ആദിവാസിക്ഷേമത്തിനായി എല്ലാ വര്‍ഷവും കോടികള്‍ ചെലവഴിക്കുമ്പോഴും വീടില്ലാതെ ദുരിതജീവിതം നയിക്കുന്ന 44 ആദിവാസി കുടുംബങ്ങള്‍ ശബരിമല വനത്തിലുണ്ട്. 

അവരിലൊരാളാണ് തനു. തനുവും (20) സഹോദരി സന്ധ്യയും (18) ശബരിമല വനത്തില്‍ അലഞ്ഞുതിരിയുന്ന ആദിവാസികളാണ്. പ്ലാപ്പള്ളി - പമ്പ റോഡരികില്‍ ചാലക്കയം ഭാഗത്തെ വനത്തില്‍ ഷെഡ് കെട്ടിയാണ് ഇരുവരും താമസിച്ചിരുന്നത്. ഷെഡ് എന്നൊന്നും പറയാനാകില്ല. 2 കമ്പുകള്‍ നാട്ടി അതിനു മുകളില്‍ ടാര്‍പോളിന്‍ ഇട്ട്, കാറ്റില്‍ പറന്നുപോകാതിരിക്കാന്‍ 2 കല്ലും പിടിച്ചുവച്ചിരുന്നു... കഴിഞ്ഞ ദിവസം കാട്ടാനക്കൂട്ടം ഇത് നശിപ്പിച്ചു.

ഷെഡില്‍ ഉണ്ടായിരുന്ന അരിയും കടലയും പാത്രങ്ങളും തുണികളും ആനകള്‍ നശിപ്പിച്ചു. ഓടി രക്ഷപ്പെട്ടതിനാല്‍ ജീവന്‍ തിരിച്ചുകിട്ടി. രാത്രി മുഴുവന്‍ മരച്ചുവട്ടില്‍ ഇരുന്നു. ഇടയ്ക്കിടെ മഴ പെയ്തപ്പോള്‍ തണുത്തുവിറച്ചു. വിശന്നിട്ട് ഒരടി പോലും നടക്കാന്‍ വയ്യാതായെങ്കിലും കാട്ടാനശല്യമില്ലാതെ മറ്റൊരു ഭാഗത്തേക്കു മാറിത്താമസിക്കാന്‍ ഇരുവരും തീരുമാനിച്ചു.

ചാലക്കയത്തു നിന്ന് ഒരു കിലോമീറ്ററകലെ വനത്തില്‍ ശബരിമല പാതയോരത്ത്, കാട്ടാന വേഗമെത്താത്ത ചരിവുള്ള സ്ഥലം കണ്ടെത്തി. അവിടെയാണ് ഇപ്പോഴത്തെ ഷെഡ്; മഴയില്‍ നനഞ്ഞുകുളിക്കാതെ ഇരിക്കാന്‍ ഒരിടം. അവനും സഹോദരി സന്ധ്യയ്ക്കും ചെറിയ ആഗ്രഹങ്ങളേയുള്ളൂ: കാട്ടാനശല്യമില്ലാത്ത ഏതെങ്കിലുമിടത്ത് പട്ടിണിയില്ലാതെ ജീവിക്കണം.

തനു കിസുമം ഗവ. ഹൈസ്‌കൂളില്‍ എട്ടാം ക്ലാസ് വരെ പഠിച്ചതാണ്. പിന്നെ പഠനം നിര്‍ത്തി. ഇവരുടെ ദുരിതജീവിതം അറിയാവുന്ന ചില സന്നദ്ധ പ്രവര്‍ത്തകര്‍ അരിയും സാധനങ്ങളും എത്തിച്ചു നല്‍കിയിരുന്നെങ്കിലും ലോക്ഡൗണ്‍ വന്നതോടെ അതും മുടങ്ങി.

ആദിവാസികളെ ളാഹയ്ക്കു സമീപം മഞ്ഞത്തോട് വനമേഖലയില്‍ ഇവരെ പുനരധിവസിപ്പിക്കാന്‍ 8 വര്‍ഷമായി ആലോചന നടക്കുന്നുണ്ടെങ്കിലും തുടര്‍നടപടിയില്ല.