എല്ലാം സുരേന്ദ്രന് അറിഞ്ഞെന്ന് പൊലീസ്...കൊടകര കുഴല്പ്പണ കേസില് കെ സുരേന്ദ്രന്റെ മൊഴിയെടുക്കും; സംസ്ഥാനത്തെ ബിജെപിയില് പൊട്ടിത്തെറി; കേന്ദ്ര നേതൃത്വം അന്വേഷണം ആരംഭിച്ചു; നേതൃമാറ്റം വേണമെന്ന് മുതിര്ന്ന നേതാവ് പി പി മുകുന്ദന്
കൊടകര കുഴല്പ്പണ കേസില് ബി.ജെ.പിക്ക് കുരുക്ക് മുറുകയാണ്. ജില്ലാ നേതാക്കളില് നിന്നും സംസ്ഥാന നേതാക്കളിലേക്കും, ഇപ്പോള് സംസ്ഥാന അധ്യക്ഷന് കെ സുരേന്ദ്രനിലേക്കുമാണ് അന്വേഷണം എത്തി നില്ക്കുന്നത്. പണം വന്നത് ബി ജെ പി നേതാക്കള്ക്ക് അറിയാമായിരുന്നുവെന്നാണ് പൊലീസ് നിഗമനം. ഇതിന്റെ അടിസ്ഥാനത്തില് കെ സുരേന്ദ്രന്റെ മൊഴിയെടുക്കനാണ് പൊലീസിന്റെ തീരുമാനം. പുതിയ വെളിപ്പെടുത്തലുകളുടെ അടിസ്ഥാനത്തില് സുരേന്ദ്രന്റെ മൊഴിയെടുക്കേണ്ടതുണ്ടെന്നാണ് പൊലീസ് വൃത്തങ്ങള് പറയുന്നത്.
ബി ജെ പി ആലപ്പുഴ ജില്ല ട്രഷറര് കെ ജി കര്ത്ത പണം വന്നത് ആര്ക്കു വേണ്ടിയെന്ന് സംസ്ഥാന നേതൃത്വത്തിന് അറിയാമെന്നാണ് മൊഴി നല്കിയത്. ഈ മൊഴി പ്രധാനപ്പെട്ടതാണെന്നാണ് അന്വേഷണ സംഘത്തിന്റെ വിലയിരുത്തല്. ഈ പശ്ചാത്തലത്തിലാണ് സംസ്ഥാന അധ്യക്ഷന്റെ മൊഴി എടുക്കുന്നത്.
സുരേന്ദ്രന്റെ മൊഴി എടുക്കും മുമ്പ് ബിജെപിയുടെ മറ്റു ചില നേതാക്കളേയും വിളിച്ചു വരുത്തും. കേസുമായി ബന്ധപ്പെട്ട് പല ബി ജെപി നേതാക്കളെയും പൊലീസ് ചോദ്യം ചെയ്തിട്ടുണ്ട്. എന്നാല് പല നേതാക്കളുടെയും മൊഴി പൊരുത്തപ്പെടുന്നില്ലെന്നാണ് വിലയിരുത്തല്. സാഹചര്യ തെളിവുകളും ശാസ്ത്രീയ തെളിവുകളും മൊഴിയുമായി പൊരുത്തപ്പെടുന്നില്ലെന്നും അന്വേഷണ സംഘം വ്യക്തമാക്കുന്നു.
അതേസമയം കുഴല്പ്പണക്കേസില് ബി.ജെ.പിയില് പൊട്ടിത്തെറിയുടെ വക്കിലേക്ക് പോകുകയാണ്. കുഴല്പ്പണ ആരോപണത്തില് സംസ്ഥാന അദ്ധ്യക്ഷന് കെ സുരേന്ദ്രന് മറുപടി പറയണമെന്നും സംസ്ഥാനത്തെ ബി ജെ പിയില് നേതൃമാറ്റം വേണമെന്നും മുതിര്ന്ന നേതാവ് പി പി മുകുന്ദന് ആവശ്യപ്പെട്ടു. തിരഞ്ഞെടുപ്പിനുശേഷം സംസ്ഥാനത്ത് ബി ജെ പിയുടെ പ്രതിച്ഛായ പൂര്ണമായും നഷ്ടപ്പെട്ടെന്നും അദ്ദേഹം കുറ്റപ്പെടുത്തി. ആദര്ശത്തോടെ പാര്ട്ടിയില് പ്രവര്ത്തിച്ച പലരും ഇപ്പോള് മാറിനില്ക്കുകയാണെന്നും മുകുന്ദന് പറഞ്ഞു.
കെ സുരേന്ദ്രന് അദ്ധ്യക്ഷനായശേഷം കണ്ണൂരില് വന്നപ്പോള് തന്നെ വിളിച്ചിരുന്നു. പിന്നീട് വിളിച്ചിട്ടില്ല, ബ്ലോക്ക് ആക്കിയിരിക്കാം. ഇപ്പോള് പാര്ട്ടിയുടെ അവസ്ഥ ശ്രീധരന്പിള്ളയുടെ കാലത്തേക്ക് പോയിരിക്കുന്നു. താഴേത്തട്ടില് ചര്ച്ച വേണമെന്ന ആവശ്യം പരിഗണിക്കപ്പെട്ടില്ലെന്നും മുകുന്ദന് ചൂണ്ടിക്കാട്ടി. പുറത്തുവന്ന ഫോണ് സംഭാഷണത്തിലെ ശബ്ദരേഖ സുരേന്ദ്രന്റേത് തന്നെയാണ്. അതൊരു കെണിയായിരുന്നുവെന്ന് മനസിലാക്കാന് കഴിയാതെ പോയത് സുരേന്ദ്രന്റെ ജാഗ്രതക്കുറവാണ്. ഇക്കാര്യത്തില് സുരേന്ദ്രന് മറുപടി പറയണം. കുഴല്പ്പണ ഇടപാടില് ബി ജെ പി നേതൃത്വം പറയുന്ന കാര്യങ്ങളില് വൈരുദ്ധ്യമുണ്ടെന്നും അദ്ദേഹം പറഞ്ഞു.
ബി ജെ പിയില് തിരഞ്ഞെടുപ്പ് ഫണ്ട് കൈകാര്യം ചെയ്യാന് ഒരു ഫിനാന്സ് കമ്മിറ്റിയുണ്ടായിരുന്നു. കൊടകര സംഭവം പാര്ട്ടിക്ക് ആകെ നാണക്കേടുണ്ടാക്കി. ഇത് മാറ്റിയെടുക്കണം. പരിവാര് സംഘടനകളെയും ഇത് ബാധിച്ചു. പ്രവര്ത്തകരുടെ വിഷമം മാറ്റിയെടുക്കാന് നേതൃത്വത്തിന് കഴിയണമെന്നും മുകുന്ദന് ആവശ്യപ്പെട്ടു. ബി ജെ പിയെ ബാധിച്ചിട്ടുളള രോഗത്തിന് ചികിത്സ വൈകരുത്. ഒരു ശസ്ത്രക്രിയ തന്നെ വേണ്ടിവരും. ഇത്തരത്തില് ഇനി സംഘടനയെ മുന്നോട്ട് കൊണ്ടുപോകാനാകില്ല. രണ്ടടി മുന്നോട്ട് കൊണ്ടുപോകുമ്പോള് ഒരടി പിന്നോട്ടുവരുന്ന അവസ്ഥയാണ് പാര്ട്ടിയുടേത്. ഇത് സംഘടനയെ അടിമുടി ബാധിച്ചുകഴിഞ്ഞുവെന്നും മുകുന്ദന് കുറപ്പെടുത്തി.
നേതൃമാറ്റം എങ്ങനെ വേണമെന്ന് ദേശീയ നേതൃത്വം തീരുമാനിക്കണം. ഇല്ലയെങ്കില് സംസ്ഥാനത്തെ ബി ജെ പിയുടെ രാഷ്ട്രീയ പ്രസക്തി തന്നെ നഷ്ടപ്പെടും. ഇപ്പോള് നടക്കുന്ന സംഭവങ്ങളെ കുറിച്ച് കേന്ദ്രനേതൃത്വത്തിന് അറിയാം. അവര് തന്നെ ബന്ധപ്പെട്ടിരുന്നു. ചില കാര്യങ്ങളില് വിശദീകരണങ്ങള് തേടാനായാണ് വിളിച്ചത്. കേന്ദ്ര നേതൃത്വം ഇതേപ്പറ്റി അന്വേഷിക്കുകയാണ്. 35 സീറ്റ് കിട്ടിയാല് ഭരണം പിടിക്കുമെന്ന പ്രസ്താവനയും ലീഗിനെ ക്ഷണിക്കുകയുമൊക്കെ ചെയ്തത് അണികളില് ആശയക്കുഴപ്പമുണ്ടാക്കിയെന്നും മുകുന്ദന് അഭിപ്രായപ്പെട്ടു.
https://www.facebook.com/Malayalivartha