കഴിഞ്ഞ ദിവസമായിരുന്നു നാടിനെ ഞെട്ടിച്ച അപകടം ഉണ്ടായത്. മാതാപിതാക്കള്‍ക്കൊപ്പം സുധീഷിനടുത്തേക്കുള്ള യാത്രയ്ക്കിടെ ഭാര്യ അഞ്ജു വി ദേവ്(26) വാഹനാപകടത്തില്‍ പെട്ട് മരിച്ച വാര്‍ത്ത ഒരു നാടിനെയാകെ ദുഖത്തിലാക്കിയിരിക്കുകയാണ്.

വിവാഹ വാര്‍ഷിക ദിനം ചൊവ്വാഴ്ചയായിരുന്നുവെങ്കിലും ഒഴിവുദിനമായ ഞായറാഴ്ച ആഘോഷിക്കാനിരുന്നതായിരുന്നു തീരുമാനം. 

ശനിയാഴ്ച ഉച്ചയോടെ ദേശീയപാതയില്‍ കരുവാറ്റ കന്നുകാലിപ്പാലത്തിനു സമീപമായിരുന്നു അപടം. അഞ്ജുവും കുടുംബവും സഞ്ചരിച്ച കാര്‍ ലോറിയുമായി കൂട്ടിയിടിക്കുകയായിരുന്നു.

വരാനുള്ള സമയം കഴിഞ്ഞിട്ട് പോലും വരാതായപ്പോല്‍ സംശയം തോന്നി വിളിച്ച്‌ നോക്കുമ്ബോള്‍ ഫോണെടുത്തത് ഹൈവേ പോലീസുകാര്‍. അപ്പോഴേക്കും മറുതലയ്ക്കല്‍നിന്ന് 'എവിടെയായി, എപ്പോഴെത്തു'മെന്ന് ചോദിക്കുകയായിരുന്നു. അപകടമുണ്ടായെന്നും അഞ്ജുവിനെയും വീട്ടുകാരെയും ആശുപത്രിയിലേക്ക് കൊണ്ടുപോകുകയാണെന്നാണ് തുടര്‍ന്ന് ഉദ്യോഗസ്ഥന്‍ മറുപടി പറഞ്ഞത്.

പെരുമ്ബാവൂരില്‍ സ്വകാര്യ സ്ഥാപനത്തില്‍ ജോലി ചെയ്യുകയാണ് സുധീഷ്. രണ്ടാഴ്ചയായി കുടുംബവീട്ടിലായിരുന്ന അഞ്ജു വിവാഹവാര്‍ഷികാഘോഷത്തിനായാണ് ശനിയാഴ്ച രാവിലെ പത്തുമണിയോടെ ശൂരനാട്ടെ വീട്ടില്‍ നിന്നും പുറപ്പെട്ടത്. ഒപ്പം വീട്ടുകാരുമുണ്ടായിരുന്നു. അച്ഛനും അമ്മയ്ക്കും സഹോദരനും അപകടത്തില്‍ പരിക്കേറ്റു.

നിയന്ത്രണംവിട്ട കാര്‍ റോഡില്‍ തെന്നിമറിഞ്ഞ് ലോറിയുമായി കൂട്ടിയിടിക്കുകയായിരുന്നെന്ന് പോലീസ് പറഞ്ഞു. കാറിന്റെ പിന്നിലേക്കാണ് ലോറി ഇടിച്ചുകയറിയത്. പിന്‍സീറ്റിലായിരുന്ന അഞ്ജു തത്ക്ഷണം മരിച്ചു. ഒപ്പമുണ്ടായിരുന്ന അമ്മ രേണുകാദേവിക്ക് ഗുരുതരമായി പരിക്കേറ്റിട്ടുണ്ട്.

അഞ്ജുവിന്റെ അച്ഛന്‍ കൊല്ലം ശൂരനാട് കണ്ണമം അരുണോദയം വീട്ടില്‍ വാസുദേവന്‍ നായര്‍, അമ്മ രേണുകാദേവി, സഹോദരന്‍ അരുണ്‍ വി. ദേവ് എന്നിവര്‍ പരിക്കുകളോടെ വണ്ടാനം മെഡിക്കല്‍ കോളേജ് ആശുപത്രിയില്‍ ചികിത്സയിലാണ്.