കോണ്‍ഗ്രസില്‍ അടിതുടങ്ങി; കെ.പി.സി.സി ഭാരവാഹി പട്ടികയില്‍ അതൃപ്തി; മുല്ലപ്പള്ളിക്കെതിരെ പരാതിയുമായി നേതാക്കള്‍ ഹൈകമാന്‍ഡിന് മുന്നിലേക്ക്; ജമ്പോ പട്ടിക ഇനിയും വലുതാകാന്‍ സാധ്യത; പാര്‍ട്ടി തന്നെ ഒന്നും അറിയിക്കുന്നില്ലെന്ന വിമര്‍ശനവുമായി കെ.മുരളീധരന്‍ എം.പി രംഗത്ത്
ഗ്രൂപ്പ് നേതാക്കളെ തൃപ്തിപ്പെടുത്താന്‍ കെ.പി.സി.സി അയച്ച ജമ്പോ ഭാരവാഹി പട്ടിക അവസാനം ഹൈകമാന്റ് അംഗീകരിച്ചെങ്കിലും പരാതികള്‍ തീരാതെ കോണ്‍ഗ്രസ് നേതാക്കള്‍. അര്‍ഹിക്കുന്ന സ്ഥാനം ലഭിച്ചില്ലെന്ന പരാതിയുമായി എത്തയിരിക്കുന്നത് മുതിര്‍ന്ന നേതാക്കളും എം.പിമാരും എ.എല്‍.എമാരുമെല്ലാമാണെന്നത് അതൃപ്തരും ശക്തരാണെന്ന് തെളിയിക്കുന്നതാണ്. കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രനെതിരെ ഹൈകമാന്‍ഡില്‍ പരാതി വരെ ഇവര്‍ നല്‍കികഴിഞ്ഞു. ഇതിനോടകം കെപിസിസി ഭാരവാഹി പട്ടിക സംബന്ധിച്ച് അഞ്ച് എംപിമാര്‍ കോണ്‍ഗ്രസ് ഹൈക്കമാന്‍ഡിനെ അതൃപ്തി അറിയിച്ചു. ജനറല്‍ സെക്രട്ടറിമാരെയും സെക്രട്ടറിമാരെയും നിര്‍വ്വഹക സമിതി അംഗങ്ങളെയും നിശ്ചയിച്ചതിലാണ് പരാതി. കെപിസിസി പ്രസിഡന്റ് മുല്ലപ്പള്ളി രാമചന്ദ്രന്‍ ഗ്രൂപ്പ് നേതാക്കളുടെ അഭിപ്രായം മാത്രം കേള്‍ക്കുന്നു എന്നും എംപിമാര്‍ പരാതിപ്പെട്ടിട്ടുണ്ട്. എംപിമാരായ കൊടിക്കുന്നില്‍ സുരേഷ്, കെ സുധാകരന്‍ എന്നിവര്‍ പരാതി അറിയിച്ച് കത്ത് നല്‍കി. ടി.എന്‍ പ്രതാപന്‍, ആന്റോ ആന്റണി, എം കെ രാഘവന്‍ എന്നിവരും ഹൈക്കമാന്‍ഡിനെ പരാതി അറിയിച്ചു. തങ്ങള്‍ നല്‍കിയ പേരുകള്‍ പട്ടികയില്‍ ഉള്‍പ്പെടുത്തിയില്ലെന്ന് കത്തില്‍ പറഞ്ഞിട്ടുണ്ട്. വേണ്ടത്ര ചര്‍ച്ച നടത്തിയില്ലെന്നും പരാതിയിലുണ്ട്.
അതേസമയം, കോണ്‍ഗ്രസ് പുന:സംഘടനയില്‍ അഭിപ്രായ വ്യത്യാസമുണ്ടെങ്കിലും വിഴുപ്പലക്കലിന് ഇല്ലെന്ന് മുന്‍ കെ.പി.സി.സി പ്രസിഡന്റ് കൂടിയായ കെ മുരളീധരന്‍ എം.പി പറഞ്ഞത്. പ്രചാരണ സമിതി അധ്യക്ഷ സ്ഥാനത്ത് നിന്നുള്ള തന്റെ രാജി യുഡിഎഫില്‍ പ്രതിസന്ധി ഉണ്ടാക്കില്ലെന്നും മുരളീധരന്‍ അഭിപ്രായപ്പെട്ടു. പ്രചാരണ സമിതി അധ്യക്ഷന്‍ എന്നത് അത്ര വലിയ സ്ഥാനമൊന്നുമല്ല. ഒരു പദവി വെറുതെ അലങ്കാരമായി കൊണ്ടുനടക്കാന്‍ താല്‍പര്യമില്ല. ഒരു മുരളീധരന്‍ പോയാല്‍ ആയിരം മുരളീധരന്‍മാര്‍ വേറെ വരും. നിരവധി നേതാക്കള്‍ കോണ്‍ഗ്രസിലുണ്ട്. പാര്‍ട്ടിയില്‍ പല കാര്യങ്ങളിലും തനിക്ക് അഭിപ്രായവ്യത്യാസങ്ങളുണ്ട് . എന്നാല്‍, ഒരു പരസ്യമായ നീക്കത്തിനോ വിഴുപ്പലക്കലിനോ ഇനി പ്രസക്തിയില്ല. പാര്‍ട്ടിയില്‍ വേണ്ടത്ര കൂടിയാലോചന ഇല്ല. പല കാര്യങ്ങളും താന്‍ മാധ്യമങ്ങളിലൂടെയാണ് അറിയുന്നതെന്നും മുരളീധരന്‍ മാധ്യമങ്ങളോട് പറഞ്ഞു.
ഏറെ അനിശ്ചിതത്വങ്ങള്‍ക്കൊടുവിലാണ് കെ.പി.സി.സി സെക്രട്ടറിമാരുടെ പട്ടികയ്ക്ക് ഹൈക്കമാന്‍ഡ് രണ്ടാഴ്ച്ച മുമ്പ് അംഗീകാരം നല്‍കിയത്. 96 സെക്രട്ടറിമാരടങ്ങിയ പട്ടികയ്‌ക്കൊപ്പം പത്ത് ജനറല്‍ സെക്രട്ടറിമാരുടെ പട്ടികയും ഹൈക്കമാന്‍ഡ് അംഗീകരിച്ചു. 175 നിര്‍വാഹക സമിതി അംഗങ്ങളും പട്ടികയിലുണ്ട്. കെ.പി.സി.സി അധ്യക്ഷ സ്ഥാനം ഏറ്റെടുത്തത് മുതല്‍ ജംബോ കമ്മിറ്റി വേണ്ടെന്ന മുല്ലപ്പള്ളിയുടെ ആവശ്യം തള്ളിയാണ് പട്ടിക ഹൈക്കമാന്‍ഡ് അംഗീകരിച്ചത്. ജനറല്‍ സെക്രട്ടറിമാരില്‍ വനിതാ പ്രാതിനിധ്യം വേണമെന്ന ആവശ്യപ്പെട്ട് നേരത്തെ രണ്ട് തവണ പട്ടിക ഹൈക്കമാന്‍ഡ് തിരിച്ചയച്ചിരുന്നു. തുടര്‍ന്ന് കെ.പി.സി.സി സമര്‍പ്പിച്ച പുതുക്കിയ പട്ടികയ്ക്കാണ് ഹൈക്കമാന്‍ഡ് അംഗീകാരം നല്‍കിയതെന്ന പ്രത്യേകതയും പുതിയ ഭാരവാഹി പട്ടികയുണ്ട്. മുതിര്‍ന്ന നേതാക്കള്‍ തന്നെ രംഗത്ത് വന്ന സ്ഥിതിക്ക് ഇവരെ തൃപ്തിപ്പെടുത്താന്‍ ഇനിയും പട്ടിക വലുതാകുമോ എന്ന ആശങ്കയും നിലനില്‍ക്കുന്നുണ്ട്.
https://www.facebook.com/Malayalivartha
