തൃശൂര്‍ നഗരത്തിലെ ആശുപത്രിയിലെ ഡോക്ടറായ സച്ചിന്‍ ലോക്ഡൗണ്‍ കാലത്താണ് പുതിയ സൈക്കിള്‍ വാങ്ങിയത്. 5 മാസത്തിനു ശേഷം കോവിഡ് ലോക്ഡൗണിന്റെ ഇളവുകള്‍ വന്നതോടെ സച്ചിന്‍ അവധിയെടുത്ത് വീട്ടിലേക്കു വരാന്‍ ഒരുങ്ങി. 5 മാസമായി ജോലിയില്‍ തന്നെയായിരുന്നു.

ഇതിനിടെയാണ് ലോക സൈക്കിള്‍ ദിനം വന്നത്. അതോടെ പുലര്‍ച്ചെ എഴുന്നേറ്റത് പുതിയൊരു സ്വപ്നയാത്രയുമായിട്ടാണ്. സമൂഹ മാധ്യമത്തിലെ പോസ്റ്റിനു പകരം ആരോഗ്യ പ്രവര്‍ത്തകന്‍ എന്ന നിലയില്‍ മാതൃകായാത്ര ഒരുക്കിയാലോ എന്നായി സച്ചിന്റെ ചിന്ത. അങ്ങനെയാണ് കണ്ണൂര്‍ ശ്രീകണ്ഠപുരം പരിപ്പായിയിലെ വീട്ടിലേക്ക് 230 കിലോമീറ്റര്‍ നീളുന്ന സൈക്കിള്‍ യാത്രക്ക് തയ്യാറായത്.

ഇന്നലെ പുലര്‍ച്ചെ 5-ന് തൃശൂരില്‍ നിന്നു പുറപ്പെട്ടു. 230കി.മീ താണ്ടി വൈകിട്ട് ഏഴോടെ വീട്ടിലെത്തി. കോവിഡിന്റെ പശ്ചാത്തലത്തില്‍ സാമൂഹിക അകലം പാലിച്ച് യാത്ര ചെയ്യാനുമായിട്ടാണ് സൈക്കിള്‍ തിരഞ്ഞെടുത്തതെന്നു സച്ചിന്‍ പറഞ്ഞു. 5 ദിവസം അവധി കഴിഞ്ഞ് സൈക്കിളില്‍ തന്നെ മടങ്ങാനാണ് സച്ചിന്റെ പ്ലാന്‍.