6 വെറ്ററിനറി ഡോക്ടര്മാര് ചേര്ന്ന് റോക്കിയെ പായും പുലിയാക്കി!
മൂവാറ്റുപുഴ കിളികുളം നാരോത്ത് ജോയിയുടെ വളര്ത്തു നായയായ റോക്കി അടുത്തിടെ അസ്വസ്ഥനും ദേഷ്യക്കാരനുമായി മാറി. കണ്ണില് കാണുന്നവരെയൊക്കെ ആക്രമിക്കാനും തുടങ്ങി. അതിന് അവനൊരു കാരണമുണ്ടായിരുന്നു. അവന്റെ കാലില് 2 കിലോ ഗ്രാം തൂക്കമുള്ള വലിയ മുഴയുണ്ടായി. മുഴ നല്കിയ വേദനയില് അവന് ആളാകെ മാറി.
നടക്കാന് ബുദ്ധിമുട്ടുന്ന നായയെ ശ്രദ്ധയില്പെട്ട വെറ്ററിനറി ഡോക്ടര് ലീന പോള് നല്കിയ വിവരങ്ങളുടെ അടിസ്ഥാനത്തില് മൂവാറ്റുപുഴ മൃഗാശുപത്രിയില് 6 വെറ്ററിനറി ഡോക്ടര്മാര് ചേര്ന്നു മണിക്കൂറുകള് നീണ്ട ശസ്ത്രക്രിയയിലൂടെ കാലിലെ മുഴ നീക്കി.
മൂവാറ്റുപുഴ മൃഗാശുപത്രിയിലെ സീനിയര് വെറ്ററിനറി സര്ജന് ഡോ. ഷമീം അബൂബക്കര്, വെറ്ററിനറി ഡോക്ടര് പി.കൃഷ്ണദാസ്, മഴുവന്നൂര് മൃഗാശുപത്രിയിലെ ഡോ.രാജേഷ് കുമാര്, പായിപ്ര മൃഗാശുപത്രിയിലെ ഡോ.ലീനാ പോള്, ഡോ.ക്ലിന്റ് സണ്ണി, ഡോ.അമല് എന്നിവര് ചേര്ന്നാണ് ശസ്ത്രക്രിയ നടത്തിയത്. അനസ്തീസിയ കൊടുത്ത ശേഷമായിരുന്നു ശസ്ത്രക്രിയ. ഒഴിവു ദിവസമാണ് ഇവര് മൂവാറ്റുപുഴ മൃഗാശുപത്രി പോളി ക്ലിനിക്കില് ഒത്തു ചേര്ന്നത്.
റോക്കി ഇപ്പോള് കൂള് കൂള്. നിരങ്ങിനീങ്ങി നടന്നിരുന്ന റോക്കിയിപ്പോള് പുലി കണക്കെ പായും.
https://www.facebook.com/Malayalivartha