ചൈനീസ് അക്കാദമി ഓഫ് സയന്‍സസില്‍ ഗവേഷണ വിദ്യാര്‍ഥിനിയായ അനില അജയന്‍, കോവിഡിനു ശേഷമുള്ള വുഹാനെ കുറിച്ചെഴുതുന്നു. വുഹാന്‍ ഇപ്പോള്‍ ആശ്വാസത്തിലാണത്രേ.

ലോകത്ത് ആദ്യമായി കോവിഡ് റിപ്പോര്‍ട്ട് ചെയ്ത ചൈനയിലെ വുഹാനില്‍ എല്ലാവരേയും ഏതാനും ദിവസം കൊണ്ട് കോവിഡ് പരിശോധനയ്ക്കു വിധേയരാക്കി. രോഗലക്ഷണമില്ലാത്തവരടക്കം എല്ലാവരെയും ചേര്‍ത്ത് കൂട്ട പരിശോധനയായിരുന്നു. 19 ദിവസം കൊണ്ട് ഒരുകോടി ആളുകളെയാണ് പരിശോധിച്ചത്. ഈ കൂട്ടപരിശോധനയില്‍ കോവിഡ് കണ്ടെത്തിയത് 300 പേര്‍ക്കു മാത്രം. ഇവരോട് അടുത്തിടപഴകിയ രണ്ടായിരത്തോളം പേര്‍ക്കു രോഗമില്ല.

രോഗസാധ്യത തിരിച്ചറിഞ്ഞ് രോഗികളും അല്ലാത്തവരും എടുക്കുന്ന മുന്‍കരുതലിന്റെ ഫലമാണിത്. രോഗബാധിതരെയും രോഗസാധ്യതയുള്ളവരെയും ഫെബ്രുവരി അവസാനത്തോടെ തന്നെ ചൈന ആശുപത്രികളിലേക്കു മാറ്റിയിരുന്നു. ഹോം ഐസലേഷന്‍ അനുവദിക്കാത്തതു വ്യാപനം കുറയാന്‍ സഹായിച്ചു.

ഇവിടെ റസിഡന്‍സ് അസോസിയേഷനുകള്‍ ഉള്ളതുപോലെ അവിടെയുള്ളത് കമ്യൂണിറ്റികളാണ്. ഓരോ കമ്യൂണിറ്റുകളും കേന്ദ്രീകരിച്ചു വീടുവീടാന്തരം നടത്തിയ പരിശോധനയും ഫലപ്രദമായിരുന്നു. ഇതിന് ആരോഗ്യപ്രവര്‍ത്തകര്‍ മാത്രമായിരുന്നില്ല. വൊളന്റിയര്‍മാരുമുണ്ടായിരുന്നു. പിന്നൊന്ന്, പ്രതിരോധശേഷി കൂട്ടാന്‍ സ്വീകരിച്ച നടപടികളാണ്. ഇതിനുള്ള പരമ്പരാഗത മരുന്നുകളുടെ സൗജന്യ വിതരണം വ്യാപകമായി നടത്തി. എല്ലാവരും ഇതുപയോഗിക്കുന്നുണ്ട്.

കോവിഡിനു മുമ്പുള്ള വുഹാന്റെ സാധാരണ ജീവിതവും കോവിഡ് കാലവും ഇപ്പോഴത്തെ പുതുജീവിതവും കാണാന്‍ കഴിഞ്ഞു. ഒരുപാടു മാറ്റങ്ങളിലൂടെ, നഷ്ടമായതെല്ലാം തിരിച്ചുപിടിക്കാനുള്ള ശ്രമം എവിടെയും ദൃശ്യമാണ്. ഇപ്പോള്‍, ചൈനയിലുള്ളവരുടെ മൊബൈല്‍ ഫോണുകളിലേക്കു വൈകുന്നേരം പ്രത്യേക മെഡിക്കല്‍ ബുള്ളറ്റിന്‍ എത്തും. ഇന്ന് എത്ര പേര്‍ക്ക് രോഗം സ്ഥിരീകരിച്ചെന്നും മറ്റുമുള്ള വിവരങ്ങള്‍. ഒപ്പം, ജാഗ്രതാ നിര്‍ദേശങ്ങളും.

പുതിയ ലോകക്രമത്തില്‍ മുന്‍കരുതലുകളെടുക്കാനും ആശ്വാസത്തോടെ പുറത്തിറങ്ങാനും ഓവര്‍ടൈം ജോലി ചെയ്യാനും പ്രേരിപ്പിക്കുന്നത് അതാണ്. നികുതി ഇളവും ജോലി നഷ്ടപ്പെട്ടവര്‍ക്കുള്ള പ്രത്യേക പദ്ധതികളും വഴി ആശ്വാസമെത്തിക്കാനും സര്‍ക്കാര്‍ ശ്രമിക്കുന്നുണ്ട്.