പ്രത്യാഘാതം ഒഴിവാക്കാനുള്ള അഭിനയമായി ചിലര്ക്ക് മറവിയെ കൂട്ടുപിടിക്കാനാവും, പ്രശസ്ത മനോരോഗ വിദഗ്ധന് ഡോക്ടര് സി.ജെ.ജോണ് റിട്രോഗ്രേഡ് അംനീഷ്യയെ കുറിച്ച് വിശദീകരിക്കുന്നു
ഇപ്പോള് മെഡിക്കല് കോളജില് ചികില്സയില് കഴിയുന്ന ശ്രീറാം വെങ്കിട്ടരാമന് റിട്രോഗ്രേഡ് അംനീഷ്യ ആണെന്ന് ഡോക്ടര്മാര് വെളിപ്പെടുത്തിയിരുന്നു. ഏതെങ്കിലും ഒരു പ്രത്യേക സംഭവത്തെ കുറിച്ച് പൂര്ണ്ണമായും ഓര്ത്തെടുക്കാനാകാത്ത അവസ്ഥയാണ് ഈ രോഗം. ഈ രോഗമാണ് ഇപ്പോള് ശ്രീറാം വെങ്കിട്ടരാമനെ ബാധിച്ചിരിക്കുന്നതെന്ന് മെഡിക്കല് കോളജിലെ ഡോക്ടര്മാര് വ്യക്തമാക്കുന്നു.
പ്രശസ്ത മനോരോഗ വിദഗ്ധന് ഡോക്ടര് സി.ജെ.ജോണ് , ഏതൊക്കെ സാഹചര്യങ്ങളിലൂടെ കടന്നുപോകുന്നവര്ക്കാണ് രോഗം ബാധിക്കാന് സാധ്യതയുള്ളതെന്ന് വിശദീകരിക്കുന്നു. വര്ത്തമാന കാലത്തിന് തൊട്ട് മുമ്പുള്ള ഓര്മകള് അപ്രത്യക്ഷമാവുന്നതാണ് റിട്രോഗ്രേഡ് അംനീഷ്യയുടെ പ്രകൃതം. അതില് അപ്രീയ സംഭവങ്ങളും ഉള്പ്പെടാം. സംഭവത്തിന് മുന്പുള്ള ഈ നാളുകളെ കുറിച്ചുള്ള വിസ്മൃതി മാറ്റി നിര്ത്തിയാല് മറ്റ് ഓര്മ്മക്കുറവുകള് ഉണ്ടാകണമെന്നില്ലെന്ന് ഫെയ്സ്ബുക്ക് കുറിപ്പില് ഡോ. സി.ജെ ജോണ് വ്യക്തമാക്കുന്നു. റിട്രോഗ്രേഡ് അംനീഷ്യ പിറകോട്ടുള്ള വ്യത്യസ്ത കാലയളവുകളിലേക്ക് നീളാം . ഇത്തരം ഓര്മ്മക്കുറവ് ഉണ്ടാകുമ്പോള് പരിഗണിക്കേണ്ട അവസ്ഥകള് ഇതൊക്കെയാണ്.
തലയ്ക്ക് ഉലച്ചില്് ഉണ്ടാക്കുന്ന അപകടങ്ങളില് തലച്ചോറിന് കുലുക്കം സംഭവിക്കുന്ന വിധത്തില് ആഘാതം ഉണ്ടാകാറുണ്ട്. പോസ്റ്റ് കണ്കഷന് അവസ്ഥയില് സ്കാനിങ്ങില് പരുക്ക് കാണണമെന്നില്ല. ഓര്മകള് തിരിച്ചു വരികയോ വരാതിരിക്കുകയോ ചെയ്യാം. തൂങ്ങി മരിക്കാന് ശ്രമിച്ചു രക്ഷപ്പെടുന്നവര് കെട്ടി തൂങ്ങിയ കാര്യം മറന്നുവെന്ന് വരും. താല്ക്കാലികമായി തലച്ചോറിലേക്കുള്ള രക്തയോട്ടം കുറയുന്നതിന്റെ ഫലമാണിത്. തീവ്ര മാനസിക വേദന ഉണ്ടാക്കുന്ന സംഭവങ്ങള് മനസ് മുക്കി കളയുന്ന ഒരു മാനസികാരോഗ്യ പ്രവണതയായി കരുതാം. ഇത് ബോധപൂര്വ്വമല്ല. ആ സാഹചര്യത്തില് വിസ്മൃതി മനോനോവുകള് മൂടാനുള്ള പുതപ്പാണ്.
ഗുരുതര പ്രത്യാഘാതങ്ങളെ ഒഴിവാക്കാനുള്ള അഭിനയമായി ചിലര് മറവിയെ കൂട്ട് പിടിക്കാറുണ്ട്. കൃത്യമായി ചെയ്താല് കണ്ട് പിടിക്കാന് വളരെ ക്ലേശകരമാണ് ഇതെന്ന് ഡോക്ടര് അഭിപ്രായപ്പെടുന്നുണ്ട്. മദ്യത്തിന്റെയോ മറ്റ് ലഹരിയുടെയോ ആധിക്യത്തില് അതിന് അടിമപ്പെട്ട വേളയിലെ കാര്യങ്ങള് ആവിയായി പോകുന്ന മെമ്മറി ബ്ലാക്ക് ഔട്ട് ഉണ്ടാകാനും സാധ്യതയുണ്ട്. ലഹരി പദാര്ത്ഥങ്ങളുടെ സാന്നിധ്യം പരിശോധനയിലോ ഹിസ്റ്ററിയിലോ ഉണ്ടാകണം.
റെട്രോഗ്രേഡ് അംനേഷ്യ ഉള്ള അവസ്ഥയിലും അതുള്ളയാള് സാധാരണ നിലയില് പെരുമാറും. വിസ്മൃതിയുടെ ആ ദ്വീപ് മാറ്റി നിര്ത്തിയാല് മറ്റ് കാര്യങ്ങള് വിവേക പൂര്വ്വം ചെയ്യാം. മുകളില് കൊടുത്ത അവസ്ഥകളില് ഏതാണ് റെട്രോഗ്രേഡ് അംനേഷ്യക്കു നിമിത്തമാകുന്നതെന്ന് കണ്ടെത്തേണ്ടത് മെഡിക്കല് ടീമാണ്. അവര് അവസ്ഥ നിര്ണയിച്ച് വിധി പറഞ്ഞാല് പറഞ്ഞാല് അപ്പീലില്ല. ഒരു പ്രത്യേക സാഹചര്യത്തില് ഹൃസ്വമായ റെട്രോഗ്രേഡ് അംനേഷ്യ ഉണ്ടായിയെന്നത് ഉത്തരവാദിത്തപ്പെട്ട ജോലികളില് നിന്ന് ഒഴിവാക്കുവാനുള്ള കാരണമാകുന്നുമില്ല.
https://www.facebook.com/Malayalivartha