മാഗി നൂഡില്‍സ്, കിറ്റ് കാറ്റ്, നെസ്‌കഫേ... നെസ്ലേയുടെ ഏറ്റവും ജനപ്രീതി ആര്‍ജിച്ച ഭക്ഷ്യ ഉല്‍പന്നങ്ങളാണ് ഇത്. മാഗി ന്യൂഡില്‍സിന്റെ പേരില്‍ കുറച്ച് കാലം മുമ്പ് പഴിക്കേട്ടെങ്കിലും ഇപ്പോഴും ഇവയുടെ ഒന്നും ജനപ്രീതിക്ക് ഒരു കുറവും സംഭവിച്ചിരുന്നില്ല. എന്നാല്‍ ഇപ്പോള്‍ പുറത്ത് വരുന്ന വാര്‍ത്തകള്‍ അത്ര സുഖമുള്ളതല്ല. തങ്ങളുടെ 60 ശതമാനം ഭക്ഷ്യ ഉത്പന്നങ്ങളും ആരോഗ്യത്തിന് ഗുണകരമല്ലെന്ന് തുറന്ന് സമ്മതിച്ചിരിക്കുകയാണ് നെസ്ലേ.

ഉത്പന്നങ്ങളുടെ ഗുണനിലവാരം ഉയര്‍ത്താന്‍ പ്രത്യേകമായ കാര്യങ്ങള്‍ ചെയ്യുമെന്നും, എങ്കിലും ചില ഉത്പന്നങ്ങള്‍ എത്ര ശ്രമിച്ചാലും ആരോഗ്യകരമാക്കാന്‍ സാധിക്കില്ലെന്നും ഇവര്‍ ചൂണ്ടിക്കാണിക്കുന്നു. കമ്പനിയുടെ തന്നെ ഉന്നത ഉദ്യോഗസ്ഥര്‍ അയച്ച ആഭ്യന്തര റിപ്പോര്‍ട്ടിലാണ് ഇക്കാര്യങ്ങള്‍ തുറന്ന് പറയുന്നത്. നിരവധി ഉത്പന്നങ്ങള്‍ നെസ്ലേ ലോകവ്യാപകമായി വിറ്റു വരുന്നുണ്ട്.

ഓസ്ട്രേലിയയുടെ ഫുഡ് റേറ്റിങ്ങില്‍ നെസ്ലേയുടെ 37 ശതമാനം ഉത്പന്നങ്ങള്‍ മാത്രമാണ് 3.5ന് മുകളില്‍ റേറ്റിങ് നേടിയത്. ഭക്ഷണ പാനീയങ്ങളുടെ കണക്കില്‍ 70 ശതമാനം ഉത്പന്നങ്ങളും ഗുണനിലവാരത്തിന്റെയോ ആരോഗ്യത്തിന്റെയോ മാനദണ്ഡങ്ങള്‍ പാലിക്കുന്നതില്‍ പരാജയപ്പെട്ടതായാണ് കാണിക്കുന്നത്. ശുദ്ധമായ കാപ്പി ഒഴികെയുള്ള 96 ശതമാനം പാനീയങ്ങളും, ഐസ്‌ക്രീം, മിഠായി ഗണത്തിലെ 99 ശതമാനം ഉത്പന്നങ്ങളും ഈ പരിധി പാലിക്കുന്നതില്‍ പരാജയപ്പെട്ടെന്നും റിപ്പോര്‍ട്ട് ചൂണ്ടിക്കാണിക്കുന്നു.

കമ്പനിയുടെ ഒരു വിഭാഗം പിസ്സയില്‍ ഒരു മനുഷ്യന് ഒരു ദിവസം കഴിക്കാവുന്ന സോഡിയത്തിന്റെ 40 ശതമാനം അടങ്ങിയിട്ടുണ്ട്, ഹോട്ട് പോക്കറ്റ്സ് പെപ്പറോനി പിസ്സയില്‍ 48 ശതമാനമാണ് സോഡിയത്തിന്റെ അളവ്. ഓറഞ്ചിന്റെ സ്വാദോടു കൂടിയ സാന്‍ പെല്ലെഗ്രിനോ പാനീയത്തിന്റെ 100 മില്ലിയില്‍ അടങ്ങിയിരിക്കുന്നത് 7.1 ഗ്രാം പഞ്ചസാരയാണ്. അളവിലധികം സോവിഡയവും പഞ്ചസാരയുമൊക്കെ ചേര്‍ന്നതാണ് നെസ്ലേയുടെ ഉത്പ്പന്നങ്ങളില്‍ മിക്കവയും. മാഗ്ഗി ന്യൂഡില്‍സിലൂടെയും കിറ്റ് കാറ്റിലൂടെയും മറ്റ് ജനപ്രീതി നേടിയ ഉത്പ്പന്നങ്ങളുടെയുമൊക്കെ നിര്‍മാതാവായ കമ്പനി ആരോഗ്യപരമായ ഭക്ഷണ ശീലങ്ങള്‍ പ്രോത്സാഹിപ്പിക്കാന്‍ ശ്രമിക്കുന്നതിനിടയിലാണ് ഇത്തരമൊരു റിപ്പോര്‍ട്ട് പുറത്ത് വന്നിരിക്കുന്നത്.

അതേസമയം വാര്‍ത്ത പുറത്ത് വന്നതിന് പിന്നാലെ കമ്പനി വിശദീകരണവുമായി രംഗത്തെത്തിയിട്ടുണ്ട്. ഉത്പന്നങ്ങള്‍ ഗുണനിലവാരം പുലര്‍ത്തുന്നുണ്ടെന്നും, അവയിലെ പോഷകാഹരങ്ങളുടേയും മറ്റ് ആരോഗ്യപരമായ ഘടകങ്ങളുടേയും തോത് വര്‍ദ്ധിപ്പിക്കുന്നതിനുമുള്ള ശ്രമങ്ങളാണ് നടത്തുന്നതെന്നും കമ്പനി പറയുന്നു. കഴിഞ്ഞ ഏഴ് വര്‍ഷത്തിനിടെ മാത്രം കമ്പനി ഉത്പന്നങ്ങളില്‍ നിന്നും സോഡിയത്തിന്റേയും പഞ്ചസാരയുടേയും അളവ് വളരെയധികം കുറയ്ക്കാന്‍ സാധിച്ചിട്ടുണ്ട്. കുട്ടികള്‍ക്കായി ആരോഗ്യപരമായ രീതിയില്‍ നിരവധി വസ്തുക്കള്‍ പുറത്തിറക്കിയിട്ടുണ്ടെന്നും അവര്‍ അവകാശപ്പെട്ടു.

2015യിലാണ് മാഗി ന്യൂഡില്‍സുമായി ബന്ധപ്പെട്ട വിവാദമുണ്ടാകുന്നത്. എന്നാല്‍ ഈ വിവാദങ്ങള്‍ എല്ലാം അഞ്ചു മാസം കൊണ്ടു തന്നെ വീണ്ടും മാഗി വിപണിയില്‍ തിരിച്ചെത്തി. ആ വര്‍ഷം തന്നെ നഷ്ടപ്പെട്ട വിപണി ഏറെ കുറെ തിരിച്ചു പിടിക്കാനും നെസ്‌ലേക്ക് സാധിച്ചിരുന്നു. അതേസമയം പുതിയ വിവാദങ്ങള്‍ ഇനി എങ്ങനെയാണ് നെസ്‌ലേ ഉല്‍പന്നങ്ങളുടെ വിപണത്തെ ബാധിക്കുമെന്ന് കണ്ടറിയണം.