തോമസ് ഐസക്കിനെ തള്ളി സി.പി.എം; പരസ്യ പ്രതികരണം ഒഴിവാക്കേണ്ടതായിരുന്നുവെന്ന് സെക്രട്ടറിയേറ്റ് പ്രസ്താവന; അടിയന്തര സെക്രട്ടറിയേറ്റ് വിളിച്ചുകൂട്ടി ഒരു മന്ത്രിക്കെതിരെ പ്രസ്താവന ഇറക്കിയത് അപൂര്വ സംഭവം
കേന്ദ്ര നേതൃത്വം നിലപാട് വ്യക്തമാക്കിയതിന് പിന്നാലെ സി.പി.എം സംസ്ഥാന സെക്രട്ടറിയേറ്റും ധനമന്ത്രി തോമസ് ഐസക്കിനെ തള്ളി. കെ.എസ്.എഫ്.ഇയിലെ വിജിലന്സ് പരിശോധനയില് സി.പി.എമ്മിന്റെ പിന്തുണ മുഖ്യമന്ത്രി പിണറായി വിജയന്. വിഷയത്തില് പരസ്യ പ്രതികരണങ്ങള് ഒഴിവാക്കേണ്ടതായിരുന്നുവെന്ന് സി.പി.എം.സംസ്ഥാന സെക്രട്ടേറിയറ്റ് വിലയിരുത്തി.സംസ്ഥാനത്തെ നേതാക്കളുടെ പരസ്യപ്രസ്താവനയില് സിപിഎം കേന്ദ്ര നേതൃതം അതൃപ്തി രേഖപ്പെടുത്തിയിരുന്നു. തോമസ് ഐസക്ക് ഉള്പ്പടെയുള്ള മുതിര്ന്ന നേതാക്കള് വികാരപരമായി പ്രതികരിച്ചത് ശരിയായില്ലെന്ന നിലപാടിലാണ് കേന്ദ്ര നേതൃത്വം. പ്രസ്താവനകള് നടത്തുമ്പോള് ജാഗ്രത വേണമെന്ന നിലപാട് കേന്ദ്ര നേതാക്കള് ആവര്ത്തിക്കുകയും ചെയ്തു. ഇതിന് പിന്നാലെയാണ് സി.പി.എം സെക്രട്ടറിയേറ്റ് പത്രക്കുറിപ്പ് ഇറക്കിയത്.
കെ.എസ്.എഫ്.ഇയില് വിജിലന്സ് നടത്തിയത് സാധാരണ ഗതിയിലുള്ള പരിശോധനയാണെന്ന് മുഖ്യമന്ത്രി തന്നെ വ്യക്തമാക്കിയിട്ടുണ്ടെന്നും സി.പി.എം. സെക്രട്ടറിയറ്റ് പുറത്തിറക്കിയ പത്രക്കുറിപ്പില് പറയുന്നു. വിജിലന്സ് പരിശോധന സംബന്ധിച്ചുണ്ടായ ചില പ്രതികരണങ്ങള് തെറ്റായ വ്യാഖ്യാനത്തിനും പ്രചാരണത്തിനും ഉപയോഗിക്കപ്പെട്ടിട്ടുണ്ട്. കെ..എസ്.എഫ്.ഇ. പോലെ മികവാര്ന്ന സ്ഥാപനത്തിനെ അപകീര്ത്തിപ്പെടുത്താന് ഈ പരിശോധനയെ ചിലര് ഉപയോഗിക്കുന്നതു കണ്ട് നടത്തിയ പ്രതികരണങ്ങളായിരുന്നു അത്. എന്നാല് അത്തരം പരസ്യ പ്രതികരണങ്ങള് ഒഴിവാക്കേണ്ടതായിരുന്നുവെന്നും പ്രസ്താവന പറയുന്നു.
കെ.എസ്.എഫ്.ഇയിലെ വിജിലന്സ് പരിശോധനയുടെ പശ്ചാത്തലത്തില് പാര്ട്ടിയിലും സര്ക്കാരിലും അഭിപ്രായ വ്യത്യാസമുണ്ടെന്ന പ്രചാരവേല അടിസ്ഥാനരഹിതവും ആശയക്കുഴപ്പം സൃഷ്ടിക്കാനുമുള്ള രാഷ്ട്രീയ എതിരാളികളുടെ വ്യഥാശ്രമമാണെന്നും പ്രസ്താവനയില് സി.പി.എം. വ്യക്തമാക്കി. കേരളത്തിലെ എല്.ഡി.എഫ് സര്ക്കാര് മികച്ച നിലയിലാണ് പ്രവര്ത്തിക്കുന്നത്. നാടിന്റെ വികസനത്തിനും ജനങ്ങളുടെ ക്ഷേമത്തിനും വേണ്ടി നടത്തുന്ന പ്രവര്ത്തനങ്ങള്ക്ക് പൊതുസമൂഹത്തില് നല്ല സ്വീകാര്യതയും ലഭിച്ചിട്ടുണ്ട്. അതു കൊണ്ടു കൂടിയാണ് നിരന്തരം വിവാദങ്ങള് സൃഷ്ടിച്ച് ആശയക്കുഴപ്പമുണ്ടാക്കാന് കഴിയുമോയെന്ന് പ്രതിപക്ഷവും ഒരു വിഭാഗം മാധ്യമങ്ങളും ശ്രമിക്കുന്നത്. എല്ലാ സീമകളേയും ലംഘിച്ചുള്ള ഈ ജനാധിപത്യവിരുദ്ധ നീക്കം ജനം തിരിച്ചറിയുന്നുണ്ടെന്നും പത്രക്കുറിപ്പില് പറയുന്നു.
ഈ സാഹചര്യത്തിലാണ് പാര്ട്ടിയിലും സര്ക്കാരിലും ഭിന്നിപ്പുണ്ട് എന്ന് വരുത്തി തീര്ക്കാനുള്ള ശ്രമം തുടങ്ങിയിട്ടുള്ളത്. പാര്ട്ടിയും, എല്.ഡി.എഫും ഒറ്റക്കെട്ടാണെന്നത് സര്ക്കാരിന്റെ പ്രവര്ത്തനങ്ങള്ക്ക് കരുത്തു പകരുന്ന പ്രധാന ഘടകമാണ്. ഇത് രാഷ്ട്രീയ എതിരാളികളെ നിരാശരാക്കുന്നുണ്ട്. അതാണ് ഇപ്പോഴത്തെ പ്രചാരവേലകളില് പ്രതിഫലിക്കുന്നത്. ഇത്തരം സന്ദര്ഭങ്ങളില് എന്തും വിവാദമാക്കാന് ശ്രമിക്കുന്നവര് ഉണ്ടെന്ന തിരിച്ചറിവ് പ്രധാനമാണ്. കേരളത്തിലെ മികച്ച രീതിയില് പ്രവര്ത്തിക്കുന്ന ധനകാര്യ സ്ഥാപനമാണ് കെ.എസ്.എഫ്.ഇ. അതിനെ തകര്ക്കുന്നതിനായി സങ്കുചിത രാഷ്ട്രീയ ലക്ഷ്യം വെച്ച് യു.ഡി.എഫും ബി.ജെ.പിയും നടത്തുന്ന നീക്കം പൊതുസമൂഹം തിരിച്ചറിയുന്നുണ്ടെന്നും സി.പി.എം. പ്രസ്താവനയില് പറയുന്നു.
അവൈലബിള് സെക്രട്ടേറിയറ്റ് അടിയന്തരമായി ചേര്ന്നാണ് കെഎസ്എഫ്ഇ വിവാദം ചര്ച്ചക്ക് എടുത്തത്. പരിശോധനക്ക് എതിരെ എടുത്ത നിലപാടിനെ ധനമന്ത്രി സെക്രട്ടേറിയറ്റ് യോഗത്തില് ന്യായീകരിച്ചെന്നാണ് വിവരം. ധനമന്ത്രിയുടെ പരസ്യ വിമര്ശനം തള്ളി വിജിലന്സിനെ പൂര്ണ്ണമായും ശരിവച്ച മുഖ്യമന്ത്രി പിണറായി വിജയനും നടപടിയില് തെറ്റില്ലെന്ന് ഉറച്ച് നിന്നു. ഇതിന് ശേഷമാണ് സംസ്ഥാന സെക്രട്ടേറിയറ്റ് ഔദ്യോഗിക വാര്ത്താ കുറിപ്പ് ഇറക്കി പരസ്യ വിമര്ശനം നടത്തിയ മന്ത്രിയെ തള്ളിപ്പറഞ്ഞത്. കെഎസ്എഫ്ഇയില് നടന്ന വിജിലന്സ് പരിശോധന വിവാദത്തിലും നേതാക്കളുടെ പരസ്യ പ്രതികരണത്തിലും വലിയ അതൃപ്തിയാണ് സിപിഎം കേന്ദ്ര നേതൃത്വത്തിനും ഉള്ളത്. പരസ്യപ്രസ്താവന മതിയാക്കാനും വിവാദം പറഞ്ഞ് അവസാനിപ്പിക്കാനും അടിന്തര നടപടി വേണമെന്ന് കേന്ദ്ര നേതൃത്വം നിര്ദ്ദേശം നല്കിയിട്ടുമുണ്ട്.
https://www.facebook.com/Malayalivartha