ഓരോ തെരഞ്ഞെടുപ്പും ഓരോ പ്രതീക്ഷകളാണ് ജനങ്ങൾക്ക് നൽകുന്നത്. നാടിന് നല്ലത് ചെയ്യുന്നവരാകണം വരേണ്ടത് എന്ന വിശ്വാസത്തിൽ നാം വോട്ട് ചെയ്യും. എന്നാൽ പലപ്പോഴും സംഭവിക്കുന്നതോ? മറിച്ചാകും. അത്തരത്തിൽ ഒരു കുറിപ്പാണ് ഡോക്ടർ ഷിംന അസീസ് കുറിക്കുന്നത്.

ഫേസ്ബുക്ക് കുറിപ്പിന്റെ പൂർണരൂപം ഇങ്ങനെ;

ലോക്‌സഭ ഇലക്ഷൻ ഉണ്ടാവുമ്പോ അങ്ങോട്ട്‌, നിയമസഭ ഇലക്ഷൻ ഉണ്ടാകുമ്പോൾ ഇങ്ങോട്ട്‌ തിരിച്ചും. പഞ്ചായത്ത് ഇലക്ഷൻ ഇപ്പോ കഴിഞ്ഞത് ഭാഗ്യമായി, അതൊരു ഓർഡറിൽ മൂന്നാമത് വന്നിരുന്നെങ്കിൽ നല്ല പ്രാസം ആയേനെ! രണ്ട് കൊല്ലം മുൻപ് രാഹുൽ ഗാന്ധിയുടെ "തരംഗം" ഇന്ത്യയൊട്ടാകെ ആഞ്ഞടിക്കുമെന്നും അങ്ങനെ കോൺഗ്രസ് അധികാരത്തിലേറി താക്കോൽസ്ഥാനമൊന്ന് അടിച്ചെടുക്കാമെന്നും സ്വപ്നം കണ്ടാവണം അദ്ദേഹം ജുദ്ധത്തിന് ഇറങ്ങിപ്പുറപ്പെട്ടത്. അത് മലർപൊടിക്കാരന്റെ സ്വപ്നം ആയ സ്ഥിതിക്ക് തിരികെ കേരളത്തിൽ താക്കോൽ വല്ലതും കിട്ടുമോ എന്നും നോക്കി ചാടി വരുന്നതാണ്.

മോഡി സർക്കാരിന്റെ ഫാസിസ്‍റ്റ്‌ നടപടികൾക്കെതിരെ പട നയിക്കാൻ പോയിട്ട്‌, മുത്തലാഖ്‌ ബില്ല്‌ പോലെ സമുദായത്തെ സംബന്ധിക്കുന്ന ഒരു സുപ്രധാന തീരുമാനത്തിനെതിരെ വോട്ട്‌ ചെയ്യുന്നതിന്‌ പകരം ചങ്ങായീടെ വീട്ടിലെ കല്യാണം കൂടാൻ പോയ ആളാണ് ഈ 'മുസ്‌ലിം' ലീഗ്‌ എംപി. ഈ ഒരു വോട്ട്‌ കൊണ്ട്‌ ബില്ല്‌ പാസാവുന്നതിൽ ഒരു മാറ്റവും വരുമോ ഇല്ലയോ എന്നല്ല, വോട്ട്‌ ചെയ്‌ത്‌ ജയിപ്പിച്ച്‌ വിട്ട ജനങ്ങളുടെ പ്രാതിനിധ്യം അവിടെ രേഖപ്പെടുത്താതെ കൊഞ്ഞനം കുത്തിയതൊന്നും ആരും മറന്നിട്ടില്ല.
അന്ന് രണ്ടര ലക്ഷം വോട്ടിന് കുഞ്ഞാലിക്കുട്ടിയോട് ലോക്‌സഭ ഇലക്ഷനിൽ തോറ്റ വി.പി.സാനു ഇന്ന് ഡൽഹിയിൽ കർഷകസമരത്തിനോട്‌ ചേർന്ന്‌ തന്റെ നിലപാടിലൂന്നി തലയുയർത്തി നിൽക്കുന്നു എന്നതും കാണാതെ പോകരുത്‌.

ചിന്തയിൽ ചെറുപ്പമുള്ള, പലതും ചെയ്യാൻ കഴിവും സാധ്യതയുമുള്ള ഇത്‌ പോലുള്ളവരെ നമ്മൾ തഴയുന്നതാകട്ടെ ഇത്തരം ചഞ്ചലചിത്തരുടെ രാഷ്‌ട്രീയമോഹങ്ങളും അധികാരക്കൊതിയും നിറവേറ്റിക്കൊടുക്കാനും. ഭരണത്തിലേറിയാൽ ചരിത്രം സൃഷ്‌ടിച്ചേക്കാവുന്ന എത്രയെത്ര പേരെയാണ്‌ നിഷ്‌കരുണം നാം തള്ളിക്കളയുന്നത്‌ ! വരണം സാഹിബേ, വെറുതേ വന്ന്‌ നിന്നാലും കോണിക്ക്‌ കുത്തുന്ന മലപ്പുറത്തെ ഏതെങ്കിലും ഒരു മൂലയിൽ തന്നെ നിൽക്കണം, ജയിക്കണം, നിയമസഭേൽ കേറണം. ഓരോരോ ജനതയ്‌ക്കും അവരവരർഹിക്കുന്ന നേതാക്കളെത്തന്നെ കിട്ടും എന്നാണല്ലോ....!
ജനം എന്നെങ്കിലും ഇതൊക്കെ തിരിച്ചറിഞ്ഞ് തക്കതായ മറുപടി കൊടുക്കുമോ യെന്തോ!
Dr. Shimna Azeez