'സോമര്‍ടണ്‍ മാന്‍ ': ലോക രാജ്യങ്ങള്‍ക്ക് തിരിച്ചറിയാനാകാതെ പോയ ഒരു അജ്ഞാത മൃതദേഹം!
ഓസ്ട്രേലിയയിലെ സോമര്‍ടണ്‍ ബീച്ചില്‍ ഒറ്റനോട്ടത്തില്‍ ആരോ വിശ്രമിക്കുകയാണെന്ന് തോന്നിക്കുന്നത് പോലെ കടല്‍ ഭിത്തിയില്‍ ചാരി മണലില്‍ ഇരിക്കുന്ന നിലയില്‍ കണ്ടെത്തിയ ഒരു മൃതദേഹം ലോകത്തെ മുഴുവന്‍ ആശയക്കുഴപ്പത്തിലാക്കി. 1948 ഡിസംബര്‍ 1-നായിരുന്നു മൃതദേഹം കണ്ടെത്തിയത്. 40 വയസ് തോന്നിക്കുന്ന പൂര്‍ണ ആരോഗ്യവാനായ ഒരു പുരുഷന്റേതായിരുന്നു മൃതദേഹം.
മൃതദേഹം പോസ്റ്റ്മോര്‍ട്ടം ചെയ്തെങ്കിലും മരണകാരണം കണ്ടെത്താനായില്ല. മൃതദേഹത്തിന്റെ പോക്കറ്റില്‍ നിന്ന് ഓസ്ട്രേലിയയില്‍ ലഭിക്കാത്ത തരം വിലകൂടിയ ബ്രിട്ടീഷ് സിഗററ്റുകള്‍ കണ്ടെത്തി.അഡെലെയ്ഡ് റെയില്‍വേ സ്റ്റേഷനില്‍ നിന്നും ഒുരു സ്യൂട്ട് കേസ് കണ്ടെത്തിയെങ്കിലും അതിലെ ലേബല്‍ കീറിമാറ്റപ്പെട്ടിരുന്നു. അതോടെ ഇതൊരു സാധാരണ മരണമല്ലെന്ന് പൊലീസ് അനുമാനിച്ചു. അയാള്‍ ആരാണെന്ന് ആര്‍ക്കുമറിയില്ലായിരുന്നു.
മൃതദേഹം കാണപ്പെട്ട ബിച്ചിന്റെ പേര് കൂടി ചേര്‍ത്ത് ആ അജ്ഞാത മനുഷ്യനെ 'സോമര്‍ടണ്‍ മാന്‍ ' എന്ന് വിളിച്ചു. സോമര്‍ടണ്‍മാന്റെ വസ്ത്രം തപ്പിയപ്പോള്‍ ഒരു രഹസ്യ പോക്കറ്റില്‍ നിന്നും 'ടാമം ഷുഡ് ' എന്നെഴുതിയ ഒരു പേപ്പര്‍ കിട്ടി. പേര്‍ഷ്യന്‍ വാക്കായ ഇതിന്റെ അര്‍ത്ഥം 'അവസാനം' എന്നാണ്. അതോടെ 'ടാമം ഷുഡ് കേസ് 'എന്ന് ഈ കേസ് അറിയാന്‍ തുടങ്ങി.
ഒമര്‍ ഖയ്യാമിന്റെ 'റുബായ്യാത്ത് ' എന്ന പുസ്തകത്തില്‍ നിന്ന് കീറിയെടുത്തതായിരുന്നു ആ പേജ്. തന്റെ കാറിന്റെ ബാക്ക് സീറ്റില്‍ ഉപേക്ഷിക്കപ്പെട്ട നിലയില്‍ കണ്ടെത്തിയ റുബായ്യാത്തിന്റെ കോപ്പിയുമായി ഒരാള്‍ പൊലീസിനെ സമീപിച്ചു. ആ കോപ്പിയില്‍ നിന്ന് കീറിയെടുത്ത ഭാഗമായിരുന്നു സോമര്‍ടണ്‍മാനില്‍ നിന്ന് ലഭിച്ചത്.
കോഡ് ഭാഷയില്‍ എഴുതിയ ഒരു ലിസ്റ്റും ജെസിക്ക എന്ന സ്ത്രീയുടെ ഫോണ്‍ നമ്പറും ആ ബുക്കിന്റെ പുറംചട്ടയില്‍ ഉണ്ടായിരുന്നു. അവരുടെ കൈയിലും റുബായ്യാത്തിന്റെ ഒരു കോപ്പി ഉണ്ടായിരുന്നെങ്കിലും സോമര്‍ടണ്‍മാനെ അവര്‍ക്ക് അറിയില്ലായിരുന്നു. മൃതദേഹം കണ്ടെത്തുന്നതിന് തലേദിവസം അതേ സ്ഥാനത്ത് സോമര്‍ടണ്‍മാനുമായി സാദൃശ്യമുള്ള ഒരാള്‍ നിശ്ചലനായി ഇരിക്കുന്നത് കണ്ടതായി പലരും മൊഴി നല്‍കി. അഡെലെയ്ഡിലെ വെസ്റ്റ് ടെറസ് സെമിത്തേരിയിലാണ് സോമര്‍ടണ്‍ മാന്റെ മൃതദേഹം സംസ്‌കരിച്ചിരിക്കുന്നത്. ഇന്നും ഇദ്ദേഹം ആരാണെന്ന് ആര്‍ക്കും അറിയില്ല.
https://www.facebook.com/Malayalivartha
