അജിത്ത് ഡോവലിനോട് കളിക്കുമ്പോള്‍ സൂക്ഷിച്ച് കളിക്കണ്ടേ. അല്ലെങ്കില്‍ ഇങ്ങനെ മാപ്പ്, മാപ്പ് എന്ന് പറഞ്ഞ് പുറകെ നടക്കേണ്ടി വരും. കോണ്‍ഗ്രസ് നേതാവും മുന്‍ കേന്ദ്രമന്ത്രിയുമായ ജയറാം രമേശിന് ഇപ്പോള്‍ കാര്യങ്ങള്‍ ബോധ്യമിട്ടുണ്ട്. അതുകൊണ്ടു തന്നെയാണ് മാനനഷ്ട കേസില്‍ ദേശീയ സുരക്ഷാ ഉപദേഷ്ടാവ് അജിത് ഡോവലിന്റെ മകന്‍ വിവേക് ഡോവലിനോട് ജയറാം രമേശ് മാപ്പ് പറഞ്ഞത്. മാപ്പ് വിവേക് ഡോവല്‍ അംഗീകരിച്ചതിനാല്‍ ജയറാം രമേശിനെതിരായ മാനനഷ്ട കേസിലെ നടപടി ഡല്‍ഹിയിലെ റോസ് അവന്യു കോടതി അവസാനിപ്പിച്ചു.

2019 ജനുവരിയില്‍ കാരവന്‍ മാസികയില്‍ വന്ന ലേഖനത്തിന്റെ അടിസ്ഥാനത്തിലാണ് ജയറാം രമേശ് ആരോപണം ഉന്നയിച്ചത്. ഡല്‍ഹിയില്‍ വാര്‍ത്ത സമ്മേളനം നടത്തിയായിരുന്നു വിമര്‍ശനം. തന്റെ പിതാവിനോടുള്ള രാഷ്ട്രീയമായ എതിര്‍പ്പ് ജയറാം രമേശ് തീര്‍ക്കുകയായിരുന്നുവെന്നാണ് വിവേക് ഡോവല്‍ നല്‍കിയ മാനനഷ്ട കേസില്‍ ചൂണ്ടിക്കാട്ടിയിരുന്നത്. നികത്താന്‍ കഴിയാത്ത നഷ്ടമാണ് ജയറാം രമേശ് വരുത്തിയതെന്നും ഡോവല്‍ ആരോപിച്ചിരുന്നു. തെരെഞ്ഞെടുപ്പ് സമയമായതിനാല്‍ ആരോപണത്തിന്റെ സത്യാവസ്ഥ പരിശോധിക്കാന്‍ സാധിച്ചിരുന്നില്ല എന്ന് ജയറാം രമേശ് മാപ്പപേക്ഷയില്‍ വ്യക്തമാക്കി.

അതേസമയം മാപ്പപേക്ഷിക്കില്ല എന്ന് വ്യക്തമാക്കിയ കാരവന്‍ മാസികയ്ക്കും ലേഖകനുമെതിരായ മാനനഷ്ട കേസ് തുടരും. വിവേക് ഡോവലിനെതിരെ നികുതി വെട്ടിപ്പ് ആരോപണമാണ് രേഖകള്‍ പുറത്ത് വിട്ട് കാരവന്‍ മാസിക അന്ന് ഉയര്‍ത്തിയത്. വിവേക് ഡോവലിന്റെ കെമാന്‍ ദ്വീപിലെ ഹെഡ്ജ് ഫണ്ട് കമ്പനിയുമായി ബന്ധപ്പെട്ടയിരുന്നു വെളിപ്പെടുത്തലുകള്‍. പ്രധാനമന്ത്രി നരേന്ദ്രമോദി 500ന്റെയും 1000ത്തിന്റെയും കറന്‍സി നോട്ടുകള്‍ നിരോധിച്ച് 13 ദിവസത്തിനുള്ളിലാണ് വിവേക് ഡോവലിന്റെ ഉടമസ്ഥതയിലുള്ള കമ്പനി സ്ഥാപിക്കുന്നത്. വിവേക് ഡോവലിന്റെ ബിസിനസ് സംരംഭങ്ങളില്‍ സഹോദരന്‍ ശൗര്യ ഡോവലിനും പങ്കുണ്ടെന്നും കാരവന്‍ റിപ്പോര്‍ട്ട് ചെയ്തു. ബിജെപി സര്‍ക്കാരിന്റെ നയരൂപീകരണത്തില്‍ നിര്‍ണായകമായ പങ്കുവഹിക്കുന്ന സംഘപരിവാരിന്റെ ചിന്താസ്ഥാപനമായ ഇന്ത്യ ഫൗണ്ടേഷന്റെ മേധാവിയാണ് ശൗര്യ ഡോവല്‍.

2011ല്‍ അജിത് ഡോവല്‍, മോദി സര്‍ക്കാരില്‍ നിര്‍ണായകമായ ഇടങ്ങളില്‍ സ്ഥാനം പിടിച്ചതിനു ശേഷമാണ് മകന്‍ വിവേക് ഡോവല്‍ തന്റെ ബിസിനസ് സംരംഭങ്ങള്‍ക്ക് തുടക്കം കുറിച്ചതെന്നും കാരവന്‍ റിപോര്‍ട്ട് ചെയ്യുന്നു. സിങ്കപ്പൂരില്‍ സ്ഥിരതാമസക്കാരനും ബ്രിട്ടീഷ് പൗരനുമായ വിവേക് ഡോവല്‍ സ്ഥാപിച്ച ജി.എന്‍.വൈ ഏഷ്യ ഫണ്ട് എന്ന പേരിലുള്ള ഹെഡ്ജ് ഫണ്ടില്‍ അദ്ദേഹത്തെ കൂടാതെ ഡോണ്‍ ഡബ്ല്യു ഇ ബാങ്ക്സ്, ലുലു ഗ്രൂപ്പ് മേധാവികളില്‍ ഒരാളായ മുഹമ്മദ് അല്‍ത്താഫ് മുസ്ല്യാംവീട്ടില്‍ എന്നിവരും ഡയറക്ടര്‍മാരാണ്.

ലോകത്തിലെ വലിയ വ്യവസായികള്‍ നികുതിവെട്ടിപ്പു നടത്തുന്നതിന് ഉപയോഗിക്കുന്ന പ്രധാന മാര്‍ഗങ്ങളിലൊന്നാണ് വിദേശ ഹെഡ്ജ് ഫണ്ടുകള്‍. അത്തരക്കാര്‍ നികുതിയിളവുകളുള്ള രാജ്യങ്ങളിലെ ഹെഡ്ജ് ഫണ്ടുകളില്‍ നിക്ഷേപിക്കുകയോ സ്വയം ഹെഡ്ജ് ഫണ്ട് കമ്പനികള്‍ സ്ഥാപിക്കുകയോ ചെയ്യുന്നു. അതുവഴി തങ്ങള്‍ പ്രവര്‍ത്തിച്ചുകൊണ്ടിരിക്കുന്ന രാജ്യങ്ങളില്‍ നികുതി കൊടുക്കുന്നതില്‍ നിന്ന് ഒഴിവാകുന്നു. നികുതിവെട്ടിപ്പുകാര്‍ ഉപയോഗിക്കുന്ന പ്രധാന മാര്‍ഗങ്ങളിലൊന്നാണ് ഇതെന്നാണ് ആക്ഷേപം.