കേരളക്കരയില്‍ ഇവര്‍ അഭിമാനമായി. ധീരമായ തീരുമാനങ്ങളും ആരെയും കൂസാത്ത ചുവട്‌വയ്പ്പുകളുമായി സധൈര്യം തങ്ങളുടെ ജോലിയുമായി മുന്നോട്ട് പോവുകയാണ് ഇവര്‍. സാമൂഹിക സേവനം മുന്നില്‍ കണ്ട് കഠിന പ്രയത്‌നത്തിലൂടെ സിവില്‍ സര്‍വീസില്‍ പ്രവേശിച്ചവരാണിവര്‍. ഇവര്‍ കാണുന്നത് ജനങ്ങളുടെ നന്‍മയാണ്. രാഷ്ടീയക്കാരുടെ ഇംഗിതത്തിനോ ഗുണ്ടകളുടെ പേടിപ്പെടുത്തലിനോ ഇവര്‍ നിന്ന് കൊടുക്കില്ല. ധീരമായ തീരുമാനങ്ങളിലൂടെ മലയാളികളുടെ അഭിമാനമായി മാറിയിരിക്കുകയാണ് ഈ പോലീസ് ഉദ്യോഗസ്ഥര്‍. നവമാധ്യമങ്ങളില്‍ ഇവര്‍ക്ക് കിട്ടുന്ന പിന്തുണ വളരെ വലുതാണ്.
മലയാളികളുടെ ഇഷ്ടപ്പെട്ട പൊലീസ് ഓഫീസറായ ഋഷിരാജ് സിംഗിലൂടെയാണ് ഇത്തരമൊരു കാക്കി പ്രേമത്തിന് സോഷ്യല്‍ മീഡിയ തുടക്കമിട്ടത്. ഇപ്പോള്‍ ഒടുവില്‍, അത്  എത്തിനില്‍ക്കുന്നത് ആലുവ റൂറല്‍ എസ് പി യതീഷ് ചന്ദ്ര ഐപിഎസിലാണ്. മൂന്നാര്‍ ഓപ്പറേഷന്റെ സമയത്ത് ഫേസ്ബുക്ക് പോലുള്ള മാദ്ധ്യമങ്ങള്‍ അത്രയ്ക്ക് സജീവമായിരുന്നില്ല. അന്ന് ചാനലുകളുടെ കാലമായതിനാല്‍ മീശ പിരിച്ചെത്തിയ ഹരിയാനക്കാരനായ ഋഷിരാജ് സിംഗിനെ താരമാക്കിയത് ഈ ചാനലുകളായിരുന്നു. പിന്നീട് ഫേസ്ബുക്ക് സജീവമായതോടെ കേരളത്തില്‍ തിരികെ എത്തിയ സിംഗിനെ മലയാളികള്‍ തങ്ങളുടെ പ്രിയപ്പെട്ട \'സിങ്ക\'മാക്കി.
രാഷ്ട്രീയക്കാരെ വകവെക്കാതെ തനിക്ക് ഇഷ്ടമുള്ള കാര്യങ്ങള്‍ ധൈര്യസമേതം ചെയ്യുന്ന ഋഷിരാജ് അങ്ങനെ സൈബര്‍ ലോകത്തിന്റെ ഇഷ്ടതാരമായി മാറി. മോട്ടോര്‍ വാഹന വകുപ്പിന്റെ മേധാവിയായി നിയോഗിക്കപ്പെട്ട വേളയിലാണ് അദ്ദേഹം ശരിക്കും താരമായത്. മന്ത്രിമാരുടെ വാഹനങ്ങള്‍ക്ക് വേഗപ്പൂട്ട് വേണമെന്ന സിംഗിന്റെ നിര്‍ദ്ദേശം കൈയടികളോടെ സൈബര്‍ലോകവും സ്വീകരിച്ചു. ഈ സമയത്താണ് മോഹന്‍ലാല്‍ സിംഗിനെ പ്രശംസിച്ച് ബ്ലോഗ് പോലും എഴുതിയത്. ഇപ്പോള്‍ കെഎസ്ഇബിയുടെ വൈദ്യുതി മോഷണം തടയുന്ന സംഘത്തിന്റെ മേധാവിയാണ്. ഇദ്ദേഹത്തിന്റെ നേതൃത്വത്തില്‍ മാസം തോറം സംസ്ഥാന ഖജനാവിലെത്തുന്നത് കോടികളാണ്.
സോഷ്യല്‍ മീഡിയ താരമാക്കിയ രണ്ട് ഐപിഎസ് ഉദ്യോഗസ്ഥരുണ്ട്. സിഎന്‍എന്‍ ഐബിഎന്നിന്റെ പേഴ്‌സണ്‍ ഓഫ് ദ ഇയര്‍ പോപ്പുലര്‍ ചോയിസ് പുരസ്‌ക്കാരം നേടിയ പി വിജയനും ആലുവ റൂറല്‍ എസ്പി ജി എച്ച് യതീഷ് ചന്ദ്രയുമാണ് ഇവര്‍. ദേശീയ ചാനലിന്റെ അവാര്‍ഡ് നിര്‍ണ്ണയ പട്ടികയില്‍ ഇടം പിടിച്ചതോടെയാണ് പി വിജയന്‍ ഐപിഎസിനു വേണ്ടി സോഷ്യല്‍ മീഡിയ ആവേശത്തോടെ പ്രവര്‍ത്തിച്ചത്. ദുരിതപൂര്‍ണ്ണമായ സാഹചര്യങ്ങളോട് പടവെട്ടി ഐപിഎസ് നേടിയ വിജയനെ ചാനല്‍ താരമാക്കാന്‍ മലയാളികള്‍ അരയും തലയും മുറുക്കി രംഗത്തിറങ്ങി. മറ്റാര്‍ക്കും കിട്ടാത്ത അത്രയും വോട്ടുകള്‍ നേടി പുരസ്‌ക്കാരം വിജയന്‍ കേരളത്തിലെത്തിച്ചു.
ആലുവ റൂറല്‍ എസ്പി യതീഷ് ചന്ദ്ര ഐപിഎസിനെ ജനങ്ങള്‍ തിരിച്ചറിഞ്ഞത് ഹര്‍ത്താല്‍ ദിനത്തില്‍ അങ്കമാലിയില്‍ നടത്തിയ ലാത്തിചാര്‍ജ്ജിലൂടെയായിരുന്നു. വഴിയാത്രക്കാരനായ വയോധികനെ മര്‍ദ്ദിച്ചതിന്റെ പേരില്‍ കര്‍ണ്ണാടക സ്വദേശിയായ ഈ യുവ ഐപിഎസ് ഓഫീസര്‍ കടുത്ത വിമര്‍ശനം ഫേസ്ബുക്കിലൂടെ നേരിട്ടു. ഇടതു നേതാക്കള്‍ ഒന്നടങ്കം എതിര്‍പ്പുമായി രംഗത്തെത്തിയപ്പോള്‍ പിന്തുണയുമായി മറ്റൊരു വിഭാഗവും എത്തുകയായിരുന്നു. സിപിഎമ്മുകാര്‍ക്കിട്ട് രണ്ട് പൊട്ടിച്ച ഐപിഎസുകാരന്‍ എന്ന നിലയില്‍ ഒന്നിലേറെ സപ്പോര്‍ട്ട് ഫേസ്ബുക്ക് പേജുകളാണ് യതീഷിന് വേണ്ടി മലയാളികള്‍ ഒരുക്കിയത്.
കൊച്ചിയില്‍ എസിപിയായി ചാര്‍ജ്ജെടുത്ത പി നിശാന്തിനി ഐപിഎസാണ് സോഷ്യല്‍ മീഡിയയിലെ മറ്റൊരു താരം. കൊച്ചിയിലെ മയക്കുമരുന്ന് മാഫിയകള്‍ക്കെതിരെ നിലപാട് സ്വീകരിച്ചതാണ് നിശാന്തിനിയെ താരമാക്കിയത്. ആഡംബര ഹോട്ടലുകളിലെ പാര്‍ട്ടികളില്‍ മയക്കുമരുന്ന് ഉപയോഗിക്കുന്നുണ്ട് എന്ന വിവരത്തിന്റെ അടിസ്ഥാനത്തില്‍ വേഷം മാറി പോലും അവര്‍ റെയ്ഡ് നടത്താന്‍ എത്തി. ഇത് മാധ്യമങ്ങളില്‍ വാര്‍ത്തയായതിനോടൊപ്പം ഫേസ്ബുക്കില്‍ നിശാന്തിനിയെ വാഴ്ത്തിക്കൊണ്ടും രംഗത്തെത്തി ചിലര്‍. ഒടുവില്‍, കൊക്കെയ്ന്‍ കേസിന്റെ അന്വേഷണത്തിനിടെ ഇവരെ തൃശ്ശൂരിലേക്ക് സ്ഥലം മാറ്റിയതോടെ നിശാന്തിനിയെ മാറ്റിയത് അന്വേഷണം അട്ടിമറിക്കാനാണെന്ന വിധത്തിലുള്ള പ്രചരണങ്ങള്‍ക്കിടയാക്കി . അവസാനം തൃശൂരില്‍ ചന്ദ്രബോസ് കൊലക്കേസ് പ്രതി മുഹമ്മദ് നിസാമിനെ കാപ്പ ചുമത്തി അകത്തിട്ടത് നിശാന്തിനിയുടെ നേതൃത്വത്തിലാണ്.
ഐപിഎസ് ട്രെയിനി ആയിരിക്കെ തന്നെ സോഷ്യല്‍മീഡിയ താരമാക്കിയത് മെറിന്‍ ജോസഫ് ഐപിഎസ് എന്ന കോട്ടയത്തുകാരിയെ ആയിരുന്നു. ഇതിന്റെ കാരണമാകട്ടെ മെറിന്‍ ജോസഫ് ഐപിഎസ് നല്ല സുന്ദരിയായിരുന്നു എന്നത് മാത്രമായിരുന്നു. മെറിന്റെ സൗന്ദര്യം കണ്ട് അവര്‍ കൊച്ചി നഗരത്തില്‍ എസിപിയായി ചാര്‍ജ്ജെടുക്കാന്‍ പോകുന്നു എന്ന ഗോസിപ്പും പ്രചരിച്ചു. ഇതോടെ എന്നെ അറസ്റ്റു ചെയ്യൂ എന്ന വിധത്തിലുള്ള പോസ്റ്റുകള്‍ ഫേസ്ബുക്കില്‍ നിറയുകയും ചെയ്തു. ഒടുവില്‍ മെറിന്‍ വിശദീകരണവുമായി രംഗത്തെത്തുകയും ചെയ്തു. എന്തായാലും സോഷ്യല്‍ മീഡിയയുടെ ആഘോഷത്തിന്റെ ബാക്കിപത്രമെന്നോണം എറണാകുളം ജില്ലയില്‍ തന്നെ മെറിന് ആദ്യ പോസ്റ്റിംഗും ലഭിച്ചു. ഇതും നവമാദ്ധ്യമങ്ങളിലൂടെ ഏറെ ആഘോഷിക്കപ്പെട്ടു. ഒടുവില്‍ മെറിന്റെ വിവാഹം പോലും മാദ്ധ്യമങ്ങളില്‍ വാര്‍ത്തയായി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha