ഇത്രേ ഉള്ളൂ, മനസിലായോ പോലീസ്... യുവ ഐപിഎസ് ഓഫീസര് യതീഷ് ചന്ദ്ര താരമാകുന്നു; ജൂനിയര് ഋഷിരാജ് സിംഗെന്ന് സൈബര് ലോകം
ഇന്നലെ സംസ്ഥാനമാകമാനം നടന്ന ഹര്ത്താലിനിടെ താരമായ ഒരു യുവ പോലീസ് ഓഫീസറാണ് പി. യതീഷ് ചന്ദ്ര. അങ്കമാലിയില് നടന്ന അക്രമത്തെ സധൈര്യം മുന്നില് നിന്ന് നയിച്ച ആലുവ റൂറല് എസ്പി യതീഷ് ചന്ദ്രയെ സൈബര് ലോകം ഏറ്റെടുത്തു കഴിഞ്ഞു. വഴിതടയലിനെ ചോദ്യം ചെയ്ത പോലീസിനെ കല്ലെറിഞ്ഞവരെ ഓടിച്ചിട്ട് അടിച്ചൊതുക്കുകയായിരുന്നു യതീഷ് ചന്ദ്രയും സംഘവും. അക്രമങ്ങള്ക്ക് അറുതി വരുത്തിക്കൊണ്ട്, ഇത്രേ ഉള്ളൂ, മനസിലായോ പോലീസ്... എന്ന യതീഷ് ചന്ദ്രയുടെ അട്ടഹാസം ഇപ്പോള് യൂടൂബില് ഹിറ്റാണ്. ഇതിനിടെ യതീഷ് ചന്ദ്ര ഒരു വൃദ്ധനെ അടിച്ചത് ഏറെ വിവാദമാകുകയും ചെയ്തു.
ചിലര് ഋഷിരാജ് സിംഗിനോടാണ് യതീഷ് ചന്ദ്രയെ താരതമ്യം ചെയ്ത് രംഗത്തെത്തിയത്. കൂടാതെ യതീഷ് ചന്ദ്രയെ പിന്തുണച്ച് ഫേസ്ബുക്ക് ലൈക്ക് പേജും തുറന്നിരിക്കയാണ് ഒരു വിഭാഗം ആളുകള്.
ഇന്നലെ അങ്കമാലിയില് എല്ഡിഎഫ്. പ്രവര്ത്തകര് റോഡ് ഉപരോധിക്കുകയും വാഹനങ്ങള് തടയുകയും ചെയ്തതോടെയാണ് റൂറല് എസ്പിയും സംഘവും സ്ഥലത്തെത്തിയത്. തുടര്ന്ന് തടഞ്ഞുവച്ചിരിക്കുന്ന വാഹനങ്ങള് കടത്തി വിടാന് പ്രവര്ത്തകരോട് ആവശ്യപ്പെട്ടുവെങ്കിലും ഫലം കണ്ടില്ല. ഇതേച്ചൊല്ലി പ്രവര്ത്തകരും പൊലീസും തമ്മില് ഉന്തും തള്ളും ഉണ്ടായി. തുടര്ന്ന് പൊലീസ് ലാത്തി വീശി. സംഘര്ഷത്തില് ഏരിയ സെക്രട്ടറി ഉള്പ്പെടെയുള്ളവരെ പിടികൂടിയിരുന്നു.
ഇതില് ഇടതുപ്രവര്ത്തകരുടെ പ്രതിഷേധം ഇരമ്പുമ്പോഴാണ് യതീഷ് ചന്ദ്രയെ അനുകൂലിച്ച് ഫേസ്ബുക്ക് പേജും ഒരുവിഭാഗം ആളുകള് തുടങ്ങിയത്.യതീഷ് ചന്ദ്ര സപ്പോട്ടേഴ്സ് എന്ന പേരില് തുടങ്ങിയ ലൈക്ക് പേജില് ഇതിനോടകം തന്നെ നാലായിരത്തിലധികം പേര് ലൈക്ക് ചെയ്തു കഴിഞ്ഞു. കര്ണ്ണാകടക്കാരനായ യതീഷ് ചന്ദ്രയുടെ നേതൃത്വത്തില് പൊലീസ് നടത്തിയ ലാത്തിചാര്ജിനെതിരെ നിരവധി പ്രമുഖര് രംഗത്തെത്തിയിരുന്നു.
എന്നാല് തന്റെ ഡ്യൂട്ടിയുടെ ഭാഗമായാണ് ലാത്തിച്ചാര്ജ്ജ് നടത്തിയതെന്ന പക്ഷക്കാരനാണ് യതീഷ്. സംഭവത്തില് വിമര്ശനവുമായി പിണറായിയും വിഎസും രംഗത്തെത്തിയപ്പോള് സംഘര്ഷം നടക്കുമ്പോള് മുന്നിലുള്ളത് സിപിഐ(എം) നേതാവാണോ എന്ന് എങ്ങനെ തിരിച്ചറിയുമെന്ന ചോദ്യമാണ് ആലുവ റൂറല് എസ്പി ഉയര്ത്തിയത്. ഇതോടെ എസ്പിയെ പിന്തുണച്ച് നിരവധി പേര് രംഗത്തെത്തിയത്. അക്രമത്തെ അമര്ച്ച ചെയ്യാന് യതീഷ് ചന്ദ്ര രാഷ്ട്രീയത്തിന്റെ മുഖം നോക്കിയില്ല എന്നതാണ് യുവ ജനതയെ ആകര്ഷിച്ചത്. സിപിഎമ്മിന്റെ തട്ടകത്ത് പോയി ഏരിയ സെക്രട്ടറിയെ വരെ പൊക്കിയെടുത്ത് നിയമത്തിന്റെ മുമ്പില് നിര്ത്തി. ഇതാണ് ഇപ്പോള് യതീഷ് ചന്ദ്രയ്ക്ക് കൈയ്യടി നേടിക്കൊടുത്തത്.
ഇതിനിടെ പ്രായമായ ആളിനെ എസ്.പി അടിച്ചതിനെ ന്യായീകരിച്ചും പലരും രംഗത്തെത്തി. ഹര്ത്താല് ദിനത്തില്, ഇത്രയൊക്കെ സംഘര്ഷം നടന്ന സ്ഥലത്ത് ആ പ്രായമായ ആള് എന്തിന് നിന്നു എന്നും ചോദിക്കുന്നവരാണ് അധികവും. സമരക്കാരുടെ ഇടയിലാണ് അയാളും നിന്നത്. എസ്പിയെ കല്ലെറിയാറായോ എന്ന് ചോദിച്ചായിരുന്നു അടി. അതും അദ്ദേഹത്തെ അടിച്ചത് മുട്ടിന് താഴോട്ടുമാണ്. കൊണ്ടത് കൈയ്യിലുമാണ്. അടി കിട്ടിയിട്ടും അയാള്ക്കൊന്നും പറ്റിയതുമില്ല.
എസ്.പിയുടെ ഇടപെടലോടെ അങ്കമാലിയില് വഴിതടഞ്ഞവര് ഓടിയൊളിച്ചു. എന്തിനും ഏതിനും ഹര്ത്താല് നടത്തുന്നവര്ക്ക് ഇതൊരു പാഠമാണ്. ജീവനില് കൊതിയുള്ളതു കൊണ്ട് മാത്രമാണ് സാധാരണക്കാര് ഹര്ത്താലിന് പുറത്തിറങ്ങാത്തത്. ആല്ലാതെ ഈര്ക്കില് പാര്ട്ടികളോടുള്ള അനുഭാവം കൊണ്ടൊന്നുമല്ല. ഇതുപോലുള്ള പോലീസ് ഓഫീസര്മാര് ഉണ്ടെങ്കില് കേരളത്തില് ആരും വഴിതടയില്ലെന്നാണ് പൊതുജനത്തിന്റെ വിലയിരുത്തല്.
ഇന്നലെ നടന്ന ലാത്തിചാര്ജിന്റെ വീഡിയോ കൂടി കാണുക
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha