വൈകിയെത്തുന്ന പോലീസുകാര്‍ക്കെതിരെ നടപടി സ്വീകരിച്ച കൊച്ചി സിറ്റി ഡെപ്യൂട്ടി പോലീസ് കമ്മിഷണറായ ഹരിശങ്കറുടെ നടപടി റദ്ദു ചെയ്തു. സാധാരണക്കാര്‍ക്ക് മാത്രമല്ല നടപ്പാക്കുന്ന പോലീസും നിയമം പാലിക്കണമെന്ന കര്‍ക്കശ നിലപാടാണ് ഹരിശങ്കര്‍ തിരുമാനിച്ചത്. ഇത് പ്രകാരം വൈകിയെത്തുന്ന പോലീസുകാര്‍ക്കെതിരെ മുന്നറിയിപ്പ് നല്‍കുകയും ചെയ്തിരുന്നു. എന്നാല്‍ അതിന് പോലീസുകാര്‍ പുല്ല് വിലയാണ് കല്‍പ്പിച്ചത്.
പോലീസുകാരുടെ ഡ്യൂട്ടി സമയം തുടങ്ങുന്നത് ഏഴ് മണിക്കാണ്. 7 മണിക്ക് എത്തണമെന്ന് ഡിസിപി പറഞ്ഞപ്പോള്‍ വിവാദമായതിനെ തുടര്‍ന്നാണ് ഒരു മണിക്കൂര്‍ ഇളവ് അനുവദിച്ച് 8 മണിയാക്കിയത്. എന്നിട്ടു പോലും ഒന്നും രണ്ടും മണിക്കൂര്‍ വൈകിയെത്തുകയും എട്ടുമണിക്കു വന്നതായി സ്‌റ്റേഷന്‍ ഡയറിയില്‍ രേഖപ്പെടുത്തുകയുമാണു ചില പൊലീസുകാര്‍ ചെയ്യുന്നത്.
ഇത് മനസിലാക്കിയ ഡിസിപി താമസിച്ചെത്തുന്നവരെ പിടികൂടാന്‍ പദ്ധതി തയ്യാറാക്കി. സ്‌റ്റേഷനുകളില്‍ പോലീസുകാര്‍ കൃതൃ സമയത്ത് എത്തുന്നില്ല എന്നറിഞ്ഞതോടെ സ്‌പെഷ്യല്‍ ബ്രാഞ്ച് ഉദ്യോഗസ്ഥരെ അയച്ചു സ്‌റ്റേഷന്‍ ഡയറി പരിശോധിക്കുകയും നൂറ്റി അറുപതോളം പോലീസുകാര്‍ എട്ട് മണിക്ക് ഹാജരായിട്ടില്ലെന്ന് കണ്ടെത്തുകയുമായിരുന്നു. തുടര്‍ന്നാണ് താമസിച്ചെത്തിയവരെ അവധിയില്‍ വിട്ടത്.
കൂട്ടത്തോടെ പോലീസുകാര്‍ക്കെതിരെ എടുത്ത നടപടിയില്‍ പ്രതിഷേധം ഇരമ്പി. പ്രബലരായ പല പോലീസുകാരും നാണം കെട്ടു. പ്രശ്‌നത്തില്‍ പോലീസ് സംഘടനയും ഇടപെട്ടു. സംഭവം വിവാദമായതോടെ ആഭ്യന്തരമന്ത്രി രമേശ് ചെന്നിത്തല പ്രശ്‌നത്തിലിടപെട്ട് ഉന്നത പോലീസുദ്യോഗസ്ഥരോടു വിശദീകരണം തേടി. ഇതേത്തുടര്‍ന്നാണ് പുതുതായി ചുമതലയേറ്റ ഡിസിപിയുടെ വിവാദ നടപടി റദ്ദാക്കാന്‍ ഉന്നത പോലീസ് നേതൃത്വം തീരുമാനിച്ചത്. 
സംസ്ഥാനത്തെമ്പാടും സ്‌റ്റേഷനുകളില്‍ പോലീസുകാര്‍ ഒമ്പതുമണിക്കുള്ളില്‍ ജോലിക്കു ഹാജരാകുന്നതാണു പതിവ് എന്നാണ് പോലീസുകാരുടെ ഭാഷ്യം. ആ പതിവ് കൊച്ചിയില്‍ മാത്രം എന്തിനാ തെറ്റിക്കുന്നത്. ഇത് രാവിലെ 7.30 ഉം പിന്നീട് 8 മണിയും ആക്കി നടപടിക്കിറങ്ങിയ ഡി.സി.പിയുടെ നിര്‍ദ്ദേശം പെരുവഴിയിലായി. അങ്ങനെ ഹരിശങ്കര്‍ ചങ്കൂറ്റത്തോടെയെടുത്ത തീരുമാനം അതിലേറെ ചങ്കൂറ്റത്തോടെ പോലീസുകാര്‍ പൊളിച്ചു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha