ചൈനീസ് ശവപ്പെട്ടിയില് അവസാനത്തെ ആണി; നാറ്റോ മാതൃകയില് ഏഷ്യന് യുദ്ധ സഖ്യത്തിനു അമേരിക്ക; പരിഭ്രാന്തരായി ചൈനീസ് സര്ക്കാരും മാധ്യമങ്ങളും ; സഖ്യത്തില് ഇന്ത്യ, അമേരിക്ക, ജപ്പാന്, ഓസ്ട്രേലിയ, വിയറ്റ്നാം, സൗത്ത് കൊറിയ, ന്യൂസിലാന്ഡ്
ഇന്ത്യന് മഹാസമുദ്രത്തില് തങ്ങള്ക്കു അടുത്ത സൈനിക ബന്ധമുള്ള രാഷ്ട്രങ്ങളുമായുള്ള സൈനിക സാമ്പത്തിക സഹവര്ത്തിത്വം ഔപചാരിക, ഔദ്യോഗിക തലത്തിലേക്ക് ഉയര്ത്താന് മുന്കൈ എടുത്തു അമേരിക്ക. അമേരിക്കയുടെ മുന് ഇന്ത്യന് അംബാസിഡര് റിച്ചാര്ഡ് വര്മയുമായി നടത്തിയ വീഡിയോ കോണ്ഫെറന്സിനിടയില് അമേരിക്കന് ഡെപ്യൂട്ടി സെക്രട്ടറി ഓഫ് സ്റ്റേറ്റ് സ്റ്റീഫന് ബേയ്ഗനാണ് മേഖലയിലെ അമേരിക്കന് താല്പര്യത്തെ കുറിച്ച് പറഞ്ഞിരിക്കുന്നത്. നാറ്റോ മാതൃകയില് ഒരു സൈനിക സഖ്യത്തിനാണ് അമേരിക്ക ശ്രമിക്കുന്നത്. ഇന്തോ പസിഫിക് മേഖലയിലെ തങ്ങളുടെ സഖ്യ രാഷ്ട്രങ്ങളായ ഇന്ത്യ, ജപ്പാന് ഓസ്ട്രേലിയ എന്നീ രാജ്യങ്ങളെ കൂട്ടി ചേര്ത്ത് നാറ്റോ മാതൃകയില് ഒരു സൈനിക സഖ്യം രൂപീകരിക്കാനാണ് അമേരിക്ക പദ്ധതിയിടുന്നത്. മേഖലയിലെ ചൈനയുടെ അപ്രമാദിത്വം അവസാനിപ്പിക്കുക, മേഖലയില് കൂടുതല് കെട്ടുറപ്പും സുരക്ഷിതത്വവും, ഘടനയും അംഗ രാജ്യങ്ങള്ക്കു ഉറപ്പു വരുത്തുക എന്നീ ഉദ്ദേശങ്ങള് മുന് നിര്ത്തിയാണിത്.
നോര്ത്ത് അറ്റ്ലാന്റിക് ട്രീറ്റി ഓര്ഗനൈസേഷന് (നാറ്റോ) 1949 ല് സ്ഥാപിതമായതാണ്. യൂറോപ്പില് നിന്നും വടക്കേ അമേരിക്കയില് നിന്നുമുള്ള 30 രാജ്യങ്ങളുടെ ഒരു കൂട്ടയ്മയാണ് ഇത്. കൂട്ടായ പ്രതിരോധ തത്വത്തിലാണ് സഖ്യം സ്ഥാപിതമായത്, അതായത് ഒരു നാറ്റോ സഖ്യത്തെ ആക്രമിച്ചാല് എല്ലാ നാറ്റോ സഖ്യകക്ഷികളും ആക്രമിക്കപ്പെടുന്നത് പോലെയാണ്. ഇതറിഞ്ഞു പരിഭ്രാന്തരായിരിക്കുകയാണ് ചൈനീസ് സര്ക്കാര്. അത് വ്യക്തമാകുന്നത് അവരുടെ മുഖപത്രമായ ഗ്ലോബല് ടൈംസിന്റെ പ്രതികരണത്തിലൂടെയാണ് .'ഈ നീക്കം നടക്കാന് സാധ്യത ഇല്ല, മറ്റു രാജ്യങ്ങള് ഒന്നും അമേരിക്കയുടെ കൂടെ കൂടില്ല, അമേരിക്കയോട് അധികം അടുക്കാന് നോക്കാതെ ചൈനയുമായുള്ള അതിര്ത്തി തര്ക്കം പറഞ്ഞു തീര്ക്കുന്നതായിരിക്കും ഇന്ത്യക്കു നല്ലതു എന്നും മറ്റും ആണ് ചൈനീസ് മാധ്യമം ആക്രോശിക്കുന്നത്.
അമേരിക്കന് ഡെപ്യൂട്ടി സ്റ്റേറ്റ് സെക്രട്ടറിയുടെ വാക്കുകള് ഇങ്ങനെ
നിലവില് നാല് രാജ്യങ്ങളുടെ ഒരു സഖ്യമുണ്ടാക്കുക എന്നാണ് അമേരിക്ക ഉദ്ദേശിക്കുന്നത്. അതിനു ശേഷം മേഖലയിലെ മറ്റു രാജ്യങ്ങളെയും ഉള്പ്പെടുത്താം എന്നും. മേഖലയില് ചൈനയുടെ ഭാഗത്തു നിന്നും ഉണ്ടായേക്കാവുന്ന ഏതു ആക്രമണത്തെയും പ്രതിരോധിക്കുവാന് വേണ്ടി ഒരു പ്രതിരോധ മതില്, എന്നതാണ് ഈ സഖ്യത്തിലൂടെ ലക്ഷ്യം വയ്ക്കുന്നത്. അത് കൂടാതെ പൊതു മൂല്യങ്ങളുടെയും താല്പര്യങ്ങളുടെയും അടിസ്ഥാനത്തില് ഒത്തു ചേര്ന്ന് പ്രവര്ത്തിക്കാന് കഴിയുന്ന രാഷ്ട്രങ്ങളുടെ ഒരു കൂട്ടായ്മ ഉണ്ടാക്കിയെടുക്കുക. അതില് ഇന്ഡോ പസിഫിക് രാജ്യങ്ങള് മാത്രമല്ല, ലോകത്തിന്റെ മറ്റു ഭാഗങ്ങളില് നിന്നും രാജ്യങ്ങള്ക്കു പങ്കാളിയാകാവുന്നതാണ്. അതോടു കൂടി മേഖലയിലെ അസംഘടിതാവസ്ഥ മാറുകയും കൂടുതല് സംഘടിതമാവുകയും, ഏതു പ്രതിസന്ധിയെയും നേരിടാന് സജ്ജമാവുകയും ചെയ്യും.
ഇന്ഡോ പസിഫിക് മേഖലയില് ശക്തമായ ബഹു രാഷ്ട്ര സംഘടനാ സംവിധാനത്തിന്റെ കുറവ് അനുഭവപ്പെടുന്നുണ്ട്. യൂറോപ്പ്യന് യൂണിയനെ സംരക്ഷിച്ചു നിര്ത്തുന്ന നാറ്റോ പോലുള്ള ഒരു സഖ്യത്തിന്റെ അഭാവം ഇവിടെ തീര്ച്ചയായുമുണ്ട്. ഏഷ്യയില് ഇപ്പോള് നിലനില്ക്കുന്ന സംവിധാനങ്ങള് തീര്ത്തും അപര്യാപ്തമാണ്. നാറ്റോ ആണെങ്കില് കൂടെ തുടങ്ങിയത് വളരെ ലഘുവായ പ്രതീക്ഷകളോട് കൂടിയാണ് ഭൂരിഭാഗം രാജ്യങ്ങളും തുടക്കത്തില് നാറ്റോ അംഗത്വത്തെക്കാള് നിഷ്പക്ഷതയ്ക്കായിരിന്നു പ്രാധാന്യം കൊടുത്തിരുന്നതെന്നും അദ്ദേഹം പറഞ്ഞു. അത് പോലെ തന്നെ ഏഷ്യ മേഖലയില് തികച്ചും ലഘുവായ പ്രതീക്ഷകളോട് കൂടി ഒരു സൈനിക സഖ്യം ആകാവുന്നതേ ഉള്ളുവെന്നും അമേരിക്കന് ഡെപ്യൂട്ടി സെക്രട്ടറി വ്യക്തമാക്കി.
ഇന്ത്യ, ഓസ്ട്രേലിയ, ജപ്പാന്, അമേരിക്ക എന്നീ നാലു രാജ്യങ്ങളുടെ പ്രതിനിധികളുടെ കൂടിച്ചേരല് ഈ വരുന്ന സെപ്റ്റംബര്,ഡിസംബര് മാസങ്ങള്ക്കിടയില് ന്യൂഡല്ഹിയില് വച്ച് നടക്കും എന്നാണ് പ്രതീക്ഷിക്കപ്പെടുന്നത്. ഇതോടൊപ്പം തന്നെ ഇന്ത്യയുടെ ബംഗാള് ഉള്ക്കടലില് വച്ച് നടക്കുന്ന മലബാര് നാവിക അഭ്യാസത്തില് ഇത്തവണ ഓസ്ട്രേലിയ കൂടി ഉള്പെടാനുള്ള സാഹചര്യങ്ങളും കാണുന്നുണ്ട്. 1992 മുതല് ഇന്ത്യയും അമേരിക്കയും സംയുക്തമായി നടത്തി വരുന്ന ഈ നാവികാഭ്യാസത്തില് 2015 ല് ജപ്പാനും സ്ഥിര അംഗമായി. അതെ സമയം 2007 ല് ഓസ്ട്രേലിയ ഒരു തവണ ഉള്പെട്ടിരിന്നുവെങ്കിലും ചൈനയുടെ സമ്മര്ദ്ദ ഫലമായി ചൈനയെ ശത്രു ഭാഗത്തേക്ക് വയ്ക്കാന് താല്പര്യമില്ലാത്ത കൊണ്ട് അടുത്ത തവണ ഓസ്ട്രേലിയയെ ഇന്ത്യ ഉള്പ്പെടുത്തിയിരുന്നില്ല. എന്നാല് ഇന്ത്യയുമായി ബന്ധം സ്ഥാപിക്കാന് ഓസ്ട്രേലിയ അങ്ങേയറ്റം തല്പരരാണെന്നാണ് ഓസ്ട്രേലിയയില് നിന്നുള്ള ബുദ്ധി കേന്ദ്രങ്ങള് വ്യക്തമാക്കുന്നത്. എന്നാല് ഗാല്വാന് താഴ്വരയിലെ സംഘര്ഷങ്ങള്ക്ക് ശേഷം ഇന്ത്യ ചൈനയോടുള്ള ബന്ധത്തിന് അത്ര വലിയ പ്രാധാന്യം ഒന്നും കൊടുക്കുന്നില്ല. അതുകൊണ്ട് തന്നെ ഇതവണയുള്ള നാവിക അഭ്യാസത്തിനു ഓസ്ട്രേലിയയും ക്ഷണിക്കപ്പെടും എന്നാണ് കരുതപ്പെടുന്നത്. വിയറ്റ്നാം, സൗത്ത് കൊറിയ , പിന്നെ ന്യൂസിലാന്ഡ് എന്നീ രാജ്യങ്ങളും ഈ സഖ്യത്തിന്റെ ഭാഗം ആകണം എന്നാണ് അമേരിക്ക താല്പര്യപ്പെടുന്നത്.
ചൈനയുടെ ഭീഷണി എതിര്ക്കുക എന്നത് പ്രാഥമിക ലക്ഷ്യമാണെങ്കില് കൂടെ അതില് നിന്നുമൊക്കെ ഉപരിയായി വളരെ വിപുലമായ സാമ്പത്തിക ലക്ഷ്യമായിരിക്കാം അമേരിക്ക മുന്നില് കാണുന്നത്. കൂടാതെ ചൈനയുടെ കാര്യത്തില് സംഭവിച്ചത് പോലെ അമേരിക്കയെ വെല്ലുന്ന ഒരു സാമ്പത്തിക സൈനിക വെല്ലുവിളി ഇനി ഉയര്ന്നു വരരുത് എന്നും അമേരിക്ക ആഗ്രഹിക്കുന്നുണ്ടാകും. തീര്ച്ചയായും അമേരിക്കയ്ക്കും ഓസ്ട്രേലിയയ്ക്കും ജപ്പാനും എല്ലാം മറ്റു സാമ്പത്തിക രാഷ്ട്രീയ താല്പര്യങ്ങള് ഉണ്ടായേക്കാം. ചിലതൊക്കെ ഇന്ത്യന് സാമ്പത്തിക താല്പര്യങ്ങള്ക്കു വിരുദ്ധവുമായേക്കാം. എന്നാല് നിലവിലെ ഇന്ത്യയുടെ മുഖ്യ പ്രശ്നം ചൈന ആണ്. ചൈനയുടെ അധിനിവേശ സാമ്രാജ്യത്വ നയങ്ങളാണ്. ഇത് ഇന്ത്യയുടെ മാത്രമല്ല മേഖലയിലെ മറ്റു പല രാജ്യങ്ങളുടെയും പ്രശ്നമാണ്. അതിനാല് തന്നെ ചൈനയുടെ ശക്തി മേഖലയില് ക്ഷയിക്കേണ്ടത് അത്യന്താപേക്ഷിതമാണ്. അതിനു ചാലക ശക്തിയായി നില്ക്കുന്ന തരത്തില് നാറ്റോ മാതൃകയില് ഒരു കൂട്ടായ്മ വരുന്നതില് ഒരു തെറ്റുമില്ല. മാത്രമല്ല ചൈനയെ ഒഴിവാക്കി കൊണ്ട് ചൈനക്കെതിരെ ഒരു സഖ്യം വരുമ്പോള് ഇന്ത്യയുടെ മേഖലയിലെ സ്വാധീനം വര്ധിക്കാന് മാത്രമാണ് ഇത് സഹായിക്കുക. ഇത് ഇന്ത്യന് സമ്പദ് വ്യവസ്ഥയുടെ ഉയര്ച്ചയ്ക്ക് ആക്കം കൂട്ടുമെന്ന് തന്നെ നമുക്ക് പ്രതീക്ഷിക്കാം.
https://www.facebook.com/Malayalivartha