ഗൂഡല്ലൂര്‍ പുളിയമ്പാറ കത്തിരിത്തോട്ടില്‍ വ്യാഴാഴ്ച അര്‍ധരാത്രി വീടിന്റെ അടുക്കള ആന തകര്‍ക്കുന്ന ശബ്ദം കേട്ടാണ് ധനലക്ഷ്മി ഉണര്‍ന്നത്.

വീട്ടുമുറ്റത്തെത്തിയ കാട്ടാനക്കൂട്ടത്തെ കണ്ട് ആദ്യം ഞെട്ടിയെങ്കിലും ധൈര്യം വീണ്ടെടുത്ത ധനലക്ഷ്മിക്ക് ഒരു ചിന്തയേ ഉണ്ടായിരുന്നുള്ളൂ; കിടപ്പുരോഗിയായ ഭര്‍ത്താവിനെ എങ്ങനെയും രക്ഷിക്കണം.

65 വയസ്സുള്ള നാഗലിംഗം ശരീരത്തിന്റെ വലതുവശം തളര്‍ന്ന് കിടപ്പിലാണ്.

കൂടുതല്‍ ആലോചിച്ചില്ല, ഭര്‍ത്താവ് നാഗലിംഗത്തെ ചുമലിലേറ്റി മുന്‍വാതില്‍ തുറന്ന് രണ്ടുംകല്‍പിച്ച് ആനകളുടെ മുന്നിലൂടെത്തന്നെ പുറത്തിറങ്ങി.

ചുമന്നും നടത്തിയും ഒരുവിധത്തില്‍ അയല്‍വീട്ടിലെത്തിച്ചപ്പോഴാണു കാട്ടാനകളിറങ്ങിയ വിവരം പരിസരവാസികള്‍ അറിയുന്നത്.

നാട്ടുകാരും വനപാലകരും ചേര്‍ന്ന് ആനക്കൂട്ടത്തെ തുരത്തി. പ്രദേശത്ത് കാട്ടാന ശല്യം രൂക്ഷമാണ്.