നഫ്താലി ബെനറ്റ് ഇസ്രയേലിന്റെ പുതിയ പ്രധാനമന്ത്രിയാകും; സത്യപ്രതിജ്ഞ പത്തുദിവസത്തിനുള്ളില്; ബെന്യമിന് നെതന്യാഹു യുഗം അവസാനിക്കുമ്പോള്; പ്രതിപക്ഷ പാര്ട്ടികളുടെ സഖ്യത്തില് രൂപീകരിക്കുന്ന സര്ക്കാരില് പാലസ്തീന്റെ ആശങ്ക ഉയര്ത്തുന്നു; കാരണം ഇതാണ്
പത്തുവര്ഷത്തിലേറെയായി ഇസ്രയേല് തുടരുന്ന ബെന്യമിന് നെതന്യാഹു യുഗം അവസാനിക്കുമെന്ന് ഏറെ കുറേ ഉറപ്പായി. പ്രതിപക്ഷ പാര്ട്ടികള് സഖ്യം രൂപീകരിച്ചതാണ് രണ്ടുവര്ഷത്തിനിടെ നാലു തിരഞ്ഞെടുപ്പുകള് കണ്ട രാജ്യത്ത് ഭരണമാറ്റത്തിന് വഴിയൊരുക്കുന്നത്. ഇതോടെ പ്രധാനമന്ത്രി സ്ഥാനം നെതന്യാഹുവിന് നഷ്ടമാകും. സര്ക്കാര് രൂപീകരണത്തിന് ആവശ്യമായ പിന്തുണ ലഭിച്ചതായി പ്രതിപക്ഷ നേതാവ് യയ്ര് ലപീദ് ഇസ്രയേല് പ്രസിഡന്റ് റൂവന് റിവ്ലിനെ അറിയിച്ചു.
തീവ്രവലതുപക്ഷ യമിന പാര്ട്ടിയുടെ നേതാവ് നഫ്താലി ബെനറ്റുമായാണ് ലപീദ് സഖ്യമുണ്ടാക്കിയത്. ആദ്യ രണ്ടുവര്ഷം ബെനറ്റ് പ്രധാനമന്ത്രിയാവും. അതേസമയം ബെനറ്റ് പ്രധാനമന്ത്രിയാകുമ്പോള് ചങ്കിടിപ്പ് ഉയരുന്നത് പാലസ്തീനും ഹമാസിനുമാണ്. കിങ്മേക്കറായി കളം നിറഞ്ഞ നഫ്താലി ബെനറ്റ് ശതകോടീശ്വരനാണ്. അതുകൊണ്ടു തന്നെ പിടിച്ചതിലും വലുതാണോ അളയില് എന്ന ആശങ്കയാണ് ഇസ്രയേല് - പലസ്തീന് വിഷയം കൈകാര്യം ചെയ്യുന്ന പലര്ക്കുമുള്ളത്.
തീവ്രനിലപാടുകളുള്ള നഫ്താലി ബെനറ്റ് പ്രധാനമന്ത്രി സ്ഥാനത്തേക്ക് എത്തിയാല് കാര്യങ്ങള് കൂടുതല് വഷളാകുമെന്നാണു വിലയിരുത്തല്. വെസ്റ്റ് ബാങ്കിലെ അധിനിവേശ മേഖലകള് മുഴുവനായും ഇസ്രയേലിനൊപ്പമാക്കുകയെന്ന സ്വപ്നം പേറുന്ന ബെനറ്റ്, പലസ്തീന് രൂപീകരണം, ഇസ്രയേലിനെ സംബന്ധിച്ച് ആത്മഹത്യാപരമാണെന്ന നിലപാടില് ഉറച്ചുനില്ക്കുന്ന നേതാവു കൂടിയാണ്.
രാജ്യത്തെ ഒരു വലിയ രാഷ്ട്രീയ ദുരന്തത്തില്നിന്നു രക്ഷപ്പെടുത്താന് രാഷ്ട്രീയ എതിരാളികള്ക്കൊപ്പം ചേരുകയാണെന്നാണ് ബെനറ്റ് പറഞ്ഞത്. ഇതോടെയാണ് ഇസ്രയേലില് പുതിയ സര്ക്കാരുണ്ടാക്കാന് പ്രതിപക്ഷകക്ഷികള് തമ്മില് ധാരണ ഉടലെടുത്തത്. 2023 സെപ്റ്റംബര് വരെ താന് പ്രധാനമന്ത്രിയായിരിക്കുമെന്നാണ് ബെനറ്റ് ഞായറാഴ്ച വ്യക്തമാക്കിയിരുന്നു.
നാല്പത്തിയൊമ്പതുകാരനായ നഫ്താലി ബെനറ്റിന്റെ മാതാപിതാക്കള് അമേരിക്കയില്നിന്ന് ഇസ്രയേലിലേക്ക് കുടിയേറിയവരാണ്. സാന്ഫാന്സിസ്കോയില്നിന്നാണ് ബെനറ്റിന്റെ മാതാപിതാക്കള് ഇസ്രയേലിലേക്ക് എത്തിയത്. ഹയ്ഫ നഗരത്തില് ജനിച്ച ബെനറ്റ് യാഥാസ്ഥിതിക ജൂത കുടുംബത്തിലെ അംഗമാണ്. ഷെഫായ ഭാര്യ ഗിലാതിനും നാലു മക്കള്ക്കുമൊപ്പം ടെല് അവീവിന്റെ പ്രന്തപ്രദേശമായ റാണണയിലാണു താമസം.
ഇസ്രയേല് സൈന്യത്തിലെ മുന് കമാന്ഡോയായ ബെനറ്റ് തന്റെ മൂത്തമകന്, 1976ല് ഉഗാണ്ടയില് ബന്ദികളാക്കിയ വിമാനയാത്രക്കാരെ രക്ഷിക്കാന് ഇസ്രയേല് നടത്തിയ ഓപ്പറേഷനില് മരിച്ച നെതന്യാഹുവിന്റെ സഹോദരന്റെ പേരാണ് നല്കിയിരിക്കുന്നത്. തൊണ്ണൂറുകളില് ഇസ്രയേല് സൈന്യത്തില് കമാന്ഡോ ആയിരുന്ന ബെനറ്റ് പല സൈനിക നീക്കങ്ങളിലും പങ്കെടുത്തു. പിന്നീട് ജറുസലേമിലെ ഹീബ്രു സര്വകലാശാലയില് നിയമം പഠിച്ചു. 1999ല് ഹൈടെക് സെക്ടറില് സ്റ്റാര്ട്ടപ്പ് ആംരഭിച്ചശേഷം ന്യൂയോര്ക്കിലേക്ക് പോയി. പിന്നീട് തന്റെ ആന്റി-ഫ്രോഡ് സോഫ്റ്റ്വെയര് കമ്പനിയായ 'ക്യോട്ട' 2005ല് അമേരിക്കന് സുരക്ഷാ സ്ഥാപനമായ ആര്എസ്എയ്ക്ക് 145 മില്യണ് ഡോളറിനു വിറ്റു. തുടര്ന്ന് ഇസ്രയേലിലേക്കു മടങ്ങി പൊതുരംഗത്തേക്ക് എത്തുകയായിരുന്നു.
രണ്ടു മാസം മുന്പു നടന്ന തിരഞ്ഞെടുപ്പിലും ആര്ക്കും ഭൂരിപക്ഷമില്ലാതെ വന്നതോടെ, ഏറ്റവും വലിയ ഒറ്റക്കക്ഷിയായ ലിക്കുഡ് പാര്ട്ടിയുടെ തലവനായ നെതന്യാഹുവിനെ സര്ക്കാരുണ്ടാക്കാന് പ്രസിഡന്റ് ആദ്യം ക്ഷണിച്ചിരുന്നു. ലിക്കുഡ് പാര്ട്ടിക്ക് 52 സീറ്റ് ലഭിച്ചിരുന്നു. നെതന്യാഹു വിരുദ്ധ പക്ഷത്തിന് 57 സീറ്റുകളും. നെതന്യാഹുവിന് പിന്തുണ നേടാന് കഴിയാതെ വന്നതോടെ അവസരം ലപീദിനു ലഭിച്ചു.
ഏഴു സീറ്റുകള് നേടിയ വലതുപക്ഷ പാര്ട്ടി യമിനയുടെയും നാലു സീറ്റുകള് നേടിയ അറബ് കക്ഷി റാആമിന്റെയും നിലപാടുകള് ഇതോടെ നിര്ണായകമായി. അവരുടെ പിന്തുണ നേടാന് ചില വിട്ടുവീഴ്ചകളിലൂടെ ലപീദിനു കഴിയുകയും ചെയ്തു. സത്യപ്രതിജ്ഞയ്ക്ക് പത്തുദിവസം ബാക്കിയുള്ളതിനാല് നെതന്യാഹൂ അപ്രതീക്ഷിത നീക്കങ്ങളിലൂടെ ഈ ധാരണ അട്ടിമറിക്കാനിടയുണ്ടെന്നും രാഷ്ട്രീയ നിരീക്ഷകര് കരുതുന്നു.
കാരണം ഒരു കാലത്ത് നെതന്യാഹുവിന്റെ വിശ്വസ്തനായിരുന്ന ബെനറ്റ് എന്നതാണ്. 2015-19 വരെ വിദ്യാഭ്യാസ മന്ത്രിയും 2019-20ല് പ്രതിരോധമന്ത്രിയുമായിരുന്നു ബെനറ്റ്. 2006ല് രാഷ്ട്രീയത്തിലെത്തിയ ബെനറ്റ് 2008 വരെ നെതന്യാഹുവിന്റെ ചീഫ് ഓഫ് സ്റ്റാഫായിരുന്നു. 2012ല് ജ്യൂയിഷ് ഹോം പാര്ട്ടിയുടെ നേതാവായി.
2018ല് ന്യൂ റൈറ്റ് പാര്ട്ടി രൂപീകരിച്ചു. 2013ലാണ് ബെനറ്റ് ദേശീയരാഷ്ട്രീയത്തിലേക്ക് എത്തുന്നത്. ജൂതകുടിയേറ്റത്തെ അനുകൂലിക്കുന്ന പാര്ട്ടിയുടെ നേതാവായി മാറിയ ബെനറ്റ് നെതന്യാഹു മന്ത്രിസഭയില് പ്രതിരോധ, വിദ്യാഭ്യാസ വകുപ്പുകളടെ ചുമതല വഹിച്ചിരുന്നു. ഈ ഘടങ്ങള് ഒരു അട്ടിമറിക്കുള്ള സാധ്യത ഇനിയിം തള്ളികളയാന് സാധിക്കില്ല.
https://www.facebook.com/Malayalivartha