സായി സ്നേഹ തീരത്തിന്റെ തണലില്‍ നിന്നും അനിത ഇനി ജിതേഷിന്റെ സ്‌നേഹക്കൂട്ടില്‍...!
ആദിവാസി കുട്ടികളുടെ സംരക്ഷണ കേന്ദ്രമായ പെരിന്തല്‍മണ്ണ സായി സ്നേഹ തീരത്തിന്റെ തണല്‍ തേടി അമ്മിനിക്കാട് മുള്ളന്‍മട ആദിവാസി കോളനിയിലെ പരേതരായ ചാത്തന്റെയും ലീലയുടെയും മകള്‍ അനിത എത്തിയത് 7 വര്‍ഷം മുന്‍പാണ്. അവിടുന്നിങ്ങോട്ട് അറുപതോളം ആദിവാസി കുട്ടികള്‍ക്ക് അനിത സ്വന്തം ചേച്ചിയായിരുന്നു.
ഇന്നലെ അനിതയുടെ വിവാഹമായിരുന്നു. കണ്ണൂര്‍ കരിപ്പാല്‍ കല്ലമ്പള്ളി വീട്ടില്‍ കെ.കെ.കരുണാകരന്‍ നമ്പ്യാരുടെയും ഓമന അഴീക്കോടന്റെയും മകന്‍ ജിതേഷ് ആയിരുന്നു വരന്‍. സ്നേഹതീരം മുഖ്യ ഭാരവാഹിയായ കെ.ആര്‍.രവിയുടെ നേതൃത്വത്തില്‍ ഇരുവീട്ടുകാരുമായി ആലോചിച്ചാണ് വിവാഹം ഉറപ്പിച്ചത്.
വിവാഹത്തിന്റെ ഭാഗമായി സ്വയംവരം എന്ന പേരില്‍ തുടങ്ങിയ വാട്‌സാപ് ഗ്രൂപ്പിലൂടെ വിവരം പങ്കുവച്ചതോടെ നാടൊന്നാകെ വിവാഹം ഏറ്റെടുക്കുകയായിരുന്നു. സ്വര്‍ണാഭരണം മുതല്‍ പന്തലും വിവാഹച്ചെലവും സദ്യയും വിവാഹ വസ്ത്രങ്ങളും എല്ലാം പലരായി ഏറ്റെടുത്തു. കോവിഡ് മാനദണ്ഡങ്ങള്‍ പാലിച്ച് സായി സ്നേഹതീരത്തിലായിരുന്നു ചടങ്ങ്. കര്‍മങ്ങള്‍ക്ക് സി.വിശ്വനാഥന്‍ കാര്‍മികത്വം വഹിച്ചു.
ആദിവാസി ക്ഷേമ പ്രവര്‍ത്തകന്‍ കെ.ആര്‍.രവി, മഞ്ഞളാംകുഴി അലി എംഎല്‍എ, സത്യസായി സേവാസംഘം ഭാരവാഹികളായ ശിവശങ്കരന്‍, കെ.ടി.വിജയകുമാര്‍, കെ.ഗോപകുമാര്‍, ഗോപാലകൃഷ്ണന്‍, ഐഎംഎ പ്രസിഡന്റ് ഡോ.കൊച്ചു എസ് മണി, ചുമട്ടു തൊഴിലാളി ക്ഷേമ ബോര്‍ഡ് ചെയര്‍മാന്‍ വി.ശശികുമാര്‍, ഭക്ഷ്യ കമ്മിഷന്‍ അംഗം വി.രമേശന്‍ എന്നിവര്‍ നേതൃത്വം നല്‍കി.
https://www.facebook.com/Malayalivartha
