രക്ഷപ്പെടാന് ഇനി ഒരേ ഒരു മാര്ഗം... തോല്വിക്ക് കാരണം നിരത്തി അശോക് ചവാന് സമിതി റിപ്പോര്ട്ട്; ന്യൂനപക്ഷ പിന്തുണ കുറഞ്ഞത് നേതൃത്വം ദുര്ബലമെന്ന പ്രതീതിയുണ്ടായത് കൊണ്ട്; പുതിയ കെ.പി.സി.സി പ്രസിഡന്റായി കെ സുധാകരനെ ഉടന് പ്രഖ്യാപിക്കും?
നമ്മള് എങ്ങനെ തോറ്റു, നിയമസഭാ തോല്വിക്ക് ശേഷം കോണ്ഗ്രസും ചര്ച്ച ചെയ്തു തുടങ്ങിയ വിഷയമാണിത്. മാസം ഒന്ന് കഴിഞ്ഞിട്ടും ഇതിന് ഒരു തീരുമാനത്തില് എത്താന് കോണ്ഗ്രസിന് സാധിച്ചില്ല. പരസ്പരം ചെളി വാരിയെറിഞ്ഞും മറ്റുള്ളവരുടെ തലയില് ഉത്തവാദിത്വം കെട്ടിവച്ചും സ്വന്തം ഭാഗം ന്യായീകരിക്കാന് എല്ലാ നേതാക്കളും ശ്രമിക്കുകയും ചെയ്തു. ഇതിനിടെയാണ് തോല്വിയെ കുറിച്ച് പഠിക്കാന് ഹൈക്കമാന്ഡ് നിയോഗിച്ച അശോക് ചവാന് സമിതി ഹൈക്കമാന്ഡിന് റിപ്പോര്ട്ട് സമര്പ്പിച്ചിരിക്കുന്നത്. അതില് തോല്വിക്ക് കാരണവും മാറ്റത്തിന് വേണ്ടി ഇനി എന്താണ് വേണ്ടതെന്ന നിര്ദ്ദേശവും വ്യക്തമായി തന്നെ പറയുന്നുണ്ടെന്നാണ് സൂചന. അതേസമയം റിപ്പോര്ട്ടില് ആരുടെയും പേരെടുത്ത് പറഞ്ഞ് കുറ്റപ്പെടുത്തുന്നില്ല എന്നതും ശ്രദ്ധേയമാണ്.
റിപ്പോര്ട്ടിന്റെ അടിസ്ഥാനത്തില് ഉടന് കെ.പി.സി.സി. പ്രസിഡന്റിനെ തിരഞ്ഞെടുക്കുമെന്നാണ് ഹൈക്കമാന്ഡ് വൃത്തങ്ങള് നല്കുന്ന സൂചന. അമിത ആത്മവിശ്വാസം തിരഞ്ഞെടുപ്പില് തിരിച്ചടിയായി എന്ന വിലയിരുത്തലാണ് സമിതിക്കുളളത്. റിപ്പോര്ട്ടില് ആരേയും പേരെടുത്ത് കുറ്റപ്പെടുത്തിയിട്ടില്ലെങ്കിലും കൂട്ടായ നേതൃത്വം ഉണ്ടായില്ല എന്ന് റിപ്പോര്ട്ടില് പരാമര്ശമുണ്ട്. ന്യൂനപക്ഷ പിന്തുണ കുറഞ്ഞെന്ന നേതാക്കളുടെ വിലയിരുത്തലിനോട് പൂര്ണമായും സമിതി യോജിച്ചു. ഇതിന് കാരണം നേതൃത്വം ദുര്ബലമെന്ന പ്രതീതിയുണ്ടായതാണെന്നും സമിതി വിലയിരുത്തി. ഇതിന്റെ അടിസ്ഥാനത്തിലാണ് നേതൃമാറ്റം ഉള്പ്പെടെ സമഗ്ര അഴിച്ചുപണി വേണമെന്നാണ് ശുപാര്ശ സമിതി നല്കിയത്.
ചൊവ്വാഴ്ച രാത്രി കൈമാറിയ റിപ്പോര്ട്ട് കോണ്ഗ്രസ് പ്രവര്ത്തക സമിതി പരിശോധിക്കും. കഴിഞ്ഞമാസം പതിനൊന്നിനാണ് പ്രവര്ത്തക സമിതിയോഗം അശോക് ചവാന് കമ്മിറ്റിക്ക് രൂപം നല്കിയത്. രണ്ടാഴ്ചയ്ക്കുളളില് റിപ്പോര്ട്ട് നല്കാനായിരുന്നു നിര്ദേശം. കേരളത്തില് നേരിട്ട് എത്തുമെന്ന് അറിയിച്ചിരുന്നുവെങ്കിലും കൊവിഡ് ലോക്ക്ഡൗണിനെ തുടര്ന്ന് എത്താന് സാധിച്ചില്ല. ഓണ്ലൈന് മുഖാന്തരമാണ് കമ്മിറ്റി വിവരങ്ങള് ആരാഞ്ഞത്.
എംഎല്എമാര്, എംപിമാര്, മറ്റുജനപ്രതിനിധികള്, മുതിര്ന്ന നേതാക്കള്, മാധ്യമപ്രവര്ത്തകര്, രാഷ്ട്രീയ നിരീക്ഷകര് എന്നിവരില് നിന്നാണ് തിരഞ്ഞെടുപ്പ് തോല്വിയുമായി ബന്ധപ്പെട്ട കാര്യങ്ങള് വിലയിരുത്തിയത്. കേരളം ഉള്പ്പടെയുളള നാല് സംസ്ഥാനങ്ങളിലെ നിയമസഭാ തിരഞ്ഞെടുപ്പ് തോല്വിയുമായി ബന്ധപ്പെട്ട സമഗ്ര റിപ്പോര്ട്ടാണ് അശോക് ചവാന് സമിതി സമര്പ്പിച്ചത്.
അശോക് ചവാന് സമിതി റിപ്പോര്ട്ടിന്റെ അടിസ്ഥാനത്തിലായിരിക്കും കെപിസിസി പ്രസിഡന്റിന്റെ കാര്യത്തില് ഹൈക്കമാന്ഡ് തീരുമാനമെടുക്കുക. ആരും സ്വയം നാമനിര്ദേശം ചെയ്യേണ്ടെന്ന് ഹൈക്കമാന്ഡ് വ്യക്തമാക്കിയിട്ടുണ്ട്. കെ.പി.സി.സി. അധ്യക്ഷനെ സംബന്ധിച്ച് സര്വേ നടത്തുന്നുണ്ടെന്നും ഇതിന്റെ അടിസ്ഥാനത്തിലായിരിക്കും അധ്യക്ഷനെ നിയമിക്കുക എന്നും സൂചനയുണ്ട്.
സര്വേയില് ഏറ്റവും അധികം സാധ്യത കല്പിച്ചിരിക്കുന്നത് കെ സുധാകരനാണ്. കെ.സുധാകരനൊപ്പം പരിഗണിച്ചിരുന്നത് കെ. മുരളീധരനെയായിരുന്നു. എന്നാല് താന് കെ.പി.സി.സി പ്രസിഡന്റ് ആകാനില്ലെന്ന് അദ്ദേഹം കഴിഞ്ഞ ദിവസം വ്യക്തമാക്കിയിരുന്നു. ഗ്രൂപ്പുകള് കൊടിക്കുന്നില് സുരേഷിന്റെ പേര് ഹൈക്കമാന്ഡിന് മുന്നില് വയ്ക്കുന്നുണ്ടെങ്കിലും ഇതിന് സാധ്യത വളരെ കുറവാണ്. ഈ നിലക്ക് കെ.പി.സി.സി പ്രസിഡന്റായി കെ. സുധാകരന്റെ പേര് ഉടന് തന്നെ ഹൈക്കമാന്ഡ് പ്രഖ്യാപിക്കുമെന്നാണ് കരുതുന്നത്.
https://www.facebook.com/Malayalivartha