ലോകത്ത് ഇന്നും നന്മ അവശേഷിച്ചിട്ടുണ്ട്
അമേരിക്കയിലിതു കനത്ത മഞ്ഞു കാലമാണ്. നടപ്പാതകളും കാറോടിച്ചിറക്കാനുള്ള ഡ്രൈവ്വേയുമെല്ലാം മഞ്ഞിനടിയിലാണ്. മഞ്ഞു പെയ്തു കഴിഞ്ഞാല് പിന്നെ അതു കോരി വശത്തേയ്ക്ക് ഒതുക്കി മാറ്റിയിട്ടേ വഴി നടക്കാനോ വാഹനമോടിക്കാനോ ഒക്കെ പറ്റുകയുള്ളൂ.
ഈ മഞ്ഞു കാലത്ത് ഇപ്പോള് അമേരിക്ക ഒന്നാകെ പ്രശംസിക്കുന്നത് വെര്ജിനിയന് സംസ്ഥാനത്തെ ഒരു കൗമാരക്കാരനേയാണ്. പതിനെട്ടുകാരനായ ടോമി ആഡം, അമ്മ തെരേസ ആഡത്തിനൊപ്പം കാറില് വരികയായിരുന്നു. നോട്ടോവേ എന്ന സ്ഥലത്ത് എത്തിയപ്പോഴാണ് വഴിയിലെ മഞ്ഞു നീക്കാന് ബദ്ധപ്പെടുന്ന ഒരു വൃദ്ധനെ കണ്ടത്.
ഒരു മണ്കോരിക ഉപയോഗിച്ച് മഞ്ഞു നീക്കികളയാന് ശ്രമിക്കുന്ന അയാള്ക്കാകട്ടെ തനിയെ നടക്കാന് കഴിയുമായിരുന്നില്ല. നടക്കുന്നതിന് സഹായിക്കുന്ന വാക്കര് തള്ളിനീക്കുന്നതിന് ഒരു കൈ ഉപയോഗിക്കണം. മറ്റേ കൈ മാത്രമുപയോഗിച്ച് ഭാരമുള്ള മണ്കോരിക കൊണ്ട് മഞ്ഞ് കോരികളയാന് ശ്രമിച്ചിട്ട് സാധിക്കാതെ ബുദ്ധിമുട്ടുകയായിരുന്നു 76 കാരനായ കോള്മന്.
ഇതു കണ്ട് കൊണ്ടു വന്ന ടോമി അമ്മയോട് കാര് നിര്ത്താനാവശ്യപ്പെട്ടു. എന്തിനാണ് കാര് നിര്ത്താന് ആവശ്യപ്പെട്ടതെന്ന് അമ്മയ്ക്ക് മനസ്സിലായില്ലെങ്കിലും അവര് കാര് നിര്ത്തി. ടോമി പുറത്തിറങ്ങി കോള്മന്റെ കൈയ്യില് നിന്നും മണ്കോരിക വാങ്ങി ആ മഞ്ഞു മുഴുവന് വഴിയില് നിന്നു നീക്കി കൊടുത്തു. ആ സമയത്ത് അതുവഴി കടന്നു പോയ കാറുകളില് നിന്നൊന്നും ആരും ഇറങ്ങിയില്ല.
മഞ്ഞു കാലത്ത് ഇത് അവിടെ പതിവു കാഴ്ചയായതിനാല് ഇതിന് സഹായിക്കാനാരും ഇറങ്ങാന് സാധ്യതയില്ല. അവിടെയാണ് കോള്മനെ സഹായിക്കാന് ടോമി കാര് നിര്ത്തി ഇറങ്ങിയതിലെ മനുഷ്യസ്നേഹം തിരിച്ചറിയേണ്ടത്. ടോമിന്റെ വീടിനടുത്തെങ്ങുമായിരുന്നില്ല ആ സ്ഥലം. വീണ്ടും കാണാനിടയുള്ള പരിചയക്കാരനുമായിരുന്നില്ല കോള്മന്.
തന്റെ മകന്റെ മനസ്സിന്റെ നന്മ കണ്ടനുഭവിച്ച ആ അമ്മ അവന് മഞ്ഞു നീക്കുന്നതിന്റെ ചിത്രമെടുത്ത് ഫേസ്ബുക്കില് കൊടുത്തു. വെര്ജീനിയ ഗവര്ണര് ടെറി മക്ആള്ഫേ ഉള്പ്പെടെയുള്ളവര് ടോമിനെ അഭിനന്ദനം കൊണ്ട് പൊതിഞ്ഞു. ടോമി ആഡമിനെപ്പോലെയുള്ളവരുള്ള വെര്ജീനിയയെ കുറിച്ച് അഭിമാനിക്കുന്നുവെന്നാണ് ടെറി മാറ്റ് ആള്ഫേ പറഞ്ഞത്. ഫേസ് ബുക്കിലൂടെയും ട്വിറ്ററിലൂടെയും എല്ലാവരും ടോമിന്റെ സല്പ്രവൃത്തിയെ പ്രശംസിക്കുകയാണ്. നന്മയ്ക്കും മാന്യതയ്ക്കും നിറവും പ്രായപരിധിയും ഒന്നുമില്ലെന്നാണ് ഒരു ട്വീറ്റ്. ദൈവം നിന്നെ അനുഗ്രഹിക്കട്ടെ, നിന്നെപ്പോലുള്ള ഒരു പാട്പേരെ ലോകത്തിനാവശ്യമുണ്ടെന്നാണ് കോള്മന് പറഞ്ഞത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha