അടുത്ത കൊറോണ വൈറസിന്റെ ഉറവിടമാകാന്‍ സാധ്യതയുള്ള മേഖലകളുടെ പട്ടികയില്‍ കേരളവും. കാലിഫോര്‍ണിയ, ബാര്‍ക്ലേ, മിലാന്‍, മാസി സര്‍വകലാശാലകളിലെ ഗവേഷകര്‍ ചേര്‍ന്നു തയാറാക്കിയ പട്ടികയിലാണ് കേരളവും സ്ഥാനം പിടിച്ചത്. എന്നാല്‍ പട്ടികയില്‍ മുന്നില്‍ നില്‍ക്കുന്നത് ചൈന തന്നെയാണ്. അതേ സമയം യു.കെ, ഫ്രാന്‍സ്, ഭൂട്ടാന്‍, പടിഞ്ഞാറന്‍ നേപ്പാള്‍, ഉത്തര ബംഗ്ലാദേശ് എന്നി സ്ഥലങ്ങളും പട്ടികയില്‍ ഇടംപിടിച്ചു. സാധ്യത അല്‍പം കുറവാണെങ്കിലും ഇന്തോനീഷ്യ, തായ്ലന്‍ഡ്, ഫിലിപ്പീന്‍സ് എന്നിവിടങ്ങളും പട്ടികയിലുണ്ട്.

കൊവിഡിന്റെ ഉറവിടം സംബന്ധിച്ചു തര്‍ക്കമുണ്ടെങ്കിലും വവ്വാലില്‍നിന്നാണു വൈറസ് പടര്‍ന്നതെന്നു നിഗമനത്തിന്റെ അടിസ്ഥാനത്തിലാണു കണക്കുകൂട്ടല്‍. വവ്വാലുകളില്‍നിന്നു നേരിട്ടോ അല്ലാതയോ വൈറസ് പടരാനുള്ള സാധ്യത കണക്കിലെടുത്താണു ഹോട്ട്സ്പോട്ട് നിര്‍വചിക്കുന്നത്. ഇതിലാണു കേരളവും ഇടംപിടിച്ചത്.

വനനശീകരണം, മാംസാഹാരം കൂടുതല്‍ ഉപയോഗിക്കുന്ന ജനത, കന്നുകാലി വളര്‍ത്തല്‍ കൂടുതലുള്ള മേഖല എന്നിവ വവ്വാലുകളില്‍നിന്നു മനുഷ്യരിലേക്കു വൈറസ് പടരാനുള്ള സാധ്യതകൂട്ടും. ഭക്ഷ്യ ആവശ്യത്തിനായി വളര്‍ത്തുന്ന പക്ഷികള്‍ക്കും മൃഗങ്ങള്‍ക്കും ജനിത വൈവിധ്യം കുറവായിരിക്കും. നേച്ചര്‍ ഫുഡ് ജേണലിലാണ് പഠനം പ്രസിദ്ധീകരിച്ചിരിക്കുന്നത്.

ലോകം മുഴുവന്‍ കനത്ത നാശം വിതച്ച കൊറോണ വൈറസിന്റെ ഉറവിടം എത്രയും വേഗം കണ്ടെത്തണമെന്ന മുന്നറിയിപ്പുമായി അമേരിക്കയിലെ ഗവേഷകന്‍ ഡോ. പീറ്റര്‍ ഹോട്ടെസ് രംഗത്ത് വന്നതിന് പിന്നാലെ പുറത്ത് വന്ന പഠന റിപ്പോര്‍ട്ട് അതീവ ഗൗരവത്തോടെയാണ് ശാസ്ത്ര ലോകം കാണുന്നത്. ഉറവിടം കണ്ടെത്തിയില്ലെങ്കില്‍ ലോകം ഇനിയും വലിയ ദുരന്തങ്ങള്‍ നേരിടേണ്ടിവരുമെന്നാണ് ഗവേഷകന്‍ പറയുന്നത്.

കൊവിഡ്-26, കൊവിഡ് 32 എന്നീ വൈറസുകളാണ് ഇനി ലോകത്ത് വ്യപിക്കാന്‍ ഇരിക്കുന്നത്. കൊറോണ വൈറസിന്റെ ഉറവിടം കണ്ടെത്തിയാല്‍ ഇത് തടയാനാകും. അന്വേഷണത്തിനായി ഹുബൈ പ്രവിശ്യയില്‍ നിന്നുള്ള ഗവേഷകര്‍, പകര്‍ച്ചവ്യാധി വിദഗ്ധര്‍, വൈറോളജിസ്റ്റ്, ബാറ്റ് ഇക്കളോജിസ്റ്റ് എന്നിവരുടെ സംഘത്തെ ആവശ്യമാണ്. കൊറോണയുടെ ഉറവിടം കണ്ടെത്താന്‍ ചൈനയുടെ സഹകരണം ഉണ്ടായേ തീരുവെന്നും അദ്ദേഹം പറഞ്ഞു.

അതേസമയം കൊവിഡ് വൈറസ് ഉത്ഭവിച്ചത് എങ്ങനെ എന്നതില്‍ മൂന്ന് മാസത്തിനകം റിപ്പോര്‍ട്ട് വേണമെന്ന് അമേരിക്കന്‍ പ്രസിഡന്റ് ജോ ബൈഡന്‍ ആവശ്യപ്പെട്ടിയിരുന്നു. ഇന്റലിജന്‍സ് ഏജന്‍സിയോടാണ് 90 ദിവസത്തിനകം റിപ്പോര്‍ട്ട് സമര്‍പ്പിക്കാന്‍ ബൈഡന്‍ ആവശ്യപ്പെട്ടത്. ചൈനയിലെ വുഹാനിലായിരുന്നു കൊവിഡ് ആദ്യം റിപ്പോര്‍ട്ട് ചെയ്തത്. ഈ വൈറസ് ഉത്ഭവിച്ചത് മൃഗങ്ങളില്‍ നിന്നാണോ അതോ ലാബില്‍ നിന്നാണോ എന്നതിലാണ് ബൈഡന്‍ റിപ്പോര്‍ട്ട് ആവശ്യപ്പെട്ടിരിക്കുന്നത്. അന്വേഷണത്തെ സഹായിക്കാന്‍ യുഎസ് ദേശീയ ലബോറട്ടറികളോട് അദ്ദേഹം നിര്‍ദ്ദേശിച്ചിട്ടുണ്ട്. മഹാമാരിയുടെ ഉത്ഭവത്തെക്കുറിച്ചുള്ള അന്വേഷണങ്ങളുമായി സഹകരിക്കാന്‍ ചൈനയോടും ബൈഡന്‍ ആവശ്യപ്പെട്ടു.

കൊവിഡ് വൈറസിന്റെ ഉറവിടം വുഹാനിലെ ലാബില്‍ നിന്നാണെന്ന് ട്രംപ് ഭരണകൂടത്തിന്റെ കാലം മുതല്‍ അമേരിക്ക ആരോപിക്കുന്നുണ്ട്. എന്നാല്‍ ചൈനയും ലോകാരോഗ്യ സംഘടനയും ഇതിനെ തള്ളികയുകയാണ് ഉണ്ടായത്. ചൈനയില്‍ നിന്നും സാധ്യമായ എല്ലാ തെളിവുകളും ശേഖരിക്കാനാണ് ശ്രമിച്ചിട്ടുളളതെന്നും ഭാവിയിലും ചൈനയില്‍ നിന്നും ഇത്തരം നീക്കങ്ങള്‍ പ്രതീക്ഷിക്കാമെന്നും അമേരിക്ക സ്റ്റേറ്റ് സെക്രട്ടറിയുടെ പ്രസ്താവന ലോകം ഒരു ഇടവേളക്ക് ശേഷം വീണ്ടും ചര്‍ച്ചയാകുകയാണ്.