അമേരിക്കാസ് ഗോട്ട് ടാലന്‍ഡ് എന്ന ടെലിവിഷന്‍ പരിപാടി ലോകമാകമാനം പ്രേക്ഷകര്‍ ഉള്ള ഒരു ജനപ്രിയ ഷോ ആണ്. അതില്‍ പങ്കെടുത്ത്് വയലിനില്‍ വിസ്മയം തീര്‍ത്ത് കാണികളെയും വിധികര്‍ത്താക്കളെയും അമ്പരിപ്പിച്ചു കളഞ്ഞു ടൈലര്‍ ബട്ലര്‍ ഫിഗ്യൂറ എന്ന ബാലന്‍.

വയലിന്‍ വാദനത്തിനായി സ്റ്റേജിലേയ്ക്ക് എത്തിയ ടൈലറിനോട്് വയലിന്‍ പഠനം തുടങ്ങിയിട്ട് എത്ര നാളായി എന്ന് വിധികര്‍ത്താക്കളിലൊരാള്‍ ചോദിച്ചതിന്, തന്റെ ഏഴര വയസ്സു മുതല്‍ വയലിന്‍ പഠിക്കയാണ് എന്ന് അവന്‍ മറുപടി പറഞ്ഞു. എന്താണ് നിനക്ക് വയലിന്‍ പഠിക്കണമെന്ന ആഗ്രഹം ഉണ്ടാകാന്‍ കാരണം എന്ന ചോദ്യത്തിന് അവന്‍ നല്‍കിയ മറുപടി കേട്ട് എല്ലാവരും നടുങ്ങി. അവന്‍ പറഞ്ഞതിങ്ങനെ ആയിരുന്നു;

എന്റെ സ്‌കൂളില്‍ എല്ലാവരും എന്നെ എപ്പോഴും പരിഹസിയ്ക്കുമായിരുന്നു, അത് മറക്കാനാണ് ഞാന്‍ വയലിന്‍ പഠനത്തിലേയ്ക്ക് ശ്രദ്ധ തിരിച്ചത്. തന്റെ അവിശ്വസനീയത അടക്കിവച്ചുകൊണ്ട് ആ ജഡ്ജ് വീണ്ടും അവനോട് ചോദിച്ചു, എന്തു കാര്യത്തിനാണ് നിന്നെ അവര്‍ പരിഹസിച്ചിരുന്നതെന്ന് നിനക്കറിയാമോ? എനിക്ക് കാന്‍സര്‍ ആയിരുന്നു. ഞാന്‍ മരിച്ചുകൊണ്ടിരിക്കയായിരുന്നു എന്നതായിരുന്നു അവരുടെ കളിയാക്കലിനു കാരണമെന്ന് അവന്‍ പറഞ്ഞത് കേട്ട സദസ്യര്‍ ഒന്നടങ്കം ഞെട്ടിപ്പോയി!

''നാലാം വയസ്സിലാണ് എനിക്ക് രക്താര്‍ബുദമാണെന്ന് കണ്ടെത്തുന്നത്. കാന്‍സര്‍ ആണെന്നതിന്റെ പേരില്‍ എന്റെ സഹപാഠികള്‍ എന്നെ കളിയാക്കി. കീമോതെറാപ്പിയെത്തുടര്‍ന്ന് മുടി കൊഴിഞ്ഞു. ഇതോടെ പരിഹാസങ്ങള്‍ കൂടി. എന്റെ അസുഖം പകരുമെന്നും എന്റടുത്ത് നിന്ന് മാറിനടക്കണമെന്നും സ്‌കൂളിലെ എല്ലാവരോടും അവര്‍ പറഞ്ഞുനടന്നു. എന്റെ രൂപത്തെ കളിയാക്കി. സ്‌കൂളില്‍ പോകാന്‍ ഇഷ്ടമല്ലായിരുന്നു എനിക്ക്. ''- കണ്ണുനനഞ്ഞ് ടൈയ്ലര്‍ പറയുമ്പോള്‍ വിധികര്‍ത്താക്കള്‍ക്കും കാണികള്‍ക്കും കരയാതിരിക്കാനായില്ല.

''അന്ന് കാന്‍സറുള്ള കുട്ടി എന്നാണ് സ്‌കൂളില്‍ ഞാന്‍ അറിയപ്പെട്ടിരുന്നത്. എന്നാലിന്ന് നന്നായി വയലിന്‍ വായിക്കുന്ന കുട്ടി എന്നാണ് എല്ലാവരും എന്നെ വിശേഷിപ്പിക്കുന്നത് ''എന്ന് ടെയ്ലര്‍ പറഞ്ഞുനിര്‍ത്തി.

ആദ്യമായി മകന്‍ വയലിന്‍ പഠിക്കണമെന്ന് പറഞ്ഞപ്പോള്‍ താനത്ര കാര്യമാക്കിയില്ലെന്ന് ടൈയ്ലറിന്റെ അമ്മ പറഞ്ഞു. ''ഇന്ന് അവന്‍ വയലിന്‍ വായിക്കുമ്പോള്‍ സന്തോഷവാനാണ്, എനിക്കെന്റെ മകനെ തിരിച്ചുകിട്ടിയതുപോലെ തോന്നുന്നു'' എന്നാണ് ടെയ്ലറിന്റെ അമ്മ ഇപ്പോള്‍ പറയുന്നത്.

വ്യക്തിപരമായ ഈ കാര്യങ്ങള്‍ സ്റ്റേജില്‍ നിന്നുകൊണ്ട് വെളിപ്പെടുത്തിയതിനു ശേഷമായിരുന്നു അവന്റെ വയലിനിലെ പ്രകടനം.

 'വാട് ഡസന്റ് കില്‍ യു മേക്ക് യു സ്‌ട്രോംഗര്‍' അഥവാ നിങ്ങളുടെ ജീവന്‍ ഇല്ലാതാക്കാന്‍ കഴിയാത്തവ എല്ലാം നിങ്ങളെ കൂടുതല്‍ കരുത്തരാക്കും എന്ന കെല്ലി ക്ലാര്‍ക്‌സന്റെ ഹിറ്റ് ആല്‍ബത്തിലെ ഗാനത്തിനൊത്ത് വയലിന്‍ വായിച്ച് ടൈയ്ലര്‍ സദസ്സിനെയും വിധികര്‍ത്താക്കളെയും അമ്പരപ്പിച്ചു. പ്രകടനത്തിന് ശേഷം, അവനെ പരിഹസിച്ചവര്‍ക്കുള്ള മറുപടിയാണിതെന്ന് കൂടി പറഞ്ഞുകൊണ്ട് ഗോള്‍ഡന്‍ ബസര്‍ നല്‍കിയാണ് ടൈയ്ലറിനെ വിധികര്‍ത്താക്കള്‍ ആദരിച്ചത്.