്ടുണ്ട്. കേരളത്തിലും പോകാത്ത സ്ഥലങ്ങളില്ല. പല ജീവിതങ്ങളും നേരിട്ട് കണ്ടിട്ടുണ്ട്. സൗന്ദര്യമുള്ള പെണ്കുട്ടിയെ വിവാഹം ചെയ്തിട്ടും ജീവിതം തകര്ന്നു പോയവരുണ്ടല്ലോ? അപ്പോള് അതിലൊന്നുമല്ല കാര്യം എന്ന് മനസ്സിലായി. ഒരു വധുവിനായി അന്വേഷണം തുടങ്ങിയപ്പോള് ഇതൊക്കെയായിരുന്നു ജിനിലിന്റെ മനസ്സിലെ ചിന്തകള്. ഒടുവില് എയ്ഞ്ചലിനെ കണ്ടെത്തുകയായിരുന്നു. വ്യക്തിപരമായി കുട്ടിയെ ഇഷ്ടപ്പെട്ടു. അങ്ങനെ വിവാഹം ആലോചിക്കുകയായിരുന്നു എന്നു പറയുന്നു ജിനില്.
രണ്ട് വീട്ടുകാര്ക്കും ആദ്യം ചില എതിര്പ്പുകളൊക്കെ ഉണ്ടായിരുന്നു. എയ്ഞ്ചലിന്റെ വീട്ടില് തൃശ്ശൂരും കൊല്ലവും തമ്മിലുള്ള ദൂരമായിരുന്നു പ്രശ്നം. ജിനിലിന്റെ വീട്ടില് എയ്ഞ്ചലിന്റെ ഉയരക്കുറവ് തന്നെയായിരുന്നു പ്രശ്നം. പക്ഷേ ജിനില് അവരെ കാര്യങ്ങള് പറഞ്ഞു മനസ്സിലാക്കി. ഇങ്ങനെയൊരു മകളോ മകനോ നമ്മുടെ കുടുംബത്തിലുണ്ടായിരുന്നുവെങ്കില് അവര്ക്ക് ഒരു ജീവിതം ഉണ്ടാകണേ എന്ന് നമ്മള് ആഗ്രഹിക്കില്ലേ എന്ന ജിനിലിന്റെ ചോദ്യം വീട്ടുകാരുടെ മനസ്സില്കൊണ്ടു. പിന്നെ അവര് എതിര്ത്തില്ല. അങ്ങനെ ഇരു വീട്ടുകാരും സമ്മതിച്ചതോടെ മാര്ച്ച് 17-ാം തീയതി വിവാഹ നിശ്ചയം നടത്തി. മെയ് 25-ന് മനസമ്മതവും 8-ന് വിവാഹവും ഗംഭീരമായി തന്നെ നടന്നു.
കൊല്ലം വെള്ളിമണ് ലിറ്റില് ഫ്ലവര് പള്ളിയില് വച്ചായിരുന്നു ബന്ധുക്കളുടെയും സുഹൃത്തുക്കളുടെയും സാന്നിധ്യത്തില് ജിനില് എയ്ഞ്ചലിനെ മിന്നുകെട്ടിയത്. ഭാവി ജീവിതത്തെക്കുറിച്ച് ആശങ്കയൊന്നുമില്ലെന്നാണ് രണ്ടുപേരും പറയുന്നത്. ദൈവം എന്തു തരുന്നോ അതനുസരിച്ച് പോകും. അമ്മയ്ക്കും മറ്റ് ബന്ധുക്കള്ക്കും എയ്ഞ്ചലിനോട് വലിയ സ്നേഹമാണെന്ന് ജീനില് പറയുന്നു. ചെയ്യുന്ന ജോലി തന്നെ തുടര്ന്ന് ചെയ്ത് എയ്ഞ്ചലിനെ പൊന്നുപോലെ നോക്കുമെന്ന് ജിനിലും പിഎസ്സി പരീക്ഷയെഴുതി നല്ല ഒരു ജോലി സ്വന്തമാക്കി ജിനിലിന് കൂട്ടായി കഴിയുമെന്ന് എയ്ഞ്ചലും പറയുന്നു.
https://www.facebook.com/Malayalivartha