ഇന്നലെ സംസ്ഥാനത്തെ മറ്റ് 5 അതിര്‍ത്തി ചെക്‌പോസ്റ്റുകള്‍ക്കൊപ്പം ഇതര സംസ്ഥാനങ്ങളിലുള്ള മലയാളികള്‍ക്കായി വയനാട് മുത്തങ്ങ അതിര്‍ത്തി ചെക്‌പോസ്റ്റ് തുറന്നു. താല്‍ക്കാലിക കോവിഡ് മിനി ആരോഗ്യ കേന്ദ്രത്തില്‍ പരിശോധനകള്‍ പൂര്‍ത്തിയാക്കിയാണ് കേരളത്തിലേക്കുള്ള പ്രവേശനം. ഇന്നലെ വൈകിട്ട് 6.30 വരെ 39 വാഹനങ്ങളിലായി 237 പേര്‍ അതിര്‍ത്തി കടന്നെത്തി.

മൈസൂരു ഓള്‍ ഇന്ത്യ ഇന്‍സ്റ്റിറ്റ്യൂട്ട് ഓഫ് സ്പീച്ച് ആന്‍ഡ് ഹിയറിങ് തെറപ്പി സെന്ററില്‍ കഴിഞ്ഞ ഒന്നര മാസത്തോളമായി കുടുങ്ങിക്കിടന്ന 106 പേര്‍ 3 ബസുകളിലായി അതിര്‍ത്തിയിലെത്തി. തുടര്‍ന്ന് അതിര്‍ത്തിക്കിപ്പുറം തയാറാക്കിയിട്ടിരുന്ന ബസുകളില്‍ കയറി നാടുകളിലേക്ക് യാത്ര തുടര്‍ന്നു.

അഹമ്മദാബാദില്‍ നിന്ന് കാറിലെത്തിയ സംഘത്തിലെ മലപ്പുറം കരുവാരകുണ്ട് സ്വദേശിയായ ഡ്രൈവറെ രോഗലക്ഷണങ്ങളോടെ ബത്തേരി താലൂക്ക് ആശുപത്രിയിലെ കോവിഡ് നിരീക്ഷണ കേന്ദ്രത്തിലാക്കി.

പല ആവശ്യങ്ങള്‍ക്കും ചികിത്സയ്ക്കുമൊക്കെയായി ഇതര സംസ്ഥാനങ്ങളിലേക്ക് പോയവരാണ് പലരും. പൊടുന്നനെ ലോക്ഡൗണ്‍ വന്നതോടെ തിരിച്ചു വരാനാവാതെ കുടുങ്ങിപ്പോയി. ആഴ്ചകളോളം ഇതര സംസ്ഥാനങ്ങളില്‍ കുടുങ്ങിപ്പോയവര്‍ നാടിന്റെ അതിര്‍ത്തി കടന്നപ്പോള്‍ മനം നിറഞ്ഞ് അറിയാതെ തേങ്ങി. ബന്ധുക്കളെയും മാതാപിതാക്കളെയും കാണാനാവാതെ, ശരിയായ താമസ സൗകര്യങ്ങളില്ലാതെ ആഴ്ചകള്‍ നീണ്ട വാസം. ഒടുവില്‍ തടസ്സങ്ങള്‍ നീങ്ങിയതോടെ മുന്‍ഗണനാ ക്രമത്തില്‍ ഓരോരുത്തരായി അതിര്‍ത്തി കടന്നു തുടങ്ങി.

മൈസൂരു ഓള്‍ ഇന്ത്യ ഇന്‍സ്റ്റിറ്റ്യൂട്ട് ഓഫ് സ്പീച്ച് ആന്‍ഡ് ഹിയറിങ് തെറപ്പി സെന്ററില്‍ കഴിഞ്ഞ 6 ആഴ്ചയായി കുടുങ്ങിക്കിടന്ന കുട്ടികളും മാതാപിതാക്കളും അടങ്ങുന്ന 106 പേരില്‍ ശ്രവണ, സംസാര വെല്ലുവിളികള്‍ നേരിടുന്ന കുട്ടികള്‍ ഉള്ളതിനാല്‍ പ്രത്യേക പരിശോധനയ്ക്ക് പ്രവേശിപ്പിച്ചില്ല. വീടുകളിലെത്തിയ ശേഷം ഇവരുടെയെല്ലാം ആരോഗ്യ പരിശോധന നടത്താനാണ് തീരുമാനം.

ഇവരെ വീടുകളിലേക്ക് യാത്രയാക്കിയത് അതിര്‍ത്തിയില്‍ കാത്തു കിടന്ന ബസുകളിലേക്ക് മാറ്റിക്കയറ്റിയാണ്. എല്ലാവരെയും കോണ്‍വോയ് അടിസ്ഥാനത്തില്‍ കോഴിക്കോട് അതിര്‍ത്തിയായ ലക്കിടിയിലും കണ്ണൂര്‍ അതിര്‍ത്തിയായ പേര്യയിലും വയനാട് പൊലീസ് എത്തിച്ചു. തുടര്‍ന്ന് മറ്റു ജില്ലകളിലെ പൊലീസാണ് അകമ്പടി സേവിച്ചത്. ദിവസവും രാവിലെ 7 മുതല്‍ മുത്തങ്ങ വഴി പ്രവേശനം അനുവദിക്കും.