വാടക വീട്ടില് അച്ചന് ഒറ്റയ്ക്കാണെങ്കിലെന്താ... അകലെ നിന്നുകൊണ്ട് തരുന്നതും അച്ചന്റെ സംരക്ഷണമല്ലേ?
മേലേചിന്നാര് വാതല്ലൂര് വി.പി.ഷിനു വിദേശത്തു നിന്നെത്തിയ ആളാണ്. എന്നാല് രോഗലക്ഷണം ഇല്ലെങ്കിലും ഷിനു മുന്കരുതല് നടപടികളുടെ ഭാഗമായി വീടിനു സമീപം വാടക വീടെടുത്ത് ഒറ്റയ്ക്കു താമസിക്കുകയാണ്. വീട്ടുകാരും നാട്ടുകാരും ആരോഗ്യ പ്രവര്ത്തകരുമായി യാതൊരു സമ്പര്ക്കവും ഉണ്ടാകാതിരിക്കാന് ഷിനു പ്രത്യേകം ശ്രദ്ധിക്കുന്നു. അതിന് ഷിനു പറയുന്ന കാരണം ഓരോ മലയാളിക്കുമുള്ള സന്ദേശമാണ്. 'കുടുംബത്തെ വല്ലപ്പോഴും മാത്രം കണ്ട് 6 വര്ഷം വിദേശത്ത് ജോലി ചെയ്യാന് കഴിഞ്ഞെങ്കില് 14 ദിവസം അവരെ ദൂരെ നിന്നു മാത്രം കണ്ടു കഴിയാന് സാധിക്കും' -
മസ്കറ്റില് ജോലി ചെയ്തിരുന്ന ഷിനു വര്ഷങ്ങള്ക്കു ശേഷം ഇക്കഴിഞ്ഞ 22-നാണ് നാട്ടില് മടങ്ങി എത്തിയത്. നാട്ടിലെ സ്ഥിതിഗതികള് മനസ്സിലാക്കിയിരുന്നതിനാല് വിദേശത്തായിരിക്കുമ്പോള് തന്നെ നാട്ടിലെ സ്വന്തം വീടിനു സമീപമുള്ള മറ്റൊരു വീട് വാടകയ്ക്കു ലഭ്യമാക്കി. നെടുമ്പാശേരി വിമാനത്താവളത്തില് നിന്നു കൂട്ടിക്കൊണ്ടു പോരാന് കുടുംബാംഗങ്ങളെ അനുവദിച്ചില്ല. പരിശോധനകള്ക്കു ശേഷം പുറത്തിറങ്ങി സുരക്ഷാ മുന്കരുതലുകള് സ്വീകരിച്ച് ടാക്സിയില് നാട്ടിലേക്കു പുറപ്പെട്ടു. നേരെ വാടക വീട്ടിലേക്കാണ് എത്തിയത്.
അരി ഉള്പ്പെടെയുള്ള സാധനങ്ങള് വാങ്ങിസൂക്ഷിക്കാന് വീട്ടില് എത്തുന്നതിനു മുന്പുതന്നെ കുടുംബാംഗങ്ങളോട് നിര്ദേശിച്ചിരുന്നു. ഭക്ഷണം സ്വയം പാചകം ചെയ്താണു കഴിക്കുന്നത്. അച്ഛനമ്മമാരെയും ഭാര്യയെയും ഒരു വയസ്സുകാരനായ മകനെയും അകലെ നിന്നു മാത്രമാണ് കാണുക. ആരോഗ്യ പ്രവര്ത്തകര് എത്തിയാല് വീട് തുറന്ന് സിറ്റൗട്ടില് ഇറങ്ങി നിന്ന് ആശയവിനിമയം നടത്തും. മറ്റുള്ളവര്ക്ക് ഇതൊരു മാതൃകയാണെന്നാണ് ആരോഗ്യ പ്രവര്ത്തകര് പറയുന്നത്.
https://www.facebook.com/Malayalivartha