ശ്രീപദ്മനാഭ സ്വാമി ക്ഷേത്രത്തിലെ നിലവറയില് സൂക്ഷിച്ചിട്ടുള്ള അമൂല്യ രത്നങ്ങളും ആഭരണങ്ങളും പുരാവസ്തുക്കളും അടക്കമുള്ളവ പൊതുജനങ്ങള്ക്ക് നേരില് കാണാന് അവസരമൊരുങ്ങുന്നു
ശ്രീപത്മനാഭ സ്വാമി ക്ഷേത്രത്തിലെ നിധിശേഖരം മ്യൂസിയമാക്കുന്നതിന് സുപ്രീംകോടതിയുടെ അനുമതി തേടുമെന്ന് ദേവസ്വം മന്ത്രി. അതുവഴി ശ്രീപദ്മനാഭ സ്വാമി ക്ഷേത്രത്തിലെ നിലവറയില് സൂക്ഷിച്ചിട്ടുള്ള അമൂല്യ രത്നങ്ങളും ആഭരണങ്ങളും പുരാവസ്തുക്കളും അടക്കമുള്ളവ പൊതുജനങ്ങള്ക്ക് നേരില് കാണാന് അവസരമൊരുങ്ങുകയാണ്.
അമൂല്യ വസ്തുക്കള് പ്രദര്ശിപ്പിക്കാന് മ്യൂസിയം തുടങ്ങുന്ന കാര്യം സര്ക്കാരിന്റെ പരിഗണനയിലുണ്ടെന്ന് മന്ത്രി കടകംപള്ളി സുരേന്ദ്രന് നിയമസഭയില് വ്യക്തമാക്കി. ഇത് സംബന്ധിച്ച കെ.ബി. ഗണേശ് കുമാറിന്റെ ചര്ച്ചയ്ക്ക് മറുപടി പറയുകയായിരുന്നു അദ്ദേഹം. നിലവില് ശ്രീപദ്മനാഭ സ്വാമി ക്ഷേത്രവുമായി ബന്ധപ്പെട്ട കാര്യങ്ങള് സുപ്രീം കോടതി പരിഗണനയിലാണ്. അതുകൊണ്ട് സര്ക്കാരിന് തീരുമാനം എടുക്കാന് കഴിയില്ല. കോടതി തീരുമാനം വരുന്ന മുറയ്ക്ക് മറ്റ് കാര്യങ്ങള് ആലോചിക്കും. ശ്രീപദ്മനാഭ സ്വാമി ക്ഷേത്രത്തിലെ നിധിശേഖരം വിദേശികള്ക്കും സ്വദേശികള്ക്കും കാണാനുള്ള അവസരമുണ്ടാക്കാന് മ്യൂസിയം ഉണ്ടാക്കണമെന്നായിരുന്നു ഗണേശ്കുമാറിന്റെ നിര്ദ്ദേശം. ടിക്കറ്റില് നിന്ന് ലഭിക്കുന്ന വരുമാനം ക്ഷേത്രത്തിന്റെ നവീകരണത്തിനും സുരക്ഷാ ക്രമീകരണങ്ങള്ക്കും മ്യൂസിയത്തിന്റെ പ്രവര്ത്തനങ്ങള്ക്കും ഉപയോഗിക്കുന്നതിനൊപ്പം ജീവകാരുണ്യ പ്രവര്ത്തനങ്ങള്ക്കും ഉപയോഗിക്കാമെന്ന് ഗണേശ്കുമാര് നിര്ദ്ദേശിച്ചു. ടൈം മാഗസിനില് വന്നിട്ടുള്ള ഒരു ലേഖനത്തില് ലോകത്തെ ഏറ്റവും സമ്ബന്നനായ ഈശ്വരനെന്നാണ് ശ്രീപദ്മനാഭനെ കുറിച്ച് വിശേഷിപ്പിച്ചിട്ടുള്ളത്. ലോകത്തിന്റെ എല്ലാ ഭാഗത്തും ഇന്ന് ശ്രീപദ്മനാഭ സ്വാമി ക്ഷേത്രം പ്രസിദ്ധമാണെന്നും അദ്ദേഹം ചൂണ്ടിക്കാട്ടി.
അടുത്ത നാളുകളില് തലസ്ഥാന നഗരിയെ ലോക ശ്രദ്ധയില് കൊണ്ട് വന്ന ഒരു സംഭവമാണ് തിരുവനന്തപുരം ശ്രീ പത്മനാഭ സ്വാമി ക്ഷേത്രത്തിലെ അളവറ്റ സമ്പത്തിന്റെ വ്യാപ്തിയെ കുറിച്ചുള്ള വെളിപ്പെടുത്തല്. ക്ഷേത്രത്തില് പതിന്നാലാം നൂറ്റാണ്ടുമുതല് വന് സ്വര്ണാഭരണങ്ങള് ഉണ്ടായിരുന്നതായി രേഖകളില് നിന്നു വ്യക്തമാണ്. കാലാകാലങ്ങളില് പിഴയായും സംഭാവനയായും ധാരാളം ആഭരണങ്ങളും ആനകളും വസ്തുവകകളും ക്ഷേത്രത്തിന് കിട്ടിയിട്ടുണ്ട്. ഇതുകൂടാതെ മാര്ത്താണ്ഡവര്മ കൊച്ചിയുടെ അതിര്ത്തിവരെയുള്ള രാജ്യങ്ങള് കീഴടക്കിയപ്പോള് അവിടത്തെ സ്വത്തുക്കള് അദ്ദേഹം ശ്രീപദ്മനാഭസ്വാമിക്കാണ് സമര്പ്പിച്ചത്. അന്ന് ഡച്ചുകാരും മറ്റ് യൂറോപ്യന് രാജ്യങ്ങളുമായി കച്ചവടത്തിലേര്പ്പെട്ടിരുന്ന ചെമ്പകശ്ശേരി തുടങ്ങിയ രാജ്യങ്ങളില് വന് സമ്പത്ത് ഉണ്ടായിരുന്നു. അറബിക്കഥക്കളെ വെല്ലുന്ന ദൃശ്യങ്ങളാണ് ക്ഷേത്രത്തിലെ രഹസ്യനിലവറകള് പരിശോധിയ്ക്കാനെത്തിയവര്ക്ക് കാണാനായത്. ടണ്കണക്കിന് സ്വര്ണവും ചാക്കുകളില് സൂക്ഷിച്ച രത്നശേഖരവുമെല്ലാം വ്യാഴാഴ്ചത്തെ പരിശോധനയില് കണ്ടെത്തി. സമയക്കുറവ് മൂലം വ്യാഴാഴ്ച കണ്ടെത്തിയ നിധി ശേഖരത്തിന്റെ 30 ശതമാനം മാത്രമാണ് പരിശോധിച്ചത്.
നരസിംഹമൂര്ത്തി ക്ഷേത്രത്തിന്റെ തെക്കെ മൂലയിലുള്ള ശ്രീപണ്ടാരവക നിലവറയിലെ ഭൂഗര്ഭ അറയില് നിന്നാണ് വിലമതിയ്ക്കനാവാത്ത നിധി കണ്ടെത്തിയത്. നൂറ് കണക്കിന് സ്വര്ണമാലകള്, ഒരു ടണ്ണോളം വരുന്ന സ്വര്ണക്കതിര്, സ്വര്ണ ദണ്ഡുകള്, രത്നങ്ങള് എന്നിവയും ഉള്പ്പെടുന്നുണ്ട്. ശരപ്പൊളി മാലകളില് ഒന്നിന് പത്തര കിലോ ഭാരവും 18 അടി നീളവുമുണ്ട്.
സ്വര്ണക്കിരീടം, സ്വര്ണവിഗ്രഹങ്ങള്, കോടികള് വിലമതിയ്ക്കുന്ന രത്നങ്ങള്, മരതകവും മാണിക്യവും പതിച്ച മാലകള്, കിലോക്കണക്കിന് ഭാരമുള്ള സ്വര്ണ അരപ്പട്ടകളും പരിശോധനയില് ലഭിച്ചു. ലഭിച്ചതില് ഒരു വജ്രത്തിന് മാത്രം 50 കോടിയോളം വിലവരുമെന്ന് ക്ഷേത്രവുമായി ബന്ധപ്പെട്ടവര് പറയുന്നു. 18 വലിയ വജ്രങ്ങളും 45 ചെറിയ വജ്രങ്ങളും പതിച്ചതാണ് ഡച്ച് കാശിമാല. ഒരു ലക്ഷത്തോളം വരുന്ന സ്വര്ണം, വെള്ളിനാണയങ്ങള്, വജ്രങ്ങള് പതിച്ച വീരശൃംഖല, അരപ്പട്ട, സ്വര്ണരാശി, വെള്ളി രാശി, ശ്രീപത്മനാഭന്റെ സ്വര്ണ വിഗ്രഹം എന്നിവയും വ്യാഴാഴ്ച ലഭിച്ചവയില്പെടുന്നു. കണ്ടെത്തിയ നിധി ശേഖരം സൂക്ഷിയ്ക്കാന് അറുപത്തിയഞ്ച് ചാക്കുകളും മൂന്ന് വലിയ ഇരുമ്പ് പെട്ടികളും വേണ്ടിവന്നുവവെന്ന് അറിയുമ്പോള് തന്നെ നിധിശേഖരം എത്രയുണ്ടെന്ന് വ്യക്തമാവും. സുപ്രീം കോടതി ഉത്തരവിനെ തുടര്ന്നാണ് ജൂണ് 27ന് നിലവറകള് തുറന്ന് പരിശോധിയ്ക്കാന് ആരംഭിച്ചത്. ഇതുവരെ നാല് അറകള് തുറന്നു. ഇനി ഒന്ന് കൂടി തുറക്കാനുണ്ട്.
https://www.facebook.com/Malayalivartha