ആശങ്ക മാറാതെ ശബരിമല; ഭക്തരെ പ്രവേശിപ്പിക്കണോ? ശബരിമല സ്പെഷ്യല് കമ്മീഷണര് സമര്പ്പിച്ച റിപ്പോര്ട്ടിലും ആശങ്ക; തന്ത്രിക്കോ മേല്ശാന്തിക്കോ കോവിഡ് ബധിച്ചാല് പകരം സംവിധാനം? ഹിന്ദു സംഘടനകള് എതിര്പ്പുമായി രംഗത്തുവരാനുള്ള കാരണങ്ങള് ഇവയാണ്
കോവിഡ് കാലത്തെ ശബരിമല തീര്ത്ഥാടനത്തില് ആശങ്ക മാറുന്നില്ല. ശബരിമല സ്പെഷ്യല് കമ്മീഷണര് സമര്പ്പിച്ച റിപ്പോര്ട്ടിലും ഈ ആശങ്ക പ്രകടമാണ്. കോവിഡ് കാലത്ത് തീര്ത്ഥാടകരെ പ്രവേശിപ്പിക്കുന്നതിലാണ് പ്രധാന ആശങ്ക. കോവിഡ് പശ്ചാത്തലത്തില് തീര്ത്ഥാടകര്ക്ക് കടുത്ത നിയന്ത്രണം വേണമെന്നും പമ്പയില് ഭക്തര്ക്ക് സ്നാനം അനുവദിക്കരുതെന്നും സ്പെഷ്യല് കമ്മീഷണര് ഹൈക്കോടതിയില് സമര്പ്പിച്ച റിപ്പോര്ട്ടില് പറയുന്നു.
പമ്പയിലും സന്നിധാനത്തും, നിലയ്ക്കലിലും വിരി വയ്ക്കാന് പാടില്ല. ബേസ് ക്യാമ്പായ നിലയ്ക്കലില് വച്ച് കോവിഡ് പരിശോധിക്കണമെന്നും സന്നിധാനത്ത് അടക്കം എവിടെയും ക്യു അനുവദിക്കരുതെന്നും ക്യൂ വേണ്ടി വന്നാല് തന്നെ കൃത്യമായി കോവിഡ് പ്രോട്ടോക്കോള് പാലിക്കണമെന്നും സ്പെഷ്യല് കമ്മീഷണര് നിര്ദേശിക്കുന്നു. തീര്ത്ഥാടകര് എത്തുന്ന സാഹചര്യത്തില് തന്ത്രിക്കും മേല്ശാന്തിക്കും കോവിഡ് ബാധിച്ചാല് തുടര് നടപടി എങ്ങനെ വേണമെന്ന് ആലോചിക്കണമെന്നും റിപ്പോര്ട്ടിലുണ്ട്.
ഭക്തരില് ഒരാള്ക്ക് കോവിഡ് ബാധിച്ചാല് ഒപ്പം വന്ന മറ്റ് ഭക്തരെ എന്ത് ചെയ്യണമെന്നതിലും വ്യക്തമായ പദ്ധതി വേണമെന്നും സ്പെഷ്യല് കമ്മീഷണര് ചൂണ്ടിക്കാട്ടുന്നു. പമ്പയിലെ കെട്ടു നിറചടങ്ങുകള് അനുവദിക്കരുതെന്നും ശബരിമലയിലേക്കുളള പ്രവേശനം പൂര്ണമായി വെര്ച്വല് ക്യൂ വഴിയാക്കണമെന്നും സ്പെഷ്യല് കമ്മീഷണറുടെ റിപ്പോര്ട്ടില് പറയുന്നുണ്ട്. 60 വയസ് കഴിഞ്ഞവരെ ശബരിമലയില് പ്രവേശിപ്പിക്കരുതെന്നും കോവിഡ് നെഗറ്റീവ് സര്ട്ടിഫിക്കറ്റ് ഹാജരാക്കുന്നവര്ക്ക് മാത്രമായി വെര്ച്വല് ക്യൂ ചുരുക്കണമെന്നും സ്പെഷ്യല് കമ്മിഷണര് നിര്ദേശിക്കുന്നു.
ശബരിമല തീര്ത്ഥാടനവുമായി ബന്ധപ്പെട്ട് സര്ക്കാര് ഏകപക്ഷീയമായെടുത്ത തീരുമാനങ്ങള് നടപ്പാക്കരുതെന്ന് ശബരിമല കര്മസമിതി നേരത്തെ തന്നെ ആവശ്യപ്പെട്ടി സര്ക്കാര് ഏകപക്ഷീയമായി ഇപ്പോള് എടുത്ത തീരുമാനങ്ങള് നടപ്പാക്കിയാല് തീര്ത്ഥാടനത്തിന്റെ പവിത്രതയെ തന്നെ പ്രതികൂലമായി ബാധിക്കുമെന്നും കര്മസമിതി കുറ്റപ്പെടുത്തി. തീര്ത്ഥാടനവുമായി ബന്ധപ്പെട്ട് ചില നിര്ദേശങ്ങളും കര്മസമിതി സര്ക്കാരിന് മുന്നില്വെച്ചു. സന്ന്യാസി ശ്രേഷ്ഠന്മാര്, പന്തളം കൊട്ടാര പ്രതിനിധികള്, ശബരിമലയിലെ ആചാരങ്ങളുമായി ബന്ധപ്പെട്ട വിവിധ സംഘങ്ങള്, ഗുരുസ്വാമിമാര്, വിവിധ ഹൈന്ദവ സംഘടനകള് എന്നിവരുമായി ചര്ച്ച ചെയ്തതിന്റെ അടിസ്ഥാനത്തിലാണ് നിര്ദേശങ്ങള് തയാറാക്കിയതെന്ന് ശബരിമല കര്മസമിതി എസ്.ജെ.ആര്. കുമാര് അറിയിച്ചു.
കോവിഡ് സമൂഹവ്യാപനം ഭീതിദമാം വിധം വര്ധിച്ചു വരുന്ന സാഹചര്യത്തില് ആള്ക്കൂട്ടം ഒഴിവാക്കി കോവിഡ് മാനദണ്ഡങ്ങള് പാലിക്കേണ്ടതിനാല് അയ്യപ്പന്മാര് എത്തുന്നത് നിരുത്സാഹപ്പെടുത്തണമെന്നും ആയിരക്കണക്കിന് അയ്യപ്പന്മാരെ ഈ ഘട്ടത്തില് പ്രവേശിപ്പിച്ചാല് ഉണ്ടാകുന്ന പ്രത്യാഘാതത്തിന്റെ പൂര്ണ്ണ ഉത്തരവാദിത്തം സര്ക്കാരിനും ദേവസ്വം ബോര്ഡിനും മാത്രമായിരിക്കുമെന്നും കര്മ്മ സമതി വ്യക്തമാക്കിട്ടുണ്ട്. ശബരിമല തീര്ത്ഥാടനം സംബന്ധിച്ചു കൈക്കൊണ്ടിട്ടുള്ള എല്ലാവിധ തീരുമാനങ്ങളും പുനഃപരിശോധിക്കേണ്ടതാമെന്നും അവര് ആവശ്യപ്പെടുകയും ചെയ്തു.
സര്ക്കാര് ഏര്പ്പെടുത്താന് ഉദ്ദേശിക്കുന്ന നിയന്ത്രണങ്ങള് വെച്ചുകൊണ്ട് പരമ്പരാഗതമായി നിലനില്ക്കുന്ന ആചാരങ്ങള് അനുസരിച്ച് ഭക്തജനങ്ങള്ക്ക് ശബരിമല തീര്ത്ഥാടനം നടത്താന് സാധ്യമല്ലെന്നാണ് വിലയിരുത്തുന്നത്. സര്ക്കാര് ഏകപക്ഷീയമായി ഇപ്പോള് എടുത്ത തീരുമാനങ്ങള് നടപ്പാക്കിയാല് തീര്ത്ഥാടനത്തിന്റെ പവിത്രതയെ തന്നെ പ്രതികൂലമായി ബാധിക്കും. ഭക്തജനങ്ങളെ സംബന്ധിച്ച് സാധാരണ ഒരു ക്ഷേത്ര ദര്ശനത്തിനുള്ള യാത്ര പോലെയല്ല ശബരിമല തീര്ത്ഥയാത്ര. അയ്യപ്പമുദ്രയുള്ള മാല ധരിച്ച് വ്രതശുദ്ധിയോടെ പരമ്പരാഗതമായി കൈക്കൊണ്ടുവരുന്ന ചില ചിട്ടവട്ടങ്ങളോടുകൂടി അയ്യപ്പന് അഭിഷേകം ചെയ്യാനുള്ള നെയ്യ് നിറച്ച നെയ്ത്തേങ്ങ ഉള്പ്പെടുന്ന ഇരുമുടിക്കെട്ടുമായി ഗുരുസ്വാമിയുടെ നേതൃത്വത്തില് ഒരുമിച്ചുള്ള ഒരു തീര്ത്ഥയാത്രയാണ് അയ്യപ്പന്മാര് നടത്തുന്നത്. പമ്പാ സ്റ്റാനവും ബലിതര്പ്പണവും നടത്തി മല കയറി പതിനെട്ടാംപടി ചവുട്ടി അയ്യപ്പനെ ദര്ശിക്കുന്ന ഭക്തനെ സംബന്ധിച്ച് ഇരുമുടിക്കെട്ടിലുള്ള നെയ്യ് വിഗഹത്തില് അഭിഷേകം ചെയ്ത് അത് ഒരു പ്രസാദമായി തിരികെ സ്വീകരിക്കുക എന്നുള്ളതാണ് തീര്ത്ഥാടനത്തിന്റെ മുഖ്യ വഴിപാട്. പരമപ്രധാനമായ ഈ വഴിപാട് നടത്താതെയുള്ള ശബരിമല തീര്ത്ഥാടനം അപൂര്ണ്ണമാകും. ഇത് ഒരു ഭക്തനെ സംബന്ധിച്ച് ഉള്ക്കൊള്ളാന് പറ്റുന്നതല്ല. ബഹുഭൂരിപക്ഷം ഗുരുസ്വാമിമാരും കോവിഡ് മാനദണ്ഡമനുസരിച്ച് പ്രവേശനത്തിന് അനുവദിക്കപ്പെട്ട ഉയര്ന്ന പ്രായപരിധിക്ക് മുകളിലുളളവരാണ്. അതുകൊണ്ടുതന്നെ ഗുരുസ്വാമിമാരോടൊപ്പം തീര്ത്ഥാടനം നടത്തുന്ന പല അയ്യപ്പന്മാര്ക്കും ഇത് തീര്ത്ഥയാത്രയ്ക്കുള്ള പ്രതിബന്ധമാകും. അത്തരത്തില് ഗുരുസ്വാമിമാരുടെ നേതൃത്വത്തിലല്ലാതെയുള്ള യാത്ര അപൂര്ണ്ണവും ഒരു സാധാരണ ക്ഷേത്രത്തിലേക്കുള്ള യാത്രപോലെയായി മാറുകയും ചെയ്യും.
https://www.facebook.com/Malayalivartha