ശിവശങ്കറും സ്വപ്‌നയും ചേര്‍ന്ന് ഇതിനോടകം തന്നെ സി.പി.എമ്മിന്റെ മുഖം വികൃതമാക്കിട്ടുണ്ട്. തദ്ദേശ തിരഞ്ഞെടുപ്പ് അടുത്തിരിക്കുന്ന അവസ്ഥയില്‍ സ്വര്‍ണക്കടത്ത് വിഷയം തിരിച്ചടിയാകുമെന്ന കാര്യത്തില്‍ സി.പി.എമ്മിന് സംശയമൊന്നുമില്ല. അതുകൊണ്ടു തന്നെ വികൃതമായ സി.പി.എമ്മിന്റെ മുഖം ജനങ്ങളുടെ മുന്നില്‍ മറച്ച് പിടിക്കാന്‍ ശ്രമത്തിലാണ് നേതൃത്വം. ഇതിനായി വിണുകിട്ടിയ ആയുധം പരമാവധി ഉപയോഗിക്കാനാണ് സി.പി.എമ്മിന്റെ തീരുമാനം. ഇതിനിടെ തുടര്‍ന്ന് പി.ടി.തോമസ് എം.എല്‍.എ.യ്‌ക്കെതിരേ ഉയര്‍ന്ന ആരോപണം കവചമാക്കാന്‍ സി.പി.എം ഒരുങ്ങുകയാണ്. സ്വര്‍ണക്കടത്ത് ഉള്‍പ്പെടെയുള്ള ആരോപണങ്ങളെ ചെറുക്കാനുള്ള ആയുധമായി പി.ടി.യുമായി ബന്ധപ്പെട്ട് ഉയര്‍ന്ന കള്ളപ്പണവിവാദത്തെ ഉപയോഗിക്കാനാണ് നീക്കം. ശനിയാഴ്ച ഇടതുമുന്നണി കണ്‍വീനര്‍ എ. വിജയരാഘവന്‍തന്നെ സ്ഥലത്തെത്തി. പി.ടി.യ്‌ക്കെതിരേയുള്ള പ്രചാരണം ശക്തമായി മുന്നോട്ടുകൊണ്ടുപോകുന്നതിനുള്ള സന്ദേശമാണ് അദ്ദേഹം നല്‍കിയത്.

ഇടപ്പള്ളി അഞ്ചുമനയില്‍ കുടിയൊഴിപ്പിക്കലുമായി ബന്ധപ്പെട്ട് നടന്ന നഷ്ടപരിഹാരചര്‍ച്ചയും പണമിടപാടും സി.പി.എമ്മിന് വീണുകിട്ടിയതാണ്. ചര്‍ച്ചയില്‍ സി.പി.എം. ബ്രാഞ്ച് സെക്രട്ടറികൂടി പങ്കാളിയായിരുന്നെങ്കിലും, ഭൂവുടമ രാമകൃഷ്ണന്‍ പണമടങ്ങിയ ബാഗുമായി എത്തിയതാണ് പി.ടി.ക്കെതിരേ തിരിഞ്ഞത്. സ്ഥലത്തേക്ക് ആദായനികുതി ഉദ്യോഗസ്ഥര്‍ എത്തിയതിന്റെ പിന്നില്‍ തങ്ങളാണെന്ന് സി.പി.എം. അവകാശപ്പെടുന്നില്ല. പി.ടി.യുമായി മുന്‍വൈരാഗ്യമുള്ളയാളാണ് ഇതിനുപിന്നിലെന്നാണ് പ്രചരിക്കുന്നത്. സംഭവത്തില്‍ വിജിലന്‍സ് ഉള്‍പ്പെടെയുള്ള അന്വേഷണ ഏജന്‍സികളെ ബന്ധപ്പെടുത്താനുള്ള ശ്രമവും അണിയറയില്‍ നടക്കുന്നുണ്ട്. സ്ഥലത്തെ സി.പി.എം. നേതാവിനെതിരേ ശനിയാഴ്ചയുണ്ടായ ആക്രമണശ്രമവും ഈ സംഭവത്തിന്റെ ഭാഗമായാണെന്ന് സി.പി.എം. ആരോപിച്ചിട്ടുണ്ട്. ഇതോടെ വിഷയം കത്തിപ്പടരുകയാണ്.

പി.ടി. സ്ഥലത്തുനിന്ന് ഓടിരക്ഷപ്പെട്ടെന്നായിരുന്നു ആദ്യപ്രചാരണം. അതിന് മറുപടിയുമായി അദ്ദേഹം രംഗത്തുവന്നെങ്കിലും കള്ളപ്പണം വന്നതിന്റെ ഉത്തരവാദിത്വം പി.ടി.യുടെ തലയില്‍വെച്ചുകൊണ്ടുള്ള പ്രചാരണത്തില്‍ സി.പി.എം. ഉറച്ചുനില്‍ക്കുകയാണ്. ആദ്യദിവസം ഇടതുപക്ഷത്തെ രണ്ട് എം.എല്‍.എ.മാര്‍ മാത്രമാണ് പി.ടി.ക്കെതിരേ ആരോപണവുമായിവന്നത്. എന്നാല്‍, പിറ്റേദിവസം മുഖ്യമന്ത്രിതന്നെ പത്രസമ്മേളനത്തില്‍, ഇത് ഗൗരവത്തോടെ കാണേണ്ട വിഷയമാണെന്ന് വ്യക്തമാക്കി. പി.ടി.ക്കെതിരേ സി.പി.എം. ശക്തമായ നീക്കംനടത്താന്‍ പോകുന്നതിന്റെ സൂചനയായിരുന്നു അത്.

സി.പി.എം. ജില്ലാസെക്രട്ടറി പത്രസമ്മേളനം നടത്തി കള്ളപ്പണം ഇടപാടില്‍ പി.ടി.യുടെ പങ്ക് അന്വേഷിക്കണമെന്നാവശ്യപ്പെട്ടു. പി.ടി.ക്കെതിരേ സി.പി.എം. സൈബര്‍ പോരാളികളും ഇറങ്ങി. സംഭവം തിരഞ്ഞെടുപ്പുവരെ കത്തിച്ചുനിര്‍ത്താനാണ് ശ്രമം. ഇത് ബോധ്യമായതിനാല്‍ പ്രതിരോധിക്കാനായി കോണ്‍ഗ്രസും രംഗത്തുവന്നിട്ടുണ്ട്. അദ്ദേഹത്തിന്റെ മണ്ഡലമായ തൃക്കാക്കരയില്‍ എല്ലാ വാര്‍ഡിലും വിശദീകരണയോഗങ്ങള്‍ സംഘടിപ്പിച്ചു. എന്നാല്‍, പി.ടി. വിഷയം തൃക്കാക്കരയ്ക്കപ്പുറം സംസ്ഥാനത്തൊട്ടാകെ ചര്‍ച്ചചെയ്യുന്ന വിധത്തില്‍ ഉയര്‍ത്തിക്കൊണ്ടുവരാനാണ് സി.പി.എം.നീക്കം.

സ്വര്‍ണക്കടത്ത് കേസിലെ മുഖ്യപ്രതി സ്വപ്‌ന സുരേഷ് മുഖ്യമന്ത്രിയുടെ ഔദ്യോഗിക വസതിയായ ക്ലിഫ് ഹൗസില്‍ വന്നിട്ടുണ്ടോയെന്ന് ചോദിച്ചതിനാണ് ഇടപ്പള്ളിയില്‍ കമ്മ്യൂണിസ്റ്റ് കുടുംബത്തെ സഹായിച്ചതിന് തന്നെ കുടുക്കാന്‍ ശ്രമിച്ചതെന്ന് പി.ടി തോമസ് എം.എല്‍.എ ആരോപിക്കുന്നത്. ഇടപ്പള്ളി അഞ്ചുമനയില്‍ നാല് സെന്റ് സ്ഥലം വില്‍ക്കുന്നതുമായി ബന്ധപ്പെട്ട ഇടപാടിനാണ് പി.ടി തോമസ് എം.എല്‍.എ. മധ്യസ്ഥം വഹിച്ചത്. ഇവിടേക്ക് ആദായനികുതി ഉദ്യോഗസ്ഥര്‍ എത്തുകയും ഭൂമി വില്പനക്കായി കൈമാറാന്‍ ശ്രമിച്ച 50 ലക്ഷം രൂപ പിടിച്ചെടുക്കുകയും ചെയ്തിരുന്നു.